ദക്ഷിണ കൊറിയണൻ വാഹന ബ്രാൻഡായ ഹ്യുണ്ടായ് വീണ്ടും വിപണി പിടിക്കാനെത്തുകയാണ്. തങ്ങളുടെ ജനപ്രിയ കോംപാക്റ്റ് എസ്‌യുവിയായ വെന്യുവിന്റെ പുത്തൻ പതിപ്പുമായാണ് ഈ വരുന്ന ഒക്ടോബർ 24 ന് ലോഞ്ചിംഗ്. പരീക്ഷണ സമയത്തും, നിർമാണത്തിന്റെ പല ഘട്ടങ്ങളിലും പുത്തൻ വെന്യുവിന്റെ ചില ദൃശ്യങ്ങൾ പുറത്തുവന്നിരുന്നു. ഇപ്പോഴിതാ ഇൻ്റീരിയർ ചിത്രങ്ങളാണ് വൈറലായിരിക്കുന്നത്.
അത്ര വ്യക്തമല്ലാത്ത ചിത്രങ്ങളാണ് പുറത്തെത്തിയതെങ്കിലും പഴയതിൽ നിന്നും കാര്യമായ മാറ്റങ്ങൾ പുതിയ മോഡലിനുണ്ടെന്നാണ് വ്യക്തമാകുന്നത്. എക്‌സെന്റ്, ക്രെറ്റ എൻ ലൈനിൽ അടുത്തിടെ കണ്ടതുപോലെ ഏറ്റവും പുതിയ ഡിസൈൻ രീതിയാണ് വെന്യു പുത്തൻ പതിപ്പിന് ഹ്യുണ്ടായ് സ്വീകരിച്ചിരിക്കുന്നത്.
വിശാലമായ ഗ്രിൽ, ലംബ ഇൻസേർട്ടുകൾ, എൽഇഡി ഡിആർഎൽ, ലോവർ ബമ്പറിൽ സംയോജിപ്പിച്ചിരിക്കുന്ന ചതുരാകൃതിയിലുള്ള ഹെഡ്‌ലാമ്പുകൾ എന്നിവയെല്ലാം പുതുമോഡലിലുണ്ട്. പുതുതായി രൂപകൽപ്പന ചെയ്ത അലോയ് വീലുകൾ നൽകിയിട്ടുണ്ട്. ബേസ്, മിഡ് വേരിയന്റുകളിൽ 16 ഇഞ്ച് വീലുകളും ടോപ്പ് വേരിയന്റുകളിൽ 17 ഇഞ്ച് വീലുകളും ഉണ്ടാകുമെന്നാണ് കമ്പനി പുറത്തുവിടുന്ന വിവരം. സൈഡ് പ്രൊഫൈലിൽ വലിയ മാറ്റമൊന്നും വരുത്തിയിട്ടില്ല.
പുതിയ വെന്യുവിന് ഇപ്പോൾ ഡ്യുവൽ 10.2 ഇഞ്ച് ഫ്ലോട്ടിംഗ് സ്‌ക്രീൻ സജ്ജീകരണമാണ് നൽകുന്നത്. പുതിയ എസി വെന്റുകൾ, ഫിസിക്കൽ കൺട്രോൾ ബട്ടണുകൾ, ഇന്റഗ്രേറ്റഡ് ഡാഷ്‌ക്യാം, ഓട്ടോ-ഡിമ്മിംഗ് ഐആർവിഎം, പുതിയ സ്റ്റിയറിംഗ് വീൽ എന്നിവ സെൻട്രൽ കൺസോളിൽ കാണാം.പനോരമിക് സൺറൂഫ്, 360-ഡിഗ്രി ക്യാമറ, വെന്റിലേറ്റഡ് സീറ്റുകൾ, ഡ്യുവൽ-സോൺ ക്ലൈമറ്റ് കൺട്രോൾ, റെയിൻ സെൻസിംഗ് വൈപ്പറുകൾ, ആംബിയന്റ് ലൈറ്റിംഗ് തുടങ്ങിയ ഫീച്ചറുകളും ഇതിലുണ്ടാകും.
മെക്കാനിക്കൽ പോർഷനും കാര്യമായ മാറ്റങ്ങൾ വരുത്താതെയാകും ഇറക്കുക. നിലവിലുള്ള 1.2L നാച്ചുറലി ആസ്പിറേറ്റഡ് പെട്രോൾ, 1.0L ടർബോ പെട്രോൾ, 1.5L ഡീസൽ എഞ്ചിൻ ഓപ്ഷനുകൾ ഇതിലുണ്ടാകും. 5-സ്പീഡ് MT, 6-സ്പീഡ് MT, 6-സ്പീഡ് iMT, 6-സ്പീഡ് ഓട്ടോമാറ്റിക്, 7-സ്പീഡ് DCT എന്നിവയാണ് ഗിയർബോക്സ് ഓപ്ഷനുകൾ.