കോഴിക്കോട്: അൻപത് വർഷമായി എൽഡിഎഫ് മാത്രം അധികാരത്തിൽ വന്ന തദ്ദേശഭരണ സ്ഥാപനമാണ് കോഴിക്കോട് കോർപ്പറേഷൻ. ഇത്രയേറെ രാഷ്ട്രീയ കോലാഹലങ്ങൾ ഉണ്ടായിട്ടും ഇളക്കം തട്ടാതെ അതെങ്ങനെ നിലനിൽക്കുന്നു.
പാർലമെന്‍റിലേക്ക് കഴിഞ്ഞ 16 വർഷമായി കോൺഗ്രസിൻ്റെ എം. കെ. രാഘവൻ മാത്രമേ വിജയിച്ചിട്ടുള്ളു. കോർപ്പറേഷനു കീഴിലുള്ള ഭൂരിപക്ഷം ഡിവിഷനുകളിലും എം.കെ. രാഘവനു തന്നെയാണ് മേൽക്കൈ കിട്ടാറ്. രാഘവന്‍റെ തുടർ ജയങ്ങൾക്കിടയിൽ മൂന്നു കോർപ്പറേഷൻ തെരഞ്ഞെടുപ്പു നടന്നു. മൂന്നിലും എൽഡിഎഫ് തന്നെയാണ് ജയിച്ചത്. എൽഡിഎഫിന് ഭരണം നൽകുന്ന വാർഡുകളിൽ പോലും എം. കെ. രാഘവന് ഭൂരിപക്ഷം ലഭിക്കുന്നുണ്ട് എന്നിട്ടും ഭരണം പിടിക്കാൻ കഴിയുന്നില്ല.
യുഡിഎഫിന് ഭരണം പിടിക്കാൻ കഴിയുന്നില്ല എന്നു മാത്രമല്ല പിന്നോട്ടുപോവുകയും ചെയ്യുകയാണ്. 2010ലെ തെരഞ്ഞെടുപ്പിൽ കേരളമെങ്ങും യുഡിഎഫിന് അനുകൂലമായ തരംഗം ഉണ്ടായതാണ്. ആ തെരഞ്ഞെടുപ്പിൽ പോലും 75 ഡിവിഷനുകളിൽ 41ഉം നേടി എൽഡിഎഫ് ഭരണം പിടിച്ചു. യുഡിഎഫിന് കിട്ടിയത് 34 മാത്രം. ബിജെപിക്ക് അക്കൗണ്ട് തുറക്കാനും കഴിഞ്ഞില്ല. 2015ൽ യുഡിഎഫ് സീറ്റുകൾ 20 ആയി കുറഞ്ഞു. എൽഡിഎഫിന് 47 സീറ്റുകൾ കിട്ടി. ബിജെപി ഏഴു സീറ്റുകൾ നേടുകയും ചെയ്തു. എൽഡിഎഫിന് 2010ലെ 41, 2015ൽ 47 ആയി വർദ്ധിച്ചു. ബിജെപി ഒന്നുമില്ലായ്മയിൽ നിന്ന് ഏഴു ഡിവിഷനുകൾ കൂടി ജയിച്ചു. യുഡിഎഫ് 34ൽ നിന്ന് 20 ആയി കുറഞ്ഞു.
2020ൽ യുഡിഎഫ് 14 സീറ്റിലേക്കു വീഴുന്നതാണ് കണ്ടത്. എൽഡിഎഫ് ജയം 49 എണ്ണത്തിലേക്കുയർന്നു. എൻഡിഎയ്ക്ക് 2015ൽ ഉണ്ടായിരുന്നതുപോലെ ഏഴു ഡിവിഷൻ മാത്രം. 2010ലെ എൽഡിഎഫിന്‍റെ തിരിച്ചടിക്കാലത്തുപോലും കോഴിക്കോട് ഭരണം നേടിയ സാഹചര്യങ്ങളുണ്ട്. എൽഡിഎഫിന്‍റെ സ്ഥാനാർഥികൾക്ക് വോട്ടർമാർക്കിടയിലുള്ള സ്വാധീനമാണ് അതിനു കാരണം. പ്രാദേശികമായി ഇഴയടുപ്പം ഉണ്ടാക്കിയ നേതാക്കന്മാരാണ് ഈ വിജയം സാധ്യമാക്കുന്നത്. യുഡിഎഫിന് ഇതുവരെ നേരിടേണ്ടി വന്ന തിരിച്ചടികളുടെ കാരണവും അതു തന്നെയാണ്.
സംഘടനാ ശേഷി കൊണ്ടു മാത്രമാണ് എൽഡിഎഫ് ജയിക്കുന്നത് എന്നു പറയാൻ കഴിയില്ല. അങ്ങനെയെങ്കിൽ ആ മികവ് പാർലമെന്‍റ് തെരഞ്ഞെടുപ്പിലും കാണണം. കോഴിക്കോട് കോർപ്പറേഷനിലെ വാർഡുകളിൽ ലോക്സഭയിലേക്ക് എൽഡിഎഫിന് അങ്ങനെയൊരു മേൽക്കൈ കാണാനില്ല. പ്രാദേശികമായി അവതരിപ്പിക്കുന്ന സ്ഥാനാർഥികൾ തന്നെയാണ് ഇങ്ങനെയൊരു തുടർവിജയം സാധ്യമാക്കുന്നത്.
ഇപ്പോൾ എൽഡിഎഫിന് മറ്റൊരു ആനുകൂല്യം കൂടിയുണ്ട്. കോർപ്പറേഷനു കീഴിൽ വരുന്ന നാലു മണ്ഡലങ്ങളിലും എൽഡിഎഫ് എംഎൽഎമാർ തന്നെയാണ്. കോഴിക്കോട് നോർത്ത്, കോഴിക്കോട് സൌത്ത്, ബേപ്പൂർ, എലത്തൂർ മണ്ഡലങ്ങളിലെ ആ മേൽക്കൈകൂടി ഇത്തവണത്തെ തെരഞ്ഞെടുപ്പിൽ മേന്മയായി എൽഡിഎഫ് അവതരിപ്പിക്കുന്നു. പാർട്ടിഗ്രാമങ്ങളിലെ വിജയം പോലെയല്ല ഇത്. അരനൂറ്റാണ്ടായുള്ള കോർപ്പറേഷനിലെ ഈ വിജയം നല്ലൊരു സാമൂഹിക ശാസ്ത്ര പഠന വിഷയമാണ്.