പത്തനംതിട്ട: അടൂര്‍ പൊലീസ് സ്റ്റേഷന് അതിക്രമത്തില്‍ യൂത്ത് കോണ്‍ഗ്രസ് നേതാവ് ഫെനി നൈനാന്‍ പ്രതിയാകും. ശ്രീനാദേവി കുഞ്ഞമ്മയെയും പ്രതി ചേര്‍ത്തേക്കും. പ്രതികളെ നോട്ടീസ് നല്‍കി അറസ്റ്റ് ചെയ്‌തേക്കും. കേസില്‍ കുറ്റപത്രം ഉടന്‍ തയ്യാറാക്കും.
യൂട്യൂബര്‍ രാജന്‍ ജോസഫ് അറസ്റ്റിലായ ദിവസം ശ്രീനാദേവി കുഞ്ഞമ്മയടക്കമുള്ള യൂത്ത് കോണ്‍ഗ്രസ് നേതാക്കള്‍ പൊലീസ് സ്റ്റേഷന് അകത്തെത്തി ഭീഷണിപ്പെടുത്തുന്നതിന്റെയും, ജീപ്പില്‍ നിന്ന് ഇറക്കുന്നതിനിടെ തന്നെ രാജന്‍ ജോസഫിനെ മര്‍ദിക്കുന്നതിന്റെയും ദൃശ്യങ്ങള്‍ പുറത്തുവന്നിരുന്നു. ഈ ദൃശ്യങ്ങള്‍ ചര്‍ച്ചയായതോടെയാണ് ഇവര്‍ക്കെതിരായ നടപടികള്‍ വേഗത്തിലാക്കാന്‍ പൊലീസ് ഒരുങ്ങുന്നത്.
മൂന്ന് മാസം മുമ്പാണ് സംഭവം നടന്നത്. കേസില്‍ അന്ന് എഫ്‌ഐആര്‍ ഇട്ടിരുന്നുവെങ്കിലും തുടര്‍ നടപടികള്‍ ഉണ്ടായിരുന്നില്ല. കണ്ടാലറിയാവുന്ന 20 പേര്‍ക്കെതിരെ എന്ന് മാത്രമാണ് എഫ്‌ഐആറില്‍ ഉണ്ടായിരുന്നത്. ആരുടെയും പേര് രേഖപ്പെടുത്തിയിരുന്നില്ല.
സംഭവം നടക്കുന്ന ദിവസം തന്നെ ഇതുമായി ബന്ധപ്പെട്ട മൊബൈലില്‍ ചിത്രീകരിച്ച ദൃശ്യങ്ങള്‍ പുറത്തുവന്നിരുന്നു. എന്നാല്‍ അത് കണക്കിലെടുത്തും നടപടി ഉണ്ടായില്ല. തുടര്‍ന്ന് രാജന്‍ ജോസഫിനെ ജയിലില്‍ എത്തിച്ച ശേഷം പൊലീസിന്റെ സാന്നിധ്യത്തില്‍ ഭീഷണിപ്പെടുത്തുന്ന ദൃശ്യങ്ങളാണ് വലിയ തോതില്‍ ചര്‍ച്ചയായത്.