തിരുവനന്തപുരം: കോടതി മുൻകൂർ ജാമ്യം നിഷേധിച്ചതിന് പിന്നാലെ ജയിലിലെ നിരാഹാര സമരവും അവസാനിപ്പിച്ച് രാഹുൽ ഈശ്വർ. ആഹാരം കഴിക്കാമെന്ന് ജയിൽ അധികൃതരെ അറിയിച്ചു. അതിജീവിതയെ അധിക്ഷേപിച്ച കേസിലെ ജാമ്യാപേക്ഷ തിരുവനന്തപുരം ജുഡിഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി തള്ളിയതോടെ അപകീർത്തികരമായ പോസ്റ്റുകൾ പിൻവലിക്കാമെന്ന് നേരത്തെ അറിയിച്ചിരുന്നു. ഇതിനുപിന്നാലെയാണ് ജയിലിലെ നിരാഹാര സമരവും അവസാനിപ്പിക്കാമെന്ന് രാഹുൽ ഈശ്വർ സമ്മതിച്ചത്. കേസിൽ രാഹുലിനെ കസ്റ്റഡിയിൽ വാങ്ങുന്നതിന് പൊലീസ് കോടതിയിൽ അപേക്ഷ നൽകിയിട്ടുണ്ട്.
ഈ മാസം 10ന് രാഹുലിനെ കോടതിയിൽ ഹാജരാക്കണമെന്നും നിർദേശമുണ്ട്. ഇതുവരെ അന്വേഷണം നടന്നില്ലെന്നും പ്രതിയുടെ നിസഹകരണവും കോടതി ചൂണ്ടിക്കാട്ടിയിരുന്നു. അതേസമയം, താൻ തെറ്റൊന്നും ചെയ്തിട്ടില്ല, അതിജീവിതയെ അധിക്ഷേപിച്ചിട്ടില്ലെന്നുമാണ് രാഹുൽ കോടതിയെ അറിയിച്ചത്. ഇനി കുറ്റകൃത്യം ആവർത്തിക്കില്ലെന്നും അതിജീവിതകൾക്കെതിരെ ഇനി പോസ്റ്റിടില്ലെന്നും ഇട്ടതെല്ലാം പിൻവലിച്ചുവെന്നും രാഹുൽ ഈശ്വർ കോടതിയെ അറിയിച്ചിട്ടുണ്ട്. ക്ലൗഡിൽ നിന്ന് പിൻവലിക്കാമെന്നും രാഹുൽ അറിയിച്ചു.
എന്നാൽ കേസുമായി രാഹുൽ സഹകരിച്ചിട്ടില്ലെന്നായിരുന്നു പൊലീസ് കോടതിയെ അറിയിച്ചത്. ജാമ്യാപേക്ഷ പരിഗണിക്കവെ സൈബർ പൊലീസ് കസ്റ്റഡി അപേക്ഷ നൽകിയിരുന്നു. ജാമ്യം നൽകിയാൽ പ്രതി കുറ്റം ആവർത്തിക്കുമെന്ന് പ്രോസിക്യൂഷനും കോടതിയെ അറിയിക്കുകയായിരുന്നു. നിരാഹാരമിരുന്നതിനാൽ ചോദ്യം ചെയ്യാൻ കഴിഞ്ഞില്ല. തെരഞ്ഞെടുപ്പ് ഡ്യൂട്ടിയായതിനാൽ 10ന് കസ്റ്റഡിയിൽ വേണം, ഫോണും ലാപ്ടോപ്പിന്റെ പാസ് വേർഡും നൽകിയില്ല, ഫോൺ വീണ്ടെടുക്കുന്നതിനിടക്കം കസ്റ്റഡി വേണമെന്നും പൊലീസ് കോടതിയെ അറിയിച്ചു.