നാർസിസിസ്റ്റിക് പേഴ്സണാലിറ്റി ഡിസോര്‍ഡര്‍ (Narcissistic Personality Disorder) അഥവാ NPD ഒരു മാനസികാരോഗ്യാവസ്ഥയാണ്. DSM-5 (Diagnostic and Statistical Manual of Mental Disorders, 5th Edition) ഇതിനെയൊരു പേഴ്സണാലിറ്റി ഡിസോർഡറായി കാണുന്നു.
സ്വന്തം പ്രതിബിംബവുമായി പ്രണയത്തിലായ ഒരു യുവാവിന്റെ കഥയുണ്ട് ഗ്രീക്ക് മിത്തോളജിയിൽ, അതില്‍ നിന്നാണ് ഈ അവസ്ഥയ്ക്ക് നാർസിസിസം എന്ന പേരു വന്നത്. സ്വന്തം പ്രധാന്യത്തെക്കുറിച്ച് അമിതമായ, പലപ്പോഴും ഫാന്റസിയുടെ തലത്തിലേക്കെത്തുന്ന ധാരണകൾ സൂക്ഷിക്കുന്ന, അമിത ശ്രദ്ധയും, അഭിനന്ദനവും ആരാധനയും ആവശ്യപ്പെടുന്ന അവസ്ഥയാണിത്. മറ്റുള്ളവരുടെ വികാരങ്ങൾ മനസ്സിലാക്കാനോ, അവയെ അംഗീകരിക്കാനോ ഇവർക്ക് സാധിക്കാറില്ല. ഈ ലോകം മുഴുവനും നിങ്ങൾക്കായി കൊണ്ടുവന്നു തരുമെന്നതു പോലെ എക്സ്ട്രീം സ്നേഹത്തിലായിരിക്കും ഇവർ തുടങ്ങുക. (ഈ എക്സ്ട്രീം സ്നേഹമൊക്കെ ഇരയെ കെണിയിൽ വീഴിക്കാനുള്ള അടവ് മാത്രമാണ്). ഇവരുമായി റിലേഷനിൽ ആകുന്നത് സത്യത്തിൽ ഒരു നരകത്തിലേക്കു വീണു പോകുന്നത് പോലെയാണ്.
ഇത്തരക്കാരുടെ പ്രത്യേകതകൾ
* നമ്മൾ എസ് പി (സ്വയം പൊങ്ങി) എന്ന് പറയില്ലേ, സെൽഫ് പ്രയ്സിങ്... അതിന്റെ ഉസ്താദായിരിക്കും ഇവർ.
* എമ്പതി ഇവരുടെ അടുത്തു കൂടെ പോലും പോയിട്ടുണ്ടാവില്ല.
* താൻ സ്പെഷ്യൽ ആണെന്നും വലിയ തേങ്ങയാണെന്നും കരുതുന്നു. തന്നെപ്പോലെ സ്പെഷ്യൽ തേങ്ങകൾക്കേ തന്നെ മനസ്സിലാക്കാൻ സാധിക്കുകയുള്ളു എന്നും കരുതുന്നു
* എല്ലാവരും എന്നെ ആരാധ്യപുരുഷനായി കാണണം. (അങ്ങനെ പറയാൻ കാരണമുണ്ട്, ഈ ഏനക്കേട് കൂടുതൽ കാണാറുള്ളത് പുരുഷൻമാരിലാണെന്ന് പറയുന്നു)
* എന്നെ എല്ലാവരും വലിയ സംഭവമായി ട്രീറ്റ് ചെയ്യണം.
* വ്യക്തിബന്ധങ്ങൾ അവനവന്റെ വളർച്ചയ്ക്കു വേണ്ടി ചൂഷണം ചെയ്യാനുള്ളതാണെന്ന് കരുതുന്നു. എക്സ്ട്രീം ആയി മാനിപ്പുലേറ്റ് ചെയ്യുന്നു.
* ആരെങ്കിലും തന്നെ വിമർശിച്ചാൽ അസഹിഷ്ണുത കാണിക്കുന്നു.
* കൂടെ നിൽക്കുന്നവരുടെ (മിക്കപ്പോഴും) പാർട്ട്ണറുടെ ഫീലിങ്സിനും ആവശ്യങ്ങൾക്കും പട്ടി വില കൊടുക്കുക.
* മറ്റുള്ളവരെക്കുറിച്ച് അസൂയപ്പെടുക, എന്നിട്ട് മറ്റുള്ളവർ തന്നോട് അസൂയ വച്ചു പുലർത്തുന്നുവെന്ന് കരുതുക.
ഫ്ലയിങ് മങ്കീസ്
നിങ്ങളൊരു നാർസിസിസ്റ്റിനോട് എതിരിടുകയാണെങ്കിൽ, ഏറ്റവുമധികം ഭയക്കേണ്ടത് ഇവരെയാണ്. നമ്മളൊക്കെ ഓർക്കുന്നുണ്ടാവും കുട്ടിക്കാലത്തു കേട്ട വിസാർഡ് ഓഫ് ഓസ് എന്ന കഥയിലെ മന്ത്രവാദിനിയുടെ കിങ്കരന്മാരായ പറക്കും കുരങ്ങന്മാരെ. ആ മന്ത്രവാദിനിയെപ്പോലെ തന്നെ,
നാർസിസിസ്റ്റുകൾ അവരുടെ പദ്ധതി, പലപ്പോഴും മറ്റൊരാളുടെ ജീവിതം തന്നെ നശിക്കാനിടയുള്ള പദ്ധതി നടപ്പാക്കുക ഫ്ലയിങ് മങ്കീസ് എന്ന ഭടൻമാരിലൂടെയാണ്. നാർസിസിസ്റ്റിന്റെ എതിരാളികളെ വീഴ്ത്താൻ എല്ലാ അടവും ഇവർ പുറത്തെടുക്കും. പലപ്പോഴും ഒരു നാർസിസിസ്റ്റിന്റെ സഹോദരനോ, സഹോദരിയോ, സുഹൃത്തോ, പങ്കാളിയോ ഒക്കെ അവരുടെ ഫ്ളൈയിങ് മങ്കീസ് ആയി മാറാറുണ്ട്. വർഷങ്ങളായുള്ള നാർസിസിസ്റ്റിക്ക് അബ്യൂസ് കൊണ്ട് സ്വതന്ത്രമായ തീരുമാനമെടുക്കാനുള്ള ശേഷി നഷ്ടപ്പെട്ട് പലരും നാർസിസിസ്റ്റുകളുടെ ഫ്ലയിങ് മങ്കീസ് ആയി മാറാറുണ്ട്.
ഇങ്ങനെ കുറേ പ്രശ്നങ്ങൾ ഉള്ളതിൽ ഏറ്റവുമധികം മറ്റുള്ളവർക്ക് ദ്രോഹമായി മാറുന്നത് ഇവർ സ്വന്തം കാര്യ സാധ്യത്തിനായി മാനിപ്പുലേഷന്റെ ഏതറ്റം വരെയും പോകും എന്നതാണ്. ഇവരുടെ പാർട്ട്ണര്‍ പലപ്പോഴും കടന്നു പോകുന്നത് ട്രോമ ബോണ്ടിങ്ങിലൂടെയാവും. അബ്യൂസ് ചെയ്യുന്നയാളും ഇരയും തമ്മിൽ രൂപപ്പെടുന്ന അതിശക്തമായ വൈകാരിക ബന്ധമാണ് ട്രോമ ബോണ്ടിങ്. വിധേയത്വവും, ഡിപെൻഡൻസിയും ഒക്കെ ചേർന്ന അവസ്ഥയാണിത്.
എത്രയൊക്ക ഉപദ്രവിച്ചാലും (both physically and mentally) ലൗവർ /ഹസ്ബന്‍ഡ് / വൈഫ്‌ / ഫ്രണ്ട് എന്നിവരുടെയൊക്ക പിറകെ 'എന്നെ കളഞ്ഞിട്ട് പോകല്ലേ' എന്ന് പറഞ്ഞുനടക്കുന്ന ചിലരെയെങ്കിലും കണ്ടിട്ടുണ്ടാവില്ലേ നമുക്ക് ചുറ്റും. അവർ ട്രോമ ബോണ്ടിങ്ങിന് ഇരകളാണ്.
ഇവരുടെ മാനിപ്പുലേഷന് ഇരയാകുന്നവർ എത്തിച്ചേരുന്ന അവസ്ഥ
1. വീണ്ടും വീണ്ടും നിങ്ങളെ വേദനിപ്പിച്ചാലും നിങ്ങൾ വേദനിപ്പിച്ച ആളോടൊപ്പമുള്ള ബന്ധത്തിൽ തുടരുന്നു.
2. നിങ്ങളോട് പല തവണ വിശ്വാസവഞ്ചന കാണിച്ചു എന്ന് തെളിഞ്ഞു കഴിഞ്ഞിട്ടും അയാളെ/ അവളെ വിശ്വസിക്കുന്നു.
3. അയാൾ/ അവൾ ഇല്ലെങ്കിൽ നിങ്ങൾക്ക് നിലനിൽപ്പ് ഇല്ലെന്ന് തോന്നുന്നു.
4. ഒരു ബന്ധത്തിൽ നിങ്ങൾക്ക് നിങ്ങളായി ഇരിക്കാൻ കഴിയാതെ ഇരിക്കുന്നു, എന്നാൽ ആ ബന്ധത്തിൽ നിന്ന് പുറത്തുവരാൻ കഴിയുന്നില്ല.
5. അബ്യൂസറിന്റെ നിങ്ങൾക്കെതിരായ പ്രവൃത്തികൾക്ക് നിങ്ങൾ തന്നെ justification കണ്ടെത്തുന്നു.
അബ്യൂസ് തന്നെയാവും കൂടുതൽ എങ്കിലും നിമിഷാർദ്ധം എങ്കിലും ഇവർ കാണിക്കുന്ന സ്നേഹം, അറ്റാച്ച്മെന്റ് ഒക്കെ ഇവർ നല്ലതാണെന്ന തോന്നൽ ഇരയിൽ ഉണ്ടാക്കുന്നു. അബ്യൂസ്, സ്നേഹം ഇവ മാറി മാറി മാനിഫെസ്റ്റ് ചെയ്യുന്ന ഇവർ ഇതിൽ അകപ്പെട്ടവരിൽ അയാൾ നല്ലവനോ? കെട്ടവനോ? എന്ന കൺഫ്യൂഷൻ ഉണ്ടാക്കുന്നു. അതുകൊണ്ടു തന്നെ ഒരു ചിലന്തിവലയിൽ അകപ്പെട്ട അവസ്ഥയാണ് ഇരയ്ക്ക് ഉണ്ടാവുക. ഇരയാക്കപ്പെട്ടവർ ഒരു ഘട്ടത്തിൽ തന്റെ വേണ്ടപ്പെട്ടവരോട് പറയുകയോ, എന്തിന് നിയമപരമായി പരാതി നൽകുകയോ ചെയ്താൽ പോലും ഉള്ളിൽ അവർ പലപ്പോളും അബ്യൂസറിന്റെ ഭാഗത്തു നിന്ന് സ്നേഹം പ്രതീക്ഷിക്കുന്ന അവസ്ഥയിൽ ആയിരിക്കും. അതുകൊണ്ടു തന്നെ അയാൾക്ക്/ അവൾക്ക് വളരെ എളുപ്പം മാനിപ്പുലേറ്റ് ചെയ്യാനും ഇരയെ വീണ്ടും തന്റെ വശത്താക്കാനും സാധിക്കുന്നു. അതോടെ ഇരയ്ക്ക് ലഭിച്ചിരുന്ന സപ്പോർട്ട് സിസ്റ്റം ഇല്ലാതാവുന്നു.
മാനിപ്പുലേഷന്റെ ഘട്ടങ്ങൾ
1. ലൗവ് ബോംബിങ്
ഒരു റിലേഷൻഷിപ്പിന്റെ പ്രാഥമിക ഘട്ടത്തിൽ ആണിത് സംഭവിക്കുക. ഓപ്പോസിറ്റ് നില്കുന്നയാൾ സ്നേഹം കൊണ്ടു നിങ്ങളെ വീർപ്പു മുട്ടിച്ചുകളയും. അവസാനം This was the real guy/girl I was searching for എന്ന് വിക്ടിമിനെ കൊണ്ട് തോന്നിപ്പിക്കുന്നു. അങ്ങനെ വളരെ ശക്തമായ ഒരു ഇമോഷണൽ ബോണ്ടിങ് Abuser നേടിയെടുക്കുന്നു. ഇതാണ് ഐഡിയൽ ലൗ എന്ന വിശ്വാസം വിക്ടിമിലും ഉണ്ടാകുന്നു. എന്നാൽ ഓർക്കുക, ഇതെല്ലാം ഒരു strategy മാത്രമാണ്.
2. ട്രസ്റ്റ്‌ & ഡിപെൻഡൻസി
ഈ ഘട്ടത്തിൽ എന്തും ചെയ്തു നൽകി വിക്റ്റിമിന്റെ വിശ്വാസം അബ്യൂസർ നേടിയെടുക്കുന്നു. ഇത് വിക്ടിമിന് അബ്യൂസർ ഇല്ലാതെ തനിക്ക് നിലനിൽപ്പില്ല എന്ന രീതിയിലുള്ള അതിശക്തമായ dependence ഉടലെടുക്കുന്നതിന് കാരണമാകുന്നു.
3. ഡീവാല്യൂവേഷൻ
ഈ ഘട്ടത്തിൽ അബ്യൂസർ വിക്ടിമിനെ അകാരണമായി വിമർശിക്കുകയും അതു വഴി അവരുടെ ആത്മാഭിമാനവും ആത്മവിശ്വാസവും തകർക്കുകയും ചെയ്യുന്നു.
4. മാനിപ്പുലേഷൻ
വിക്ടിമിന്റെ വൾനറബിലിറ്റീസ് നന്നായറിയുന്ന അബ്യൂസർ വിക്ടിമിൽ ഗിൽറ്റ് ഫീൽ ഉണ്ടാക്കുന്നു. എല്ലാ പ്രശ്നങ്ങൾക്കും കാരണം താൻ തന്നെയാണെന്നു വിക്റ്റിമിന് തോന്നാൻ തക്ക എല്ലാ തന്ത്രവും ഉം അബ്യൂസർ ഉപയോഗിക്കുന്നു.
5. ഗ്യാസ്‌ലൈറ്റിങ്
വിക്ടിമിനെ മാനസികമായി മാനിപ്പുലേറ്റ് ചെയ്യുന്ന ഘട്ടം. വിക്ടിമിൽ തന്റെ ചിന്തകളും, യാഥാർഥ്യ ബോധവും തെറ്റാണെന്ന രീതിയിൽ കൺഫ്യൂഷൻ ഉണ്ടാക്കി അവരുടെ മാനസിക നില വരെ തെറ്റിക്കുക, അതു വഴി വിക്ടിമിനെ dependent ആക്കുക. പാർട്ട്ണറില്‍ അവർ നോർമൽ അല്ലെന്ന സംശയം ജനിപ്പിക്കുക.
6. റെസിഗ്നേഷൻ & ഗിവിങ് അപ്പ്‌
ട്രോമ ബോണ്ടിന്റെ ഒരു ഘട്ടം വരുമ്പോൾ വിക്ടിം നിസ്സഹായ അവസ്ഥയിൽ എത്തുകയും അബ്യൂസറുടെ ആവശ്യങ്ങൾ അംഗീകരിക്കാൻ നിർബന്ധിതരാവുകയും ചെയ്യുന്നു. ഒരു സംഘർഷം ഒഴിവാക്കാൻ അബ്യൂസറുടെ കാര്യങ്ങൾക്ക് പ്രയോറിറ്റി കൊടുക്കുകയും അയാളിൽ പൂർണമായും ഡിപെൻഡന്റ് ആയിത്തീരികയും ചെയ്യുന്നു.
7. ലോസ് ഓഫ് സെൽഫ്
ഈ ഘട്ടത്തിൽ എത്തുമ്പോഴേക്കും അബ്യൂസർ വിക്ടിമിനെ പൂർണമായും അയാളുടെ സോഷ്യൽ സർക്കിളിൽ നിന്നും, സപ്പോർട്ട് സിസ്റ്റത്തിൽ നിന്നെല്ലാം ഐസൊലേറ്റ് ചെയ്തിട്ടുണ്ടാകും. വിക്ടിമിന്റെ ഐഡന്റിറ്റിയെ തന്നെ abuser കീഴ്‌പ്പെടുത്തുന്നു. സപ്പോർട്ട് സിസ്റ്റം ആയിട്ടുള്ള സുഹൃത്തുക്കളെയും ബന്ധങ്ങളേയുമെല്ലാം abuser ഏത് വിധേനയും നിങ്ങളിൽ നിന്ന് അകറ്റുന്നു.
8. അഡിക്ഷൻ ടു ദി സൈക്കിൾ
ഓരോ അബ്യൂസിനു ശേഷവും തന്ത്രപരമായി , അബ്യൂസർ നടത്തുന്ന മാപ്പു പറച്ചിലും, ഉറപ്പു നൽകലുമെല്ലാം വീണ്ടും കാര്യങ്ങൾ ശരിയാകും എന്ന ഫേക്ക് ഹോപ്പ് വിക്ടിമിന് നല്കുന്നു. ഫിയർ ഓഫ് അബാൻഡെൻമെന്റ് ഈ ബോണ്ടിൽ തുടരാൻ വിക്ടിമിന് കാരണമാകുന്നു. പിന്നീട് ആത്മാഭിമാനവും confidenceഉം നഷ്ടപ്പെട്ട ഇര താൻ ഈ അപമാനങ്ങൾക്കും അബ്യൂസുകൾക്കും അർഹനാണ്/ അർഹയാണ് എന്ന നിഗമനത്തിൽ എത്തുന്നു.
ദീർഘകാലം ട്രോമ ബോണ്ടിൽ കഴിഞ്ഞ ആൾക്ക് PTSD (post-traumatic stress disorder), ബ്രെയിൻ ഫോഗ് , പാനിക് അറ്റാക്ക്, എന്നിങ്ങനെയുള്ള അവസ്ഥകൾ ഉണ്ടാകാം.
പലപ്പോഴും ഇൻസെക്യൂരിറ്റീസ് ഉള്ള ആളുകൾ, ചെറുപ്പത്തിലേ അബ്യൂസിന് ഇരയായ ആളുകൾ, സെക്ഷ്വൽ അബ്യൂസ് ഇരകൾ, ഭൂതകാലത്തു ട്രോമ ഉണ്ടായിട്ടുള്ള ആളുകൾ, പ്രോപ്പർ ഇമോഷണൽ സപ്പോർട്ട് സിസ്റ്റം ലഭിക്കാത്ത ആളുകൾ ഒക്കെ ഇവരുടെ കൈയ്യിൽ ചെന്ന് പെടാനുള്ള സാഹചര്യം കൂടുതലാണ്.
ഇതിൽ നിന്ന് എങ്ങനെ രക്ഷപ്പെടാം?
ഓടി രക്ഷപ്പെടാൻ തോന്നും, പക്ഷെ സത്യത്തിൽ ഒരു mazeൽ അല്ലെങ്കിൽ ചിലന്തിവലയിൽ ഒക്കെ അകപ്പെട്ട പോലെയാണ് ഇതിൽ പെട്ടാലുള്ള അവസ്ഥ. രക്ഷപ്പെടാൻ എളുപ്പവഴിയില്ല. എന്നാൽ അസാധ്യമായ കാര്യവുമല്ല. ഒരു സപ്പോർട്ട് സിസ്റ്റം ഉണ്ടാക്കിയെടുക്കുക എന്നതാണ് പ്രധാനം. ഇതിനൊക്കെ ഒരു പ്രൊഫഷണൽ ഹെല്പ് എടുക്കുന്നത് വളരെ നന്നായിരിക്കും. കാരണം Dialectical Behavioral Therapy (DBT), Cognitive Behavioral Therapy (CBT) ( ഇവയൊക്കെ വിവിധങ്ങളായ സ്പീച് തെറാപ്പികളാണ്) എന്നിവയിലൂടെ വിക്ടിമിന് തന്റെ നഷ്ടപ്പെട്ട ആത്മാഭിമാനവും സോഷ്യൽ ലൈഫും, നഷ്ടപ്പെട്ടു എന്ന് കരുതിയ ജീവിതം തന്നെയും തിരിച്ചു പിടിക്കാനാവും.
എം. ടി. വാസുദേവൻ നായർ ഒരു നോവലിൽ സേതു എന്ന കഥാപാത്രത്തെക്കുറിച്ച് പറയുന്നൊരു വാചകമുണ്ട്. "സേതു എന്നും ഒരാളെ മാത്രമേ സ്നേഹിച്ചിട്ടുള്ളൂ, സേതുവിനെ മാത്രം". ഒരു നാർസിസിസ്റ്റ് എന്താണ് എന്ന് ചോദിച്ചാൽ, ഒറ്റ വാചകത്തിൽ ഇതിലും ഭംഗിയായി, അർത്ഥവത്തായി, പറയാനാവില്ല എന്ന് തോന്നുന്നു.
നമ്മുടെ ചുറ്റുമുള്ളവരിൽ പലരും, നാർസിസിസ്റ്റുകളുടെ അബ്യൂസിന് ഇരയായി ജീവിക്കുന്നവരുണ്ട്. സഹികെട്ട് ജീവിതം അവസാനിപ്പിക്കുന്നവരുണ്ട്. കഴിയുമെങ്കിൽ ഒന്നു ചേർത്തു പിടിക്കാൻ നോക്കുക, അവർ നിങ്ങളോട് അടുപ്പം കാണിക്കുന്നില്ല എന്നൊന്നും കരുതരുത്. കാരണം അവരുടെ നല്ല സൗഹൃദങ്ങളെ, സപ്പോർട്ട് സിസ്റ്റം ആകുമെന്ന് തോന്നുന്നവരെയൊക്കെ അവരുടെ ലൈഫിൽ നിന്ന് ഒഴിവാക്കുന്നതും, അവരെ ഒരു ഘട്ടം കഴിഞ്ഞാൽ, മാനിപ്പുലേഷനിലൂടെ ഏതാണ്ട് പൂർണമായും നിയന്ത്രിക്കുന്നതും അബ്യൂസറായ നാർസിസ്റ്റായിരിക്കും എന്നോർക്കുക. അപ്പോൾ നിങ്ങളും കരുതിയിരിക്കണം.
ഒരു പ്രൊഫഷണൽ ഹെല്പ് എടുക്കാനുള്ള അവസരം വിക്ടിമിന് ഉണ്ടാക്കിക്കൊടുക്കുക എന്നതാണ് പ്രാഥമികമായി ചെയ്യാനാവുക. പിന്നെ നിങ്ങളുള്‍പ്പെട്ട, നാർസിസിസ്റ്റ് വിലക്കിയ സപ്പോർട്ട് സിസ്റ്റം റീ ക്രീയേറ്റ് ചെയ്യുക, അവരോട് ഒരു നാർസിസിസ്റ്റിക് അബ്യൂസിന്റെ ഇരയാണ് നിങ്ങളുടെ കോമൺ സുഹൃത്ത്‌ എന്ന് പറഞ്ഞു മനസിലാക്കുക. ഇതിലൂടെ ചിലരെയെങ്കിലും നമുക്ക് ജീവിതത്തിലേക്ക് തിരികെ കൊണ്ടു വരാനാകും.
Reference
1. mayoclinic.org
2. psychologytoday.com
3. DSM 5
4. medicalnewstoday.com
6.choosingtherapy.com
