ദീർഘ നേരം ഇരുന്ന് ജോലി ചെയ്യുന്ന ലക്ഷക്കണക്കിന് ആളുകളാണ് നമുക്ക് ചുറ്റും ഉള്ളത്. തുടക്കത്തിൽ ഇരുന്നുള്ള ജോലി സുഖകരമായി തോന്നുമെങ്കിലും ദീർഘ കാലം ഇത്തരത്തിൽ ഇരുന്ന് പണിയെടുക്കുന്നത് പല അസുഖങ്ങൾക്കും കാരണമാകും. അതിലൊന്നാണ് ഹൃദ്രോഗം. ഹൃദ്രോഗത്തിൻ്റെ പ്രാഥമിക ലക്ഷണങ്ങളായി പ്രധാനമായി കണക്കാക്കുന്നത് നെഞ്ചു വേദന, ശ്വാസ തടസ്സം എന്നിവയെയാണ്. എന്നാൽ ഇതിന് മുന്നോടിയായി കാലിലെ ഞരമ്പുകൾ കാണിക്കുന്ന ലക്ഷണങ്ങൾക്ക് അധികം ശ്രദ്ധ നൽകാറില്ല ആരും.
മണിക്കൂറുകളോളം ഇരിക്കുമ്പോൾ ഞരമ്പുകളിലൂടെ രക്തം ഒഴുകാൻ സഹായിക്കുന്ന മസിലുകളുടെ പ്രവർത്തന ക്ഷമത കുറയും. അതോടെ രക്തയോട്ടം കുറയുകയും ഇത് വഴി ശരീരത്തിൽ എല്ലായിടത്തും ഓക്സിജനും മറ്റ് പോഷകങ്ങളും എത്തുന്നത് തടസ്സപ്പെടുകയും ചെയ്യും.
രക്തയോട്ടം സുഗമമാക്കുന്നതിൽ ഏറ്റവും കൂടുതൽ ആശ്രയിക്കുന്നത് കാലിലെ രക്തക്കുഴലുകളെയാണ്. മസിലുകൾ ശരിയായി പ്രവർത്തിച്ചില്ലെങ്കിൽ രക്തം പമ്പ് ചെയ്യാതെ വരും. ഇത് സ്ഥിരമായി സംഭവിക്കുമ്പോൾ മൈക്രോ വാസ്കുലേറ്റർ എന്ന ചെറിയ രക്തക്കുഴലുകളെ തകരാറിലാക്കുമെന്ന് കാർഡിയോളജിസ്റ്റ് ഡോ.ബൻസാൽ പറയുന്നു.
രക്തക്കുഴലുകൾ തകരാറിലാകുന്നതിന് തുടക്കത്തിൽ ലക്ഷണങ്ങൾ ഒന്നും കാണിക്കാറില്ല. കാലുകളിൽ അസ്വസ്ഥത ഉണ്ടാകുന്നത് പലപ്പോഴും തളർച്ചയാണെന്ന് കരുതി അവഗണിക്കുകയാണ് പതിവ്. എന്നാൽ അത് രക്തക്കുഴലുകൾ തകരാറിലാകുന്നതിൻ്റെ ലക്ഷണമാകാം.
പരിഹാരം ഉണ്ട്...
ചെറിയ വ്യായാമങ്ങളും ജീവിത ശൈലിയിലെ മാറ്റങ്ങളും കൊണ്ട് രക്തക്കുഴലുകളുടെ ആരോഗ്യം സംരക്ഷിക്കാം. ഒപ്പം ഹൃദയത്തെയും. തുടർച്ചയായി ഒരു സ്ഥലത്തിരുന്ന് ജോലി ചെയ്യുന്നത് ഒഴിവാക്കി ഓരോ 30 മിനിട്ടിലും കുറച്ച് നേരം നടക്കുന്നത് കാലുകളിലെ മസിലുകൾക്ക് ആരോഗ്യം നൽകുകയും രക്തയോട്ടം സുഗമമാക്കുകയും ചെയ്യും. ലിഫ്റ്റിന് പകരം പടവുകൾ ഉപയോഗിക്കുന്നതും നല്ലൊരു രീതിയാണ്. ഭക്ഷണ ശേഷം നടക്കുക. ഒപ്പം, ഇരുന്ന് ജോലി ചെയ്യുന്നതിനിടക്ക് കൈ കാലുകൾ വലിച്ചു നീട്ടുന്നത് നല്ലതാണ്.
