തിരുവനന്തപുരം: രാഹുല് മാങ്കൂട്ടത്തിലിനെതിരെ വീണ്ടും ബലാത്സംഗ പരാതിയുമായി മറ്റൊരു പെണ്കുട്ടി കൂടി രംഗത്ത്. ഹോട്ടൽ മുറിയില് കയറി ക്രൂരമായി പീഡിപ്പിച്ചെന്നാണ് കോണ്ഗ്രസ് നേതൃത്വത്തിന് പരാതി നല്കിയത്. സംസ്ഥാനത്തിന് പുറത്തു താമസിക്കുന്ന 23കാരിയാണ് പരാതി നല്കിയത്.
രാഹുല് ഗാന്ധി, പ്രിയങ്ക ഗാന്ധി, സണ്ണി ജോസഫ് എന്നിവര്ക്കാണ് പെണ്കുട്ടി പരാതി നല്കിയത്. വിവാഹ വാഗ്ദാനം നല്കി ബന്ധം സ്ഥാപിച്ച് ക്രൂരമായി ബലാത്സംഗം ചെയ്തെന്നാണ് പെണ്കുട്ടിയുടെ പരാതി. മുറിയില് വച്ച് ക്രൂരമായി ആക്രമിച്ച് ശരീരമാകെ മുറിവേല്പ്പിച്ചു. മാനസികമായും ശാരീരികമായും ക്രൂരപീഡനം നേരിട്ടെന്നും പെണ്കുട്ടി പരാതിയിൽ പറയുന്നു.
ആദ്യ ആക്രമണത്തിന് ശേഷം രാഹുല് വിവാഹ വാഗ്ദാനം പിന്വലിച്ചു. ഒരു മാസത്തിന് ശേഷം വീണ്ടും മെസേജ് അയച്ചു തുടങ്ങി. ഗര്ഭിണിയാക്കുമെന്ന് രാഹുല് തന്നോടും പറഞ്ഞെന്നും പെണ്കുട്ടി പറഞ്ഞു. പരാതിയുടെ പകര്പ്പ് ന്യൂസ് മലയാളത്തിന് ലഭിച്ചു.
ഇന്സ്റ്റഗ്രാം മുഖേനായാണ് രാഹുല് പെണ്കുട്ടിയോട് സൗഹൃദം സ്ഥാപിച്ചത്. അതിന് ശേഷം ഫോണ് നമ്പര് വാങ്ങി. പിന്നാലെ തന്നെ വിവാഹം കഴിക്കണമെന്ന് ആഗ്രഹമുണ്ടെന്നടക്കം പറയുന്നു. വിവാഹ വാഗ്ദാനം ആവർത്തിച്ചതോടെ പെൺകുട്ടി വീട്ടുകാരോട് കാര്യം പറഞ്ഞു. രാഷ്ട്രീയക്കാരനായ ഒരാളെ വിവാഹം കഴിക്കുന്നതിനോടുള്ള എതിര്പ്പ് പെണ്കുട്ടിയുടെ വീട്ടുകാര് അറിയിച്ചു.
പിന്നീട് രാഹുല് യൂത്ത് കോണ്ഗ്രസ് അധ്യക്ഷനായി തെരഞ്ഞെടുക്കപ്പെട്ടപ്പോഴാണ് വീട്ടുകാര് സമ്മതിച്ചതെന്നും ഇക്കാര്യം രാഹുലിനെ അറിയിച്ചപ്പോൾ അടുത്ത അവധിക്കാലത്ത് വീട്ടുകാരുമായി വരാം എന്ന് രാഹുൽ ഉറപ്പു നൽകിയെന്നും പരാതിയില് പറയുന്നു.
ശേഷം പെണ്കുട്ടി നാട്ടിലെത്തിയപ്പോള് സ്വകാര്യമായി കാണണമെന്ന് രാഹുൽ അറിയിച്ചു. തുടർന്ന് പെണ്കുട്ടിയെ കാറില് ഒരു ഹോം സ്റ്റേയില് കൊണ്ടു പോയി അതിക്രൂരമായി പീഡിപ്പിച്ചെന്നാണ് പരാതിയില് പറയുന്നത്. രാഹുല് മാങ്കൂട്ടിത്തിലിനൊപ്പം ഉണ്ടായിരുന്നത് സുഹൃത്തായ ഫെന്നി നൈനാന് ആണെന്നും പരാതിയില് പറയുന്നു.