കൊച്ചി: ഇന്ത്യൻ സിനിമയിലെ ഇതിഹാസ താരങ്ങളായ രജനികാന്തും കമൽ ഹാസനും 46 വർഷങ്ങൾക്ക് ശേഷം വെള്ളിത്തിരയിൽ ഒന്നിക്കുന്ന ചിത്രമാണ് ഏറെ നാളായി ആരാധകർക്ക് ഇടയിൽ സംസാരവിഷയം. സിനിമയുടെ ഔദ്യോഗിക പ്രഖ്യാപനത്തിനായുള്ള രജനി-കമൽ ആരാധകരുടെ കാത്തിരിപ്പ് അവസാനിക്കുന്നു. ഏവരും കാത്തിരിക്കുന്ന സിനിമയുടെ പ്രൊമോ അപ്ഡേറ്റ് പുറത്തുവിട്ടിരിക്കുകയാണ് അണിയറ പ്രവർത്തകർ.
നാളെ ഉച്ചയ്ക്ക് 12.07ന് സിനിമയുടെ ' കൂൾ റെട്രോ സ്വാഗ്' പ്രൊമോ വീഡിയോ പുറത്തിറങ്ങും. റെഡ് ജയന്റ് മൂവീസാണ് അപ്ഡേറ്റ് പുറത്തുവിട്ടിരിക്കുന്നത്. 'ജയിലർ', 'ഡോക്ടർ' എന്നിങ്ങനെയുള്ള ഹിറ്റുകൾ ഒരുക്കിയ നെൽസൺ ദിലീപ് കുമാറാണ് ഈ സിനിമയുടെ സംവിധാനം. നേരത്തെ, തമിഴ് യുവ സംവിധായകരിൽ മുൻനിരയിലുള്ള ലോകേഷ് കനകരാജിന്റെ പേരാണ് ഈ സിനിമയുടെ സംവിധായകനായി കേട്ടിരുന്നത്. ഒന്നര മാസത്തോളം എടുത്ത് ലോകേഷ് തിരക്കഥയും എഴുതി. എന്നാൽ, ആക്ഷൻ സിനിമയ്ക്ക് പകരം രസകരമായ ഒരു എന്റർടെയ്നർ ആണ് ഇരുതാരങ്ങളും ആഗ്രഹിച്ചത്. ഇതോടെ, ലോകേഷ് പ്രോജക്ടിൽ നിന്ന് പിന്മാറി. ഇതാണ് നെൽസണ് നറുക്ക് വീഴാൻ കാരണമായത്.
രജനികാന്തുമായുള്ള നെൽസന്റെ മൂന്നാമത്തെ ചിത്രമായിരിക്കും ഇത്. കമൽഹാസനുമായി ഒന്നിക്കുന്ന ആദ്യ ചിത്രവും. രജനിയെ നായകനാക്കി നെൽസൺ ഒരുക്കിയ 'ജയിലർ' വൻ വിജയമായിരുന്നു. നിലവിൽ ഈ സിനിമയുടെ രണ്ടാം ഭാഗത്തിന്റെ ചിത്രീകരണം പുരോഗമിക്കുകയാണ്. സൺ പിക്ചേഴ്സിന്റെ ബാനറിൽ കലാനിധി മാരനാണ് സിനിമയുടെ നിർമാണം. ചിത്രം അടുത്ത വർഷം തിയേറ്ററിലെത്തും.
ഡാർക്ക് കോമഡി കൈകാര്യം ചെയ്യാനുള്ള നെൽസന്റെ കഴിവ് രജനി-കമൽ ചിത്രത്തിന് മുതൽക്കൂട്ടാകുമെന്നാണ് കരുതപ്പെടുന്നത്. അനിരുദ്ധ് രവിചന്ദർ ആണ് സിനിമയുടെ ഗാനങ്ങളും പശ്ചാത്തല സംഗീതവും ഒരുക്കുന്നത്. കമൽ ഹാസന്റെ നിർമാണത്തിൽ ഒരുങ്ങുന്ന 'തലൈവർ 173'യുടെ ഷൂട്ടിങ്ങിന് ശേഷമാകും പുതിയ ചിത്രത്തിലേക്ക് താരം കടക്കുക.
'ഡോൺ' എന്ന ഹിറ്റ് ചിത്രം ഒരുക്കിയ സിബി ചക്രവർത്തിയാണ് 'തലൈവർ 173'യുടെ സംവിധാനം. രാജ് കമൽ ഇന്റർനാഷണലിന്റെ ബാനറിൽ ആർ. മഹേന്ദ്രനൊപ്പം കമൽ നിർമിക്കുന്ന ചിത്രമാണിത്. അനിരുദ്ധ് രവിചന്ദർ സംഗീതമൊരുക്കുന്ന ചിത്രത്തിന്റെ ടാഗ്ലൈൻ ‘എവെരി ഫാമിലി ഹാസ് എ ഹീറോ’ എന്നാണ്. 2027 പൊങ്കൽ റിലീസ് ആയി സിനിമ ആഗോള തലത്തിൽ പ്രദർശനത്തിന് എത്തും എന്നാണ് സൂചന.