തിരുവനന്തപുരം: വ്യാജവാർത്ത പ്രചരണത്തിന് എതിരെ നിയമനടപടികൾ സ്വീകരിക്കുമെന്ന് കോൺഗ്രസ് നേതാവ് വി.എസ്. ശിവകുമാർ. ശബരിമല സ്വർണക്കൊള്ള കേസിൽ അറസ്റ്റിലായ എസ്. ശ്രീകുമാർ വി.എസ്. ശിവകുമാറിന്റെ സഹോദരനാണെന്ന വാർത്ത പ്രചരിപ്പിച്ചതിലാണ് നടപടിക്കൊരുങ്ങുന്നത്. സിപിഐഎം നേതാവ് കെ.എസ്. അരുൺ കുമാർ അടക്കമുള്ളവർ ഈ വ്യാജ വാർത്ത സാമൂഹ്യ മാധ്യമങ്ങളിലൂടെ പ്രചരിപ്പിച്ചിരുന്നു. വ്യാജ വാർത്തയ്ക്കെതിരെ നിയമനടപടി സ്വീകരിക്കുമെന്ന് വി.എസ്. ശിവകുമാർ ഫേസ്ബുക്കിൽ കുറിച്ചു.
ഫേസ്ബുക്ക് പോസ്റ്റിൻ്റെ പൂർണരൂപം:
ശബരിമല സ്വർണ്ണക്കളവ് കേസിൽ സിപിഎം നേതാക്കളും അവരുമായി ബന്ധമുള്ളവരും ഒന്നിന് പുറകെ ഒന്നൊന്നായി ജയിലിലേക്ക് മാർച്ച് ചെയ്യുന്നതിന്റെ നാണക്കേട് മറയ്ക്കാൻ അറസ്റ്റിലാകുന്ന ഓരോരുത്തരെയും വി എസ് ശിവകുമാറിന്റെ സഹോദരനാക്കി വ്യാജ വാർത്ത പ്രചരിപ്പിക്കുന്ന സിപിഎമ്മിന്റെ നെറികേടിനെതിരെ നിയമ നടപടി സ്വീകരിക്കും .
ഇന്ന് അറസ്റ്റിലായ ദേവസ്വം അഡ്മിനിസ്ട്രേറ്റർ ശ്രീകുമാറിനെയാണ് അവസാനമായി സിപിഎം എന്റെ സഹോദരനാക്കിയിരിക്കുന്നത്. ശ്രീകുമാർ സി ഐ ടി യൂ ശബരിമല യൂണിയൻ നേതാവാണ്.ഇത്തരം വ്യാജപ്രചാരണങ്ങൾ കൊണ്ട് അയ്യപ്പന്റെ സ്വർണ്ണം മോഷ്ടിച്ചതിന്റെ പാപക്കറ മായ്ക്കാനാവില്ല എന്ന് നിങ്ങളെ ഓർമ്മിപ്പിക്കുകയാണ്..!
എനിക്കെതിരെ വ്യാജ പ്രചാരണം നടത്തിയ അരുൺ കുമാറിനും മറ്റുള്ളവർക്കും എതിരെയുള്ള നിയമനടപടികളുമായി മുന്നോട്ട് പോകും.