ഇന്ത്യ-യുഎസ് വ്യാപാര കരാർ നിലവിൽ വന്നതോടെ റഷ്യൻ എണ്ണ വാങ്ങുന്നതിൽ നിന്ന് താൽക്കാലികമായി പിൻമാറി ഇന്ത്യൻ എണ്ണക്കമ്പനികൾ. ഭാരത് പെട്രോളിയം, ഇന്ത്യൻ ഓയിൽ, റിലയൻസ് തുടങ്ങിയ പ്രമുഖ കമ്പനികൾ ഇതുവരെ മാർച്ച്, ഏപ്രിൽ മാസത്തെ ഓർഡറുകൾ നൽകിയിട്ടില്ല. മാർച്ചിലേക്ക് ഷെഡ്യൂൾ ചെയ്തിട്ടുള്ള എണ്ണ വിതരണം മാത്രമേ ഇനി ഉണ്ടാവുകയുള്ളൂ.
ഇന്ത്യ-യു എസ് വ്യാപാര കരാറിന് പിന്നാലെയാണ് എണ്ണക്കമ്പനികളുടെ പിന്മാറ്റം. വ്യാപാര കരാറിനെക്കുറിച്ചുള്ള യുഎസ്-ഇന്ത്യ പ്രസ്താവനയിൽ റഷ്യൻ എണ്ണയെക്കുറിച്ച് പരാമർശിച്ചിട്ടില്ലെങ്കിലും, റഷ്യൻ എണ്ണ ഇറക്കുമതിക്ക് ഇന്ത്യയ്ക്ക് മേൽ ഏർപ്പെടുത്തിയ 25% തീരുവ ഡൊണാൾഡ് ട്രംപ് പിൻവലിച്ചിരുന്നു.
സ്വകാര്യ റിഫൈനറായ നയാരയാണ് റഷ്യൻ എണ്ണ സ്ഥിരമായി വാങ്ങുന്ന കമ്പനികളിലൊന്ന്. പ്രതിദിനം 400,000 ബാരൽ ശേഷിയുള്ള റിഫൈനറിക്ക് റഷ്യൻ എണ്ണയെ മാത്രമാണ് അവർ ആശ്രയിക്കുന്നത്. ജൂലൈയിൽ യൂറോപ്യൻ യൂണിയൻ റിഫൈനറിന് അനുമതി നൽകിയതിനെത്തുടർന്ന് മറ്റ് ക്രൂഡ് ഓയിൽ വിൽപ്പനക്കാർ പിന്മാറിയതിനാൽ റഷ്യൻ എണ്ണ വാങ്ങുന്നത് തുടരാൻ നയാരയെ മാത്രം അനുവദിച്ചേക്കുമെന്നാണ് വിവരം.
അതേസമയം, റഷ്യയിൽ നിന്നുള്ള എണ്ണ ഇറക്കുമതി നിർത്തലാക്കാനുള്ള പദ്ധതികൾ ഇന്ത്യ ഇതുവരെ പ്രഖ്യാപിച്ചിട്ടില്ല.2022-ൽ റഷ്യ യുക്രെയ്ൻ ആക്രമിച്ചതിനുശേഷമാണ് റഷ്യൻ കടൽമാർഗമുള്ള എണ്ണയുടെ ഏറ്റവും വലിയ ഇറക്കുമതി നടത്തുന്ന രാജ്യമായി ഇന്ത്യ മാറിയത്.റഷ്യയുടെ ഊർജമേഖലയ്ക്ക് ഉപരോധം ഏർപ്പെടുത്തിയ പാശ്ചാത്യ രാജ്യങ്ങളിൽ നിന്ന് ഇത് വൻതോതിൽ പ്രതിഷേധം ഉയരുന്നതിന് കാരണമായിരുന്നു.
