മലപ്പുറം: എൽഡിഎഫ് സ്ഥാനാർഥിയായി തന്നെ പരിഗണിച്ചു എന്ന വാർത്ത എങ്ങനെ വന്നു എന്നറിയില്ലെന്ന് റിയാസ് മുക്കോളി. കഴിഞ്ഞ തവണ പട്ടാമ്പി മത്സരിച്ചപ്പോൾ തോറ്റാലും അവിടെ ഉള്ളവർക്ക് വേണ്ടി പ്രവർത്തിക്കുമെന്ന് വാക്ക് നൽകിയിരുന്നുവെന്നും ആ വാക്ക് പാലിച്ചു പട്ടാമ്പിയിൽ ഇത് വരെ പ്രവർത്തിച്ചുവെന്നും റിയാസ് പറഞ്ഞു. യുഡിഎഫിൽ സീറ്റില്ല എന്നു കണ്ടപ്പോൾ പഴയ സുഹൃത്തുക്കളായ സിപിഐഎം ആളുകൾ ബന്ധപ്പെട്ടുവെന്നും അവരോട് നന്ദി പറഞ്ഞു ആ ക്ഷണം അവസാനിപ്പിച്ചുവെന്നും റിയാസ് കൂട്ടിച്ചേർത്തു.
ഒരുപാട് അവസരങ്ങൾ പാർട്ടി തന്നുവെന്നും താൻ നൂറ് ശതമാനം കോൺഗ്രസുകാരനെന്നും റിയാസ് വ്യക്തമാക്കി. സിപിഐഎംന് നിലവിൽ സ്ഥാനാർഥി ക്ഷാമം ആണെന്നും റിയാസ് പറഞ്ഞു. സ്ഥാനാർഥിത്വം ലഭിക്കാത്തതിൽ തനിക്ക് പരിഭവമില്ലെന്നും കിട്ടാത്തതിനെ ചൊല്ലി വേദനക്കില്ലെന്നും റിയാസ് പറഞ്ഞു.