ന്യൂഡൽഹി: 2020ലെ ഡൽഹി ഗൂഢാലോചനാ കേസിൽ ജയിലിൽ കഴിയുന്ന ഷർജീൽ ഇമാമിന് പത്ത് ദിവസത്തെ ഇടക്കാല ജാമ്യം അനുവദിച്ച് ഡൽഹി കോടതി. മാർച്ച് 20 മുതൽ 30 വരെയാണ് ജാമ്യം അനുവദിച്ചത്. കുടുംബത്തിലെ വിവാഹത്തിൽ പങ്കെടുക്കുന്നതിന് ആറ് ആഴ്ചത്തെ ജാമ്യം ആവശ്യപ്പെട്ട് ഷർജീൽ സമർപ്പിച്ച ഹർജിയിൽ അഡീഷണൽ സെഷൻ ജഡ്ജ് സമീർ ബാജ്പേയി ആണ് വിധി പ്രഖ്യാപിച്ചത്.
53 പേർ മരിക്കുകയും 700ൽ അധികം പേർക്ക് പരിക്കേൽക്കുകയും ചെയ്ത 2020ലെ ഡൽഹി കലാപ കേസിലെ കുറ്റാരോപിതനാണ് ഷർജീൽ ഇമാം.
ജനുവരിയിൽ സുപ്രീം കോടതി ഷർജീലിനും ഉമർ ഖാലിദിനും ജാമ്യം നിഷേധിച്ചിരുന്നു. പ്രഥമദൃഷ്ട്യാ കുറ്റകൃത്യം നിലനിൽക്കുമെന്നായിരുന്നു സുപ്രീം കോടതി നിരീക്ഷണം. അതേ സമയം, ഗൾഫിഷ ഫാത്തിമ, മീരാൻ ഹൈദർ, ഷിഫ ഉർ റഹ്മാൻ, മുഹമ്മദ് സലീം ഖാൻ, ഷദാബ് അഹമ്മദ് എന്നീ അഞ്ച് പേർക്ക് സുപ്രീം കോടതി ജാമ്യം നൽകിയിരുന്നു. യുഎപിഎ അടക്കമുള്ള കുറ്റങ്ങളാണ് ഇവർക്കെതിരെ ചുമത്തിയിട്ടുള്ളത്.
