മോഹൻലാൽ - പ്രിയദർശൻ കൂട്ടുകെട്ടിൽ 1994ൽ പുറത്തിറങ്ങിയ മലയാളത്തിലെ എവർഗ്രീൻ ക്ലാസിക് ചിത്രം ‘തേന്മാവിൻ കൊമ്പത്ത്’ വീണ്ടും തിയേറ്ററുകളിലേക്ക്. 4K ദൃശ്യമികവിലും ഡോൾബി അറ്റ്മോസ് ശബ്ദ സാങ്കേതികവിദ്യയിലും പുനഃസംവിധാനം ചെയ്ത ചിത്രം 2026 ഒക്ടോബർ ഒന്നിന് ആഗോളതലത്തിൽ വീണ്ടും പ്രദർശനത്തിനെത്തും. പ്രസിദ്ധി ക്രിയേഷൻസിന്റെയും സൂര്യ സിനി ആർട്സിന്റെയും ബാനറിൽ ഒരുക്കിയ ചിത്രത്തിന്റെ രചനയും സംവിധാനവും പ്രിയദർശനാണ് നിർവഹിച്ചത്. എൻ. ഗോപാലകൃഷ്ണനാണ് നിർമാതാവ്. റീ റിലീസിനായി ചിത്രം 4Kയിൽ റീ മാസ്റ്റർ ചെയ്തത് മാറ്റിനി നൗവും ഇ ഫോർ എന്റർടെയ്ൻമെന്റ്സും ചേർന്നാണ്.
‘തേന്മാവിൻ കൊമ്പത്ത്’ വീണ്ടും എത്തുമ്പോൾ ഏറെ ശ്രദ്ധേയമാകുന്ന മറ്റൊരു സാന്നിധ്യമാണ് സോണിയ അവതരിപ്പിച്ച കുയിലി. 1994ൽ ഈ ചിത്രത്തിലൂടെ പ്രേക്ഷകരുടെ മുന്നിലെത്തിയ കുയിലി എന്ന കഥാപാത്രവും സോണിയയുടെ പ്രകടനവും വീണ്ടും വെള്ളിത്തിരയിൽ തെളിയുകയാണ്. കുയിലി എന്ന കഥാപാത്രമായുള്ള മികച്ച പ്രകടനത്തിലൂടെ മലയാളി സിനിമാ പ്രേക്ഷകർ എന്നും ഓർക്കുന്ന മുഖമായി മാറാൻ സോണിയയ്ക്ക് സാധിച്ചു.
മലയാളി പ്രേക്ഷകർക്ക് ഇന്നും പ്രിയപ്പെട്ട മാണിക്യൻ, കാർത്തുമ്പി, ശ്രീകൃഷ്ണൻ അടക്കമുള്ള കഥാപാത്രങ്ങളെയും അവരുടെ രസകരമായ ലോകത്തെയും വീണ്ടും ബിഗ് സ്ക്രീനിൽ കാണാനുള്ള അവസരമാണ് ചിത്രത്തിന്റെ റീ-റിലീസ്. മോഹൻലാൽ, ശോഭന, നെടുമുടി വേണു എന്നിവർ കേന്ദ്ര കഥാപാത്രങ്ങളെ അവതരിപ്പിച്ച ചിത്രം പ്രണയവും നർമ്മവും ഗ്രാമീണ പശ്ചാത്തലവും സംഗീതവും സമന്വയിപ്പിച്ചാണ് ഒരുക്കിയത്. 1994 മെയ് 13നാണ് ചിത്രം ആദ്യമായി തിയേറ്ററുകളിലെത്തിയത്. മൂന്ന് പതിറ്റാണ്ടിലേറെക്കാലത്തിന് ശേഷം ചിത്രം പുതിയ ദൃശ്യമികവിൽ തിയേറ്ററുകളിലെത്തുമ്പോൾ, പഴയ പ്രേക്ഷകർക്ക് ഗൃഹാതുരമായ ഓർമകളും പുതിയ തലമുറയ്ക്ക് മലയാള സിനിമയിലെ ഒരു ക്ലാസിക് അനുഭവവും സമ്മാനിക്കുന്നതാകും ഈ റീ-റിലീസ്.
മികച്ച ദൃശ്യഭംഗിക്കും സാങ്കേതിക മികവിനും ദേശീയ, സംസ്ഥാന തലങ്ങളിൽ അംഗീകാരങ്ങൾ നേടിയ ചിത്രമാണ് ‘തേന്മാവിൻ കൊമ്പത്ത്’. ഛായാഗ്രഹണത്തിന് കെ.വി. ആനന്ദിനും കലാസംവിധാനത്തിന് സാബു സിറിലിനും ദേശീയ ചലച്ചിത്ര പുരസ്കാരം ലഭിച്ച ചിത്രം അഞ്ച് കേരള സംസ്ഥാന ചലച്ചിത്ര പുരസ്കാരങ്ങളും നേടിയിട്ടുണ്ട്. ചിത്രത്തിലെ ബേണി-ഇഗ്നേഷ്യസ് സംഗീതവും ഗിരീഷ് പുത്തഞ്ചേരിയുടെ ഗാനങ്ങളും ഇന്നും പ്രേക്ഷകർക്കിടയിൽ ഏറെ ജനപ്രിയമാണ്.
മോഹൻലാൽ, ശോഭന, നെടുമുടി വേണു, ശ്രീനിവാസൻ, കവിയൂർ പൊന്നമ്മ, കെ.പി.എ.സി ലളിത, സുകുമാരി, കുതിരവട്ടം പപ്പു, ശങ്കരാടി, ഗീത വിജയൻ, നന്ദു, സോണിയ തുടങ്ങിയവരാണ് ചിത്രത്തിലെ പ്രധാന താരങ്ങൾ.
രചന, സംവിധാനം: പ്രിയദർശൻ, നിർമ്മാതാവ്, എഡിറ്റിംഗ്: എൻ. ഗോപാലകൃഷ്ണൻ, ഛായാഗ്രഹണം: കെ.വി. ആനന്ദ്, സംഗീതം: ബേണി-ഇഗ്നേഷ്യസ്, പശ്ചാത്തല സംഗീതം: എസ്.പി. വെങ്കടേഷ് , കലാസംവിധാനം: സാബു സിറിൽ, ഗാനരചന: ഗിരീഷ് പുത്തഞ്ചേരി, സംഘട്ടനം: ത്യാഗരാജൻ, ഡിജിറ്റൽ മാർക്കറ്റിംഗ് : ഉണ്ണി രാജേന്ദ്രൻ, പിആർഓ: ഐശ്വര്യ രാജ്.