പശ്ചിമേഷ്യയിലെ ഏറ്റവും വലിയ രാഷ്ട്രീയ-സൈനിക ശക്തിയാണ് ഇറാന്‍. ഇസ്ലാമിക പൗരോഹിത്യ ഭരണത്തിന് കീഴിലുള്ള ഈ രാജ്യത്തിന് ചിലർ ഒരു വിപ്ലവ മുഖം നൽകും. പശ്ചാത്യ ലോകം, വിശേഷിച്ച് അമേരിക്ക ആ മുഖത്തിന്‌ തീവ്രവാദം എന്ന ലേബൽ കൂടി പതിച്ചു കൊടുക്കും. എന്നാൽ എന്താണ് ഇറാൻ എന്ന് പഠിക്കാൻ തുനിഞ്ഞിറങ്ങുന്ന ഏതൊരാൾക്കും ഇന്നത്തെ ഇറാനിലേക്ക് ചൂണ്ടുപലകയായി ഒരു സംവിധാനമുണ്ട്. പശ്ചിമേഷ്യയിലെ ഏറ്റവും വലിയ സമാന്തര സൈനിക വിഭാഗമായ ഐ.ആർ.ജി.സി. അഥവാ സിപാഹ് - യെ - പസ്ദറാൻ - യെ - ഇൻക്വിലാബ് - ഇസ്ലാമി എന്ന ഇസ്ലാമിക് റെവല്യൂഷണറി ഗാർഡ് കോർപ്സ്. ഇറാനിയൻ സായുധ സേനയുടെ ഒരു ഉന്നത വിഭാഗമാണ് ഐ.ആർ ജി.സി. പെർഷ്യയിൽ ഈ പേരിന്‍റെ അർഥം ഇസ്ലാമിക വിപ്ലവത്തിന്‍റെ കാവൽ സേന എന്നാണ്.

1979 ലാണ് അന്ന് ഇറാൻ ഭരിച്ചിരുന്ന മുഹമ്മദ് റാസാ ഷാ പേഹലവിയുടെ ഭരണകൂടത്തെ ആട്ടിമറിച്ചു കൊണ്ട് ആയത്തുള്ള റൂഹൊല്ല ഖുമേനിയുടെ നേതൃത്വത്തിൽ ഇറാനിയൻ വിപ്ലവം അല്ലെങ്കിൽ ഇസ്ലാമിക വിപ്ലവം അരങ്ങേറുന്നത്. തികഞ്ഞ ഒരു അമേരിക്കൻ അടിമയായിരുന്നു ഷാ. ഇറാനെ പശ്ചാത്യവൽക്കരിക്കുന്ന പല മാറ്റങ്ങളും വരുന്നത് ഷായുടെ ഭരണകാലത്താണ്.എന്നാൽ ഈ കൊളോണിയൽ ആധുനികത ഇറാനിയൻ സാംസ്‌കാരിക വൈവിധ്യത്തെയും മതപരമായ നിഷ്ടകളെയും ആക്രമിക്കുന്നു എന്ന സമീപനമായിരുന്നു മത വിശ്വാസികളായിരുന്ന ഇറാനിലെ ഭൂരിപക്ഷം ജനങ്ങള്‍ക്കും. ഇസ്ലാമിക പൗരോഹിത്യത്തിന്‍റെ പരമോന്നത പതവിയിലിരിക്കുന്ന ആയത്തുല്ല ഖുമേനിയുടെ നേതൃത്വത്തിൽ ഇറാനിയൻ വിപ്ലവം നടക്കുന്നത് ഈ സാഹചര്യത്തിലാണ്.

ഭരണം പേഹലവിയില്‍ നിന്നും പിടിച്ചെടുത്ത ഉടനെ തന്നെ ഒരു ആദർശ ഇസ്ലാമിക ഭരണകൂടം എങ്ങനെയാണ് പ്രവർത്തിക്കേണ്ടതെന്ന് ഖുമേനി ഒരു രൂപരേഖ തയ്യാറാക്കി. ആ ചട്ടകൂടിലാണ് ഇന്നും ഇറാൻ പ്രവർത്തിക്കുന്നത്. ഭരണകൂടം സ്ഥാപിച്ചെങ്കിലും പുരോഹിത വർഗം സൈന്യത്തെ സംശയത്തോടെയാണ് വീക്ഷിച്ചിരുന്നത്. ഒരു പട്ടാള അട്ടിമറി അവർ ഭയപ്പെട്ടു. ഇതിന്‍റെ ഭാഗമായാണ് ഭരണഘടനയുടെ എല്ലാ പരിരക്ഷയും നൽകി രാഷ്ട്രീയ ഇടപെടലുകൾക്ക് നിയമ സാധ്യതകൾ കൽപ്പിച്ചു കൊടുത്ത് ഐ.ആർ.ജി.സി സ്ഥാപിക്കപ്പെടുന്നത്. പട്ടാളത്തിന്‍റെ അധികാരങ്ങൾക്ക് കടിഞ്ഞാണിട്ട് നിയമങ്ങൾ ബലപ്പെടുത്തുകയായിരുന്നു ലക്ഷ്യം. ആ ലക്ഷ്യത്തിനായി അവർ നിർമിച്ചത് ഭരണകൂടത്തിനോട് കൂറുള്ള രാജ്യതാല്പര്യങ്ങളില്ലാത്ത ഒരു സംഘടനയായിരുന്നു.

ഇറാന്‍ മൊത്തം പടർന്നു കിടക്കുന്ന അധികാര ഘടനയാണ് ഐ.ആർ.ജി.സിയുടേത്. ഓരോ മേഖലകളും നിയന്ത്രിക്കാന്‍ പ്രത്യേക വിഭാഗങ്ങള്‍. പ്രധാനമായും നാല് വിഭാഗങ്ങളാണ് ഐ.ആർ.ജി.സിക്കുള്ളത് - ബസീജ്, ഖുദ്സ്, ഖതാം അല്‍ അന്‍ബിയാസ്, ബോന്‍യാഡ്സ്. സാധാരണ വേഷത്തിലുള്ള പൗര സേനയാണ് ബസീജ്. പ്രത്യക്ഷത്തില്‍ കാണാന്‍ സാധിക്കുന്ന ഐ.ആർ.ജി.സി ശക്തി. തെരുവുകളില്‍ ക്രമസമാധാന നിലയും ശരിയത്ത് നിയമങ്ങളും സംരക്ഷിക്കുന്നത് ബസീജാണ്. അവര്‍ വിമതസ്വരങ്ങളെ നിരത്തുകളില്‍ അടിച്ചമര്‍ത്തി. 90,000 സ്ഥിര അംഗങ്ങളും 300,000 റിസര്‍വ് അംഗങ്ങളും ബസീജിലുണ്ട്.

സാമ്പ്രദായക രീതിയിലല്ലാത്ത യുദ്ധങ്ങളും സൈനിക ഇന്‍റലിജന്‍സ് ഓപ്പറേഷനുകളും നടത്തുന്നത് ഖുദ്‌സ് എന്ന പ്രത്യേക സംഘമാണ്. അമേരിക്കയുടെ സി.ഐ.എയുടേയും ജോയിന്‍റ് സ്‌പെഷ്യല്‍ ഓപ്പറേഷന്‍ കമാന്‍ഡിന്‍റെയും ഇറാനിയന്‍ ബദല്‍ രൂപമാണ് ഖുദ്‌സ്. ഇറാന് വെളിയിലെ പ്രവര്‍ത്തനങ്ങളുടെ നേതൃത്വം ഖുദ്‌സിനാണ്. ഇവരാണ് പശ്ചിമേഷ്യയിലെ ഭരണകൂടങ്ങള്‍ക്കെതിരെ പോരാടുന്ന പല സായുധ സംഘങ്ങളേയും സഹായിക്കുന്നത്. പലസ്തീനില്‍ ഹമാസിനേയും പലസ്തീന്‍ ഇസ്ലാമിക് ജിഹാദിനേയും, ലബനോനില്‍ ഹിസ്ബുല്ല, യെമനില്‍ ഹൂതികള്‍, സിറിയ , ഇറാഖ്, അഫ്ഗാനിസ്ഥാന്‍ എന്നിവിടങ്ങളില്‍ ഷിയാ സായുധ സൈന്യങ്ങള്‍ എന്നിവരെ പിന്തുണയ്ക്കുന്നത് ഖുദ്‌സാണ്. 2000 മുതല്‍ 5000 വരെ സജീവ പ്രവർത്തകർ ഖുദ്‌സിനുണ്ട്.

കണ്‍സ്ട്രഷനാണ് ഖതാം അല്‍ അന്‍ബിയാസ് വിഭാഗത്തിന്‍റെ മേഖല.ഡാമുകള്‍, ടണലുകള്‍, ഹൈവേകള്‍, ജല വിതരണം, ഓയില്‍ പൈപ്‌ലൈനുകള്‍, കരാര്‍ പണികള്‍ എന്നിങ്ങനെ 750 ഓളം ഓപ്പറേഷനുകള്‍ ഇവര്‍ ഇറാനില്‍ നടത്തുന്നുണ്ട്. ഇറാന് അകത്തും പുറത്തും 812 രജിസ്റ്റര്‍ ചെയ്ത കമ്പനികള്‍ അന്‍ബിയാസിന്‍റെ പേരിലുണ്ട്. ഇറാനിലെ ഏറ്റവും വലിയ വ്യവസായിയും വികസന പദ്ധതികളുടെ കോൺട്രാക്ടറുമായ അല്‍ അന്‍ബിയാസ് ഐ.ആർ.ജി.സിയിലെ ഏറ്റവും ശക്തമായ സംഘടനയാണ്.

ബോൻയാഡ്സ് പ്രത്യക്ഷത്തിൽ കാരുണ്യപ്രവർത്തനങ്ങളിൽ ഏർപ്പെടുന്ന സ്ഥാപനമാണെങ്കിലും ഇറാനിലെ വിവിധ കമ്പനികളുടെ ഷെയറുകൾ ഇവരുടെ നിയന്ത്രണത്തിലാണ്. പുരോഹിതരെ അഭിവൃദ്ധിപ്പെടുത്താനായി പ്രവർത്തിക്കുന്ന ഈ വിഭാഗം സിവിൽ സമൂഹത്തിനെ എന്നും അവരുടെ നിയന്ത്രണത്തിൽ നിലനിർത്തുന്നു. ഐ.ആർ.ജി.സിയുടെ വാർഷിക വരുമാനം 55 ബില്യൺ ഡോളറാണെന്നാണ് ലോസ് ഏഞ്ചൽസ് ടൈംസ് റിപ്പോർട്ട് ചെയ്യുന്നത്. അതായത് ഇറാൻ സമ്പദ് വ്യവസ്ഥയുടെ മൂന്നിൽ രണ്ട് ഭാഗവും നിയന്ത്രിക്കുന്നത് ഐ.ആർ.ജി.സിയാണ്. തോക്കുകൾ കൊണ്ട് നടക്കുന്ന വ്യവസായ കൂട്ടായ്മയാണ് ഐ ആർ ജി സി യെന്ന് ഒറ്റ വരിയിൽ പറയാം.

ഇറാനിൽ ഹിജാബ് വിരുദ്ധ പ്രക്ഷോഭങ്ങൾ നടന്നപ്പോഴും അതിനെ അടിച്ചമർത്താൻ മുന്നിലുണ്ടായിരുന്നത് ഐ.ആർ.ജി.സിയാണ്. ഡ്രോണുകളും മിസൈലുകളും ഉപയോഗിച്ച് അവർ ഇറാൻ ഭരണകൂടത്തിനോട് കലഹിച്ച് തെഹ്റാൻ വിട്ട് പോയവർ താമസിച്ചിരുന്ന കുർദിസ്ഥാൻ മേഖല വിറപ്പിച്ചു. ലോക രാജ്യങ്ങളിൽ പലരും സംശയ ദൃഷ്ടിയോടെ നോക്കുന്ന ഈ സായുധ സംഘടനയെ ഇപ്പോഴിതാ കാനഡയും തീവ്രവാദ സംഘടനയായി പ്രഖ്യാപിച്ചിരിക്കുന്നു. ഇസ്രായേൽ അതിർത്തിയിലെ വിമത നീക്കങ്ങളെ പ്രോത്സാഹിപ്പിച്ച് അവിടെ പോരാട്ടം കടുപ്പിക്കുന്ന സാഹചര്യത്തിലാണ് ഐ.ആർ.ജി.സിക്കെതിരെ കാനഡയുടെ ഈ നീക്കം.