കൊച്ചി: 2026ൽ മലയാളികൾ ഏവരും കാത്തിരിക്കുന്ന സിനിമയാണ് 'പേട്രിയറ്റ്'. മലയാള സിനിമയിലെ ഇതിഹാസങ്ങളായ മമ്മൂട്ടിക്കും മോഹന്ലാലിനുമൊപ്പം വലിയ താരനിര അണിനിരക്കുന്ന സിനിമയുടെ റിലീസ് തീയതി അണിയറപ്രവർത്തകർ പുറത്തുവിട്ടു. മഹേഷ് നാരായണൻ സംവിധാനം ചെയ്യുന്ന ചിത്രം ഏപ്രിൽ 23ന് ആഗോള തലത്തിൽ തിയേറ്ററുകളിൽ എത്തും.
രാജ്യസ്നേഹത്തിന്റെ ധീരോദാത്ത കഥയാണ് 'പേട്രിയറ്റ്' പറയുന്നത്. ഇന്ത്യന് സിനിമ കണ്ട ഏറ്റവും വലിയ സ്പൈ ത്രില്ലറുകളിലൊന്നാകും സിനിമ എന്നാണ് പ്രതീക്ഷിക്കുന്നത്. "ഈ റിപ്പബ്ലിക് ദിനത്തിൽ നിർഭയമായ ശബ്ദങ്ങളുടെ കരുത്ത് പകർന്നു നൽകുന്നു," എന്ന് കുറിച്ചുകൊണ്ടാണ് സിനിമയുടെ റിലീസ് തീയതി അണിയറപ്രവർത്തകർ പുറത്തുവിട്ടിരിക്കുന്നത്.
കഴിഞ്ഞ ദിവസം, ചിത്രത്തിലെ ആറ് കഥാപാത്രങ്ങളുടെ ക്യാരക്ടര് പോസ്റ്ററുകള് പുറത്തു വിട്ടിരുന്നു. നയന്താര, രാജീവ് മേനോന്, കുഞ്ചാക്കോ ബോബന്, ഫഹദ് ഫാസില്, മമ്മൂട്ടി, മോഹന്ലാല് എന്നിവരുടെ ക്യാരക്ടര് പോസ്റ്ററുകള് ആണ് റിലീസ് ചെയ്തത്. മമ്മൂട്ടിയും മോഹൻലാലും ക്യാരക്ടർ പോസ്റ്ററുകൾ പരസ്പരം പങ്കുവയ്ക്കുകയായിരുന്നു.
മമ്മൂട്ടിയും മോഹന്ലാലും 17 വര്ഷത്തിനുശേഷം ഒരുമിക്കുന്ന സിനിമ എന്നതു മാത്രമല്ല 'പേട്രിയറ്റി'ന്റെ പ്രത്യേകത. മലയാള സിനിമയിലെ യുവനിരയുടെ വലിയൊരു സാന്നിധ്യം തന്നെ ചിത്രത്തിലുണ്ട്. ഫഹദ് ഫാസില്, കുഞ്ചാക്കോ ബോബന് എന്നിവര് മുതല് ദര്ശന രാജേന്ദ്രനും സെറിന് ഷിഹാബും വരെ നീളുന്നു ആ പട്ടിക. ഇതിനൊപ്പം നയന്താര കൂടിയാകുമ്പോള് രണ്ടു പതിറ്റാണ്ടിനിടെ മലയാള സിനിമ കണ്ട ഏറ്റവും വലിയ നക്ഷത്രത്തിളക്കമാണ് 'പേട്രിയറ്റി'നുള്ളത്.
രേവതി, ജിനു ജോസഫ്, രാജീവ് മേനോന്, ഡാനിഷ് ഹുസൈന്, ഷഹീന് സിദ്ദിഖ്, സനല് അമന് എന്നിവര്ക്കൊപ്പം 'മദ്രാസ് കഫേ', 'പത്താന്' തുടങ്ങിയവയിലൂടെ ശ്രദ്ധേയനായ തിയറ്റര് ആര്ട്ടിസ്റ്റും സംവിധായകനുമായ പ്രകാശ് ബെലവാടിയും ചിത്രത്തിലുണ്ട്. പാന് ഇന്ത്യന് സിനിമയായൊരുങ്ങുന്ന 'പേട്രിയറ്റി'ന്റെ സംവിധായകന് 'ടേക്ക് ഓഫ്', 'സീ യൂ സൂണ്', 'മാലിക്' തുടങ്ങിയ ചിത്രങ്ങളിലൂടെ മികവിന്റെ കൈയൊപ്പിട്ട മഹേഷ് നാരായണനാണ്. മലയാളത്തില് ഇന്നേവരെയുള്ളതില് വച്ച് ഏറ്റവും വലിയ ബജറ്റിലാണ് സിനിമ ഒരുങ്ങുന്നത്.
വിവിധ രാജ്യങ്ങളിലെ പത്തിലധികം ഷെഡ്യൂളുകളിലായി ഒരുവര്ഷത്തിലധികമാണ് സിനിമയുടെ ചിത്രീകരണം നീണ്ടത്. 2024 നവംബര് ശ്രീലങ്കയിലാണ് 'പേട്രിയറ്റ്' ഷൂട്ടിങ് തുടങ്ങിയത്. മലയാളത്തില് ഏറ്റവുമധികം രാജ്യങ്ങളില് ചിത്രീകരിച്ച സിനിമയെന്ന ബഹുമതിയും 'പേട്രിയറ്റി'നാണ്. ഇന്ത്യ, ശ്രീലങ്ക, യുകെ, അസര്ബെയ്ജാന്, യുഎഇ എന്നിവിടങ്ങളിലെ വിവിധ ലൊക്കേഷനുകളിലായിരുന്നു ഷൂട്ടിങ്. ഇന്ത്യയിലെ വന്നഗരങ്ങളായ ഡല്ഹി, മുംബൈ, ഹൈദരാബാദ്, കൊച്ചി എന്നിവിടങ്ങളാണ് ഈ സിനിമയ്ക്ക് ലൊക്കേഷനായത്.
അന്താരാഷ്ട്ര നിലവാരത്തിലുള്ളതാകും 'പേട്രിയറ്റ്' എന്നുറപ്പിക്കുന്നതായിരുന്നു സിനിമയുടെ ടീസര്. ത്രസിപ്പിക്കുന്ന ആക്ഷന് രംഗങ്ങളാകും ചിത്രത്തിന്റെ ഏറ്റവും വലിയ ആകര്ഷണം. ഏറ്റവും മികച്ച സാങ്കേതികപ്രവര്ത്തകരാണ് ഈ സിനിമയ്ക്കായി ഒന്നിക്കുന്നത്. യുവതലമുറയുടെ ഹൃദയമിടിപ്പറിയുകയും അതിന്റെ താളത്തിനൊത്ത് സംഗീതമൊരുക്കുകയും ചെയ്യുന്ന സുഷിന് ശ്യാമാണ് സംഗീത സംവിധായകന്. 'തഗ്സ് ഓഫ് ഹിന്ദുസ്ഥാന്', 'റോക്കി ഓര് റാണി കി പ്രേം കഹാനി' തുടങ്ങിയ ബോളിവുഡ് സിനിമകളിലൂടെ ശ്രദ്ധേയനായ മനുഷ് നന്ദനാണ് ക്യാമറ. ചിത്രത്തിന്റെ രചന സംവിധായകന് മഹേഷ് നാരായണന്റേതാണ്. മഹേഷ് നാരായണനും രാഹുല് രാധാകൃഷ്ണനും ചേര്ന്നാണ് എഡിറ്റിങ്. ഡിജിറ്റല് മാര്ക്കറ്റിങ് - വിഷ്ണു സുഗതന്, പിആര്ഒ- വൈശാഖ് സി വടക്കേവീട്, ജിനു അനില്കുമാര്.