“കാന്താര ചാപ്റ്റർ 1” എന്ന സിനിമയുടെ മലയാളം ട്രെയിലർ പൃഥ്വിരാജ് സുകുമാരൻ ഔദ്യോഗികമായി പ്രകാശനം ചെയ്യുമെന്ന് നിർമാണക്കമ്പനിയായ ഹോംബലെ ഫിലിംസ് പ്രഖ്യാപിച്ചു. ട്രെയിലർ സെപ്റ്റംബർ 22-ന് ഉച്ചയ്ക്ക് 12:45ന് പുറത്തിറങ്ങും. ജനകീയ വിശ്വാസങ്ങളും, ദൈവിക ആചാരങ്ങളും, നാടൻ കലാരൂപങ്ങളും ഒക്കെ ചേർന്നു വലിയൊരു സിനിമാറ്റിക് അനുഭവമായി മാറിയ കാന്താരയുടെ കഥയാണ് ഇനി പുതിയ അധ്യായവുമായി പ്രേക്ഷകർക്ക് മുന്നിലെത്തുന്നത്.
“From the land of lores, where stories breathe and legends walk…” എന്ന വരികളോടെയാണ് പുതിയ ട്രെയിലറിൻ്റെ പ്രഖ്യാപനം നടന്നിരിക്കുന്നത്. ആദിവാസി സമൂഹത്തിൻ്റെ ദൈവികാചാരങ്ങളിൽ നിന്നും ജനിക്കുന്ന ആത്മീയ ഗാഥയാണ് കാന്താര. മനുഷ്യനും പ്രകൃതിയും തമ്മിലുള്ള ബന്ധം, ആത്മീയതയും ഭക്തിയും കലർത്തിയ ഒരു ലോകമാണ് ഈ സിനിമ പ്രേക്ഷകരുടെ മുന്നിലെത്തിക്കുന്നത്.
കാന്താര: ചാപ്റ്റർ 1 ഹോംബാലെ ഫിലിംസ് നിർമിക്കുന്ന ഏറ്റവും വലിയ സിനിമാറ്റിക് പദ്ധതികളിലൊന്നായാണ് കണക്കാക്കപ്പെടുന്നത്. ബി. അജനീഷ് ലോക്നാഥാണ് സംഗീതം ഒരുക്കുന്നത്. ക്യാമറ അർവിന്ദ് കശ്യപും, പ്രൊഡക്ഷൻ ഡിസൈൻ വിനേഷ് ബംഗ്ലാനുമാണ് ചെയ്തിരിക്കുന്നത്.
ചിത്രത്തിൽ ഉൾപ്പെടുത്തിയിട്ടുള്ള ഏറ്റവും വലിയ ആകർഷണം, 2022-ലെ കാന്താരയുടെ പൈതൃകം ഉയർത്തിപ്പിടിക്കുന്ന വമ്പിച്ച യുദ്ധരംഗം തന്നെയാണ്. 25 ഏക്കറോളം വിസ്തൃതിയുള്ള പ്രത്യേക ഗ്രാമസജ്ജീകരണത്തിലാണ് ഈ രംഗം ചിത്രീകരിച്ചത്. ദേശീയ-അന്താരാഷ്ട്ര വിദഗ്ധരുടെ സഹകരണത്തോടെ, 500-ത്തിലധികം പരിശീലനം നേടിയ പോരാളികളും 3,000-ത്തോളം കലാകാരന്മാരും പങ്കെടുത്താണ് 45–50 ദിവസങ്ങളിലായി ഈ രംഗം പകർത്തിയത്. ഇന്ത്യൻ സിനിമാ ചരിത്രത്തിലെ തന്നെ വമ്പിച്ച യുദ്ധരംഗങ്ങളിൽ ഒന്നായി ഇതിനെ കണക്കാക്കപ്പെടുന്നു.
ഈ ചിത്രത്തിൻ്റെ പ്രത്യേകത, പ്രേക്ഷകർക്ക് ഐമാക്സ് സ്ക്രീനുകളിൽ കൂടി കാഴ്ചവെക്കപ്പെടുന്നതാണ്. കാന്താര: ചാപ്റ്റർ 1 ൻ്റെ വിസ്മയകരമായ ദൃശ്യങ്ങൾക്കും, അത്യുഗ്രൻ പശ്ചാത്തല സംഗീതത്തിനും, വലിയ കാൻവാസിലുള്ള അവതരണത്തിനും ഐമാക്സ് അനുഭവം മറ്റൊരു ഉയർച്ച നൽകും. റിഷഭ് ഷെട്ടിയുടെ സംവിധാനവും, ഹൊംബാലെ ഫിലിംസ് എന്ന വമ്പൻ നിർമാണകമ്പനിയും ഒരുമിക്കുമ്പോൾ, ഇത് ഇന്ത്യൻ സിനിമയിലെ തന്നെ വലിയ ഐമാക്സ് അനുഭവങ്ങളിലൊന്നാകുമെന്ന് പ്രതീക്ഷിക്കുന്നു.
കാന്താര: ചാപ്റ്റർ 1 ഒക്ടോബർ 2-ന് ലോകമെമ്പാടും റിലീസ് ചെയ്യും. കന്നഡ, ഹിന്ദി, തെലുങ്ക്, മലയാളം, തമിഴ്, ബംഗാളി, ഇംഗ്ലീഷ് തുടങ്ങിയ ഭാഷകളിലാണ് ചിത്രം ഒരേസമയം എത്തുന്നത്. മലയാള സിനിമ ലോകത്ത് സൂപ്പർഹിറ്റുകൾ സമ്മാനിച്ച പൃഥ്വിരാജ് സുകുമാരൻ തന്നെയാണ് ട്രെയിലർ പുറത്തിറക്കുന്നത്. തൻ്റെ കഴിവുകളും സിനിമാപ്രതിബദ്ധതയും കൊണ്ട് മലയാളം സിനിമയ്ക്ക് നിരവധി ഉയർച്ചകൾ സമ്മാനിച്ച താരത്തിൻ്റെ കൈകളിൽ നിന്നുള്ള ഈ ലോഞ്ച്, പ്രേക്ഷകർക്ക് കൂടുതൽ ആവേശം പകരുമെന്ന് ഉറപ്പാണ്.
“ഗർജ്ജനം വീണ്ടും ആരംഭിക്കുന്നു…” എന്ന സന്ദേശത്തോടെയാണ് ട്രെയിലർ ലോഞ്ചിൻ്റെ പ്രഖ്യാപനം. സോഷ്യൽ മീഡിയയിലുടനീളം ആരാധകർ വലിയ ആവേശത്തിലാണ്. #KantaraChapter1, #PrithvirajSukumaran എന്നീ ഹാഷ്‌ടാഗുകൾ ഇതിനകം തന്നെ ട്രെൻഡിങ്ങ് ആയി മാറിയിട്ടുണ്ട്.