സിദ്ധാര്‍ഥ് ആനന്ദ് സംവിധാനം ചെയ്യുന്ന 'കിംഗി'ന്റെ ചിത്രീകരണത്തിനിടെ ഷാരൂഖ് ഖാന് പരിക്ക്. മുംബൈയിലെ ഗോള്‍ഡന്‍ ടുബാക്കോ സ്റ്റുഡിയോയില്‍ വെച്ച് സംഘട്ടന രംഗം ചിത്രീകരിക്കുന്നതിനിടെയാണ് പരിക്കേറ്റത്. പുറത്ത് പരികേറ്റതിനെ തുടര്‍ന്ന് താരം ചികിത്സയ്ക്കായി യുഎസിലേക്ക് പോയെന്നും പിന്നീട് അവിടെ നിന്നും യുകെയിലേക്ക് മാറിയെന്നുമാണ് റിപ്പോര്‍ട്ട്. നിലവില്‍ കുടുംബത്തോടൊപ്പം ഷാരൂഖ് യുകെയിലാണ് ഉള്ളത്. ഒരു മാസത്തെ വിശ്രമം വേണമെന്നാണ് നിര്‍ദേശം.
അതേസമയം പരിക്ക് ഗുരുതരമല്ലെന്നും താരം സുഖം പ്രാപിച്ചുവരുകയാണെന്നും റിപ്പോര്‍ട്ടുകള്‍ പറയുന്നു. പരിക്കിനെ തുടര്‍ന്ന് നേരത്തെ തീരുമാനിച്ചിരുന്ന ശ്രീലങ്കന്‍ യാത്ര മാറ്റി വെച്ചു. അതുപോലെ സിനിമയുടെ ചിത്രീകരണവും താല്‍കാലികമായി മാറ്റിവെച്ചിട്ടുണ്ട്. സെപ്റ്റംബറില്‍ വീണ്ടും ചിത്രീകരണം ആരംഭിക്കുമെന്നാണ് സൂചന.
ഷാരൂഖ് ഖാന്റെ മകള്‍ സുഹാന ഖാന് ആദ്യമായി ബിഗ് സ്‌ക്രീനിലെത്തുന്ന ചിത്രം കൂടിയാണ് 'കിംഗ്'. സോയ അക്തര്‍ സംവിധാനം ചെയ്ത 'ആര്‍ച്ചീസിലാണ്' സുഹാന ആദ്യമായി അഭിനയിച്ചത്. ചിത്രം നെറ്റ്ഫ്‌ളിക്‌സിലായിരുന്നു റിലീസ് ചെയ്തത്.
ദീപിക പദുകോണ്‍ ആണ് ചിത്രത്തിലെ മറ്റൊരു താരം. ഷാരൂഖ് ഖാനും ദീപികയും ഒന്നിക്കുന്ന ആറാമത്തെ ചിത്രമാണ് 'കിംഗ്'. ചിത്രത്തില്‍ എക്‌സ്‌റ്റെന്റഡ് കാമിയോ റോളിലാണ് ദീപിക എത്തുന്നത്. സുഹാന ഖാന്റെ അമ്മയുടെ വേഷമാണ് താരം ചെയ്യുന്നതെന്ന് നേരത്തെ റിപ്പോര്‍ട്ടുകള്‍ വന്നിരുന്നു.
സിദ്ധാര്‍ഥ് ആനന്ദിന്റെ 'കിംഗ്' ഒരു ആക്ഷന്‍ ത്രില്ലറാണ്. വലിയ ബജറ്റില്‍ ഒരുങ്ങുന്ന ചിത്രം അടുത്ത വര്‍ഷം തിയേറ്ററിലെത്തുമെന്നാണ് സൂചന. ചിത്രത്തിന്റെ സംഗീതം ഒരുക്കുന്നത് സച്ചിന്‍ ജിഗറും പശ്ചാത്തലസംഗീതം ചെയ്യുന്നത് അനിരുദ്ധ് രവിചന്ദറുമാണ്.