കൊച്ചി: ശിവകാർത്തികേയൻ നായകനായി എത്തുന്ന 'പരാശക്തി'യിലെ രണ്ടാം ഗാനം പുറത്ത്. 'രത്നമാല' എന്ന് തുടങ്ങുന്ന ഗാനത്തിന്റെ ലിറിക്കൽ വീഡിയോയിൽ ശിവകാർത്തികേയനും ശ്രീലീലയും രസകരമായ ചുവടുകൾ വയ്ക്കുന്ന ദൃശ്യങ്ങളും കാണാം. പാട്ട് കംപോസ് ചെയ്ത ജി.വി. പ്രകാശ് തന്നെയാണ് ആലപിച്ചിരിക്കുന്നത്.
'സൂരറൈ പോട്രി'നുശേഷം സുധ കൊങ്കര തമിഴിൽ ഒരുക്കുന്ന ചിത്രത്തിൽ രവിമോഹൻ, അഥർവ എന്നിവരും പ്രധാന വേഷങ്ങളിലെത്തുന്നു. ശ്രീലീലയാണ് നായിക. വില്ലന്‍ വേഷത്തിലാണ് രവിമോഹന്‍ എത്തുന്നത് എന്നാണ് റിപ്പോർട്ടുകൾ. 1965 ൽ തമിഴ്നാട്ടിൽ നടന്ന ഹിന്ദി വിരുദ്ധ പ്രക്ഷോഭം അടിസ്ഥാനമാക്കിയാണ് 'പരാശക്തി' ഒരുക്കിയിരിക്കുന്നത്.
ശിവ കാർത്തികേയന്റെ 25ാമത് ചിത്രമാണ് 'പരാശക്തി'. വിജയ് നായകനായി എത്തുന്ന 'ജനനായകന്' തൊട്ടുപിന്നാലെയാണ് പരാശക്തിയും തിയേറ്ററിലെത്തുക എന്നതും ശ്രദ്ധേയമാണ്. ജനുവരി ഒന്‍പതിന് വിജയ് ചിത്രം റിലീസ് ചെയ്യുമെന്നാണ് സൂചന. അങ്ങനെയെങ്കിൽ ഇത്തവണ പൊങ്കലിന് വിജയ്-ശിവകാർത്തികേയൻ ക്ലാഷിനാണ് തമിഴ് ബോക്സ്ഓഫീസ് സാക്ഷിയാകുക.
രവി കെ ചന്ദ്രന്‍ ആണ് സിനിമയുടെ ഛായാഗ്രഹണം. സതീഷ് സൂര്യ എഡിറ്റിങ്ങും നിര്‍വഹിക്കും. ആക്ഷന്‍ സീക്വന്‍സുകള്‍ ഒരുക്കുന്നത് സുപ്രീം സുന്ദറാണ്. കലാസംവിധാനം: എസ്. അണ്ണാദുരൈ, വരികൾ: യുഗഭാരതി, ഏകദേശി, അറിവ്, കബീർ വാസുകി, ജയശ്രീ മതിമാരൻ, അഡീഷണൽ സ്ക്രീൻപ്ലേ: ഗണേശ, അഡീഷണൽ ഡയലോഗ്: മദൻ കാർക്കി, ഷാൻ കറുപ്പുസാമി, വസ്ത്രാലങ്കാരം: പൂർണിമ, ഡി.അരുൺ മോഹൻ, നൃത്തസംവിധാനം: ബൃന്ദ, ക്രുതി മഹേഷ്, അനുഷ വിശ്വനാഥൻ, സൗണ്ട് ഡിസൈൻ: സുരൻ. ജി – എസ് അളഗിയക്കൂത്തൻ, വിഎഫ്എക്സ് സൂപ്പർവൈസർ: കെ.വി. സഞ്ജിത്, കളറിസ്റ്റ്: ആശിർവാദ് ഹഡ്കർ, ഹെയർ & മേക്കപ്പ്: സെറീന, എസ്. ഷൈദ് മാലിക്, സ്റ്റിൽസ്: സി.എച്ച്. ബാലു, ക്രിയേറ്റീവ് പ്രൊഡ്യൂസർ: ദേവ് രാംനാഥ്, എക്സിക്യൂട്ടീവ് പ്രൊഡ്യൂസർമാർ: എം.പി. സെന്തൽ, റിയ കൊങ്കര.