കൊച്ചി: 'കളങ്കാവൽ' എന്ന ഏറ്റവും പുതിയ സിനിമയുടെ വിശേഷങ്ങൾ പങ്കുവച്ച് മമ്മൂട്ടി. സിനിമയിൽ തന്റേത് നെഗറ്റീവ് ഷേഡുള്ള കഥാപാത്രമാണെന്ന് നടൻ. കഥ കേട്ടപ്പോൾ തന്നെ ഈ കഥാപാത്രത്തെ താൻ തെരഞ്ഞെടുക്കുകയായിരുന്നു എന്നും മമ്മൂട്ടി വ്യക്തമാക്കി.
സിനിമയുടെ പ്രൊമോഷന്റെ ഭാഗമായി നിർമാതാക്കളായ മമ്മൂട്ടി കമ്പനിയാണ് മമ്മൂട്ടിയുമായുള്ള അഭിമുഖം പുറത്തുവിട്ടത്. താൻ സംസാരിക്കുന്നത് കളങ്കാവലിലെ നായകനോടോ? വില്ലനോടോ എന്ന അവതാരികയുടെ ചോദ്യത്തിന് ചിരിച്ചുകൊണ്ടാണ് മമ്മൂട്ടി മറുപടി നൽകിയത്. 'രണ്ടുമല്ല. നിങ്ങൾ സംസാരിക്കുന്നത് ഒരു നടനോട് ആണ്' എന്നായിരുന്നു മമ്മൂട്ടിയുടെ മറുപടി.
"ഈ കഥയിൽ രണ്ട് കഥാപാത്രങ്ങളുണ്ട്. രണ്ടും പ്രധാന വേഷങ്ങൾ. അതിൽ ഏത് തെരഞ്ഞെടുക്കണമെന്ന് കഥകേട്ടപ്പോഴേ തീരുമാനിച്ചു. ഐ വിൽ ബി ഡൂയിങ് ദ അഥർ റോൾ," മമ്മൂട്ടി പറഞ്ഞു.
"ഹീറോ അല്ലാത്ത കഥാപാത്രങ്ങളും ഉണ്ടാകും. പ്രധാന കഥാപാത്രങ്ങളാകുന്ന വില്ലൻമാർ. പ്രധാനമായും ഞാനൊരു നടൻ ആണ്. ഇങ്ങനെ കാറ്റഗറൈസ് ചെയ്താൽ നമുക്ക് നല്ല റോളുകൾ നഷ്ടമാകും. ഭ്രമയുഗത്തിൽ മറ്റൊരു റോൾ ചോദിച്ചാൽ തരില്ലേ? പക്ഷേ ഇതല്ലേ (കൊടുമൺ പോറ്റി എന്ന കഥാപാത്രം) രസമായത്. കാലക്രമേണ, മുതിർന്ന കഥാപാത്രങ്ങളിലേക്ക് എത്തുമ്പോൾ കുറച്ചുകൂടി ചോയിസ് ഉണ്ടാകും. കുറച്ചു കൂടി വേരിയേഷൻസ് ലഭിക്കും. ഹീറോയ്ക്ക് പരിമിതിയുണ്ട്. പക്ഷേ നമ്മൾ സിനിമയിൽ കാണുന്ന വില്ലൻമാർ പല വേഷത്തിലാണ് വരുന്നത്. അവർ പല കഥാപാത്രങ്ങളായിരിക്കും. ഹീറോ അങ്ങനെയല്ല. ഇപ്പോൾ അതൊക്കെ മാറി കഴിഞ്ഞു. എന്നാലും സാമ്പ്രദായികമായ സിനിമകളിൽ അങ്ങനെയാണ്," മമ്മൂട്ടി പറഞ്ഞു. 'കളങ്കാവലി'ൽ തന്റേത് ഒരു 'ഗുഡ് സോൾ' അല്ല എന്നും നടൻ കൂട്ടിച്ചേർത്തു.
സിനിമയുടെ ടീസറിൽ കണ്ട ഐക്കോണിക്കായ സ്മോക്കിങ് സീനിനെപ്പറ്റിയും മമ്മൂട്ടി സംസാരിച്ചു. "ഡയറക്ടർക്ക് എന്തെങ്കിലും സർപ്രൈസിങ് ആയി നമ്മൾ കൊടുക്കണം. എന്നാലെ അയാൾക്ക് അടുത്ത ഷോട്ട് വയ്ക്കാൻ പറ്റൂ. ഇൻസ്പയറിങ് ആയിരിക്കണം. സിഗരറ്റ് വലിക്കണം എന്ന് മാത്രമേ പറഞ്ഞിട്ടുള്ളൂ എങ്കിൽ കൂടി അതിൽ നമ്മുടേതായി എന്തെങ്കിലും വേണം. സിഗരറ്റ് വലിച്ചു എന്നത് കൊണ്ട് ആയില്ല. അപ്പുറത്ത് ഒരാൾ ഉണ്ട്. ടീസറിൽ കാണുന്നില്ലെന്നേ ഉള്ളൂ. ആ ഷോട്ട് പല കഥകൾ പറയുന്നുണ്ട്," മമ്മൂട്ടി പറഞ്ഞു.
സിനിമ സയനൈഡ് മോഹന്റെ കഥയാണോ എന്ന ചോദ്യത്തിന് അതുപോലെ ഒരു കഥയായിരിക്കാം എന്നായിരുന്നു നടന്റെ മറുപടി. "സയനൈഡ് മോഹന്റെ കേസുമായി സിനിമയ്ക്ക് ബന്ധമില്ല. സയനൈഡ് ഉണ്ട്. ആ കഥയല്ലിത്. അതുപോലെ ഒരാൾ (സയനൈഡ് മോഹനൻ) ആയിരിക്കാം. കുറച്ചൊക്കെ യഥാർഥ സംഭവങ്ങളാണ്," മമ്മൂട്ടി വ്യക്തമാക്കി.
'കളങ്കാവലി'ലെ വേഷം വിനായകനും കാണികൾക്കും മാറ്റമായിരിക്കും. സിനിമയിൽ തന്റെയും വിനായകന്റെയും കഥാപാത്രങ്ങളിൽ സാമ്യതകളുണ്ടെന്നും നടൻ കൂട്ടിച്ചേർത്തു.
ജിതിന് കെ ജോസ് സംവിധാനം ചെയ്ത 'കളങ്കാവൽ' ഡിസംബർ അഞ്ചിന് തിയേറ്ററുകളിലെത്തും. മമ്മൂട്ടിക്കൊപ്പം തുല്യ പ്രാധാന്യമുള്ള വേഷത്തിൽ വിനായകനും സിനിമയിൽ എത്തുന്നു . ജിഷ്ണു ശ്രീകുമാറും ജിതിന് കെ ജോസും ചേര്ന്നാണ് 'കളംങ്കാവൽ' തിരക്കഥ രചിച്ചത്. ദുല്ഖര് സല്മാന് നായകനായെത്തിയ സൂപ്പര്ഹിറ്റ് ചിത്രം 'കുറുപ്പി'ന്റെ കഥ ഒരുക്കി ശ്രദ്ധ നേടിയ ജിതിന് കെ ജോസ് ആദ്യമായി സംവിധാനം ചെയ്യുന്ന ചിത്രമാണിത്. മമ്മൂട്ടി കമ്പനി ആണ് നിർമാണം. കേരളത്തില് വിതരണത്തിനെത്തിക്കുന്നത് വേഫറര് ഫിലിംസും.