ഡൽഹി: രാജ്യത്തെ മഹത്തായ ജനാധിപത്യത്തെ ബിജെപി നയിക്കുന്ന സർക്കാർ തകർക്കുകയാണെന്നും വോട്ട് ചോരിയേക്കാൾ വലിയ ദേശവിരുദ്ധ പ്രവർത്തനമില്ലെന്നും ലോക്സഭയിൽ ആഞ്ഞടിച്ച് പ്രതിപക്ഷ നേതാവ് രാഹുൽ ഗാന്ധി. ലോക്സഭയിലെ എസ്ഐആർ ചർച്ചയിൽ തെരഞ്ഞെടുപ്പ് കമ്മീഷനേയും കോൺഗ്രസ് കടന്നാക്രമിച്ചു. ജനാധിപത്യം നശിപ്പിക്കുകയാണെന്ന് കേന്ദ്ര സർക്കാരിനുമറിയാം പ്രതിപക്ഷത്തിനും അറിയാം. അതേസമയം, കേന്ദ്ര തെരഞ്ഞെടുപ്പ് കമ്മീഷന് ഇതോടൊന്നും മിണ്ടാട്ടമില്ലാത്ത സാഹചര്യമാണെന്നും രാഹുൽ പാർലമെൻ്റിൽ വിമർശിച്ചു.
"മൂന്ന് ചോദ്യങ്ങൾ ചോദിക്കാൻ ഞാൻ ആഗ്രഹിക്കുന്നു. ഇന്ത്യയുടെ ജനാധിപത്യത്തെ തകർക്കാൻ ബിജെപി തെരഞ്ഞെടുപ്പ് കമ്മീഷനെ നയിക്കുകയും ഉപയോഗിക്കുകയും ചെയ്യുന്നുവെന്ന് ഇതിലൂടെ വ്യക്തമാകും. എന്തുകൊണ്ടാണ് ചീഫ് ജസ്റ്റിസിനെ തെരഞ്ഞെടുപ്പ് കമ്മീഷണറുടെ സെലക്ഷൻ പാനലിൽ നിന്ന് നീക്കം ചെയ്തത്? എന്താണ് അതിനുള്ള പ്രചോദനം? മുഖ്യ തെരഞ്ഞെടുപ്പ് കമ്മീഷണറെയും തെരഞ്ഞെടുപ്പ് കമ്മീഷനെയും നിയന്ത്രിക്കുന്നതിൻ്റെ ഫലം എന്താണ്? ഒന്നാമതായി പ്രധാനമന്ത്രിക്കായി പ്രത്യേകം തയ്യാറാക്കിയ ഒരു കൂട്ടം തെരഞ്ഞെടുപ്പ് പ്രചാരണങ്ങൾ നമുക്കുണ്ട്. രണ്ടാമതായി ഹരിയാനയിലെ വോട്ടർ പട്ടികയിൽ 22 തവണ പ്രത്യക്ഷപ്പെടുന്ന ഒരു ബ്രസീലിയൻ സ്ത്രീ നമുക്കുണ്ട്," രാഹുൽ പറഞ്ഞു.
"രണ്ടാമതായി, ഹരിയാനയിലെ വോട്ടർ പട്ടികയിൽ 22 തവണ പ്രത്യക്ഷപ്പെട്ട ഒരു ബ്രസീലിയൻ സ്ത്രീ നമുക്കുണ്ട്. മാത്രമല്ല, ഹരിയാനയിലെ ഒരു മണ്ഡലത്തിൽ 200-ലധികം തവണ പേര് പ്രത്യക്ഷപ്പെട്ട ഒരു സ്ത്രീയുമുണ്ട്. ഹരിയാനയിലെ തിരഞ്ഞെടുപ്പ് മോഷ്ടിക്കപ്പെട്ടതാണെന്നും ഇന്ത്യൻ തിരഞ്ഞെടുപ്പ് കമ്മീഷൻ വോട്ട് ചോറി ഉറപ്പാക്കിയതാണെന്നും വളരെ വ്യക്തമാണ്, സംശയമില്ലാതെ ഞാൻ തെളിയിച്ചിട്ടുണ്ട്. ബിഹാറിലെ തീവ്ര വോട്ടർ പട്ടിക പരിഷ്കരണത്തിന് ശേഷം, ബിഹാറിലെ വോട്ടർ പട്ടികയിൽ 1.2 ലക്ഷം ഡ്യൂപ്ലിക്കേറ്റ് ഫോട്ടോകൾ നിലനിൽക്കുന്നത് എന്തുകൊണ്ടാണ്? നിങ്ങൾ വോട്ടിംഗ് ലിസ്റ്റ് പരിഷ്കരിച്ചെങ്കിൽ ബീഹാറിൽ 1.2 ലക്ഷം വ്യാജവോട്ടർമാർ വരുന്നത് എന്തുകൊണ്ടാണ്? ഇതെല്ലാം നേരായ ചോദ്യങ്ങളാണ്. എന്നാൽ തെരഞ്ഞെടുപ്പ് കമ്മീഷന് ഈ ചോദ്യങ്ങൾക്ക് ഉത്തരമില്ല," രാഹുൽ വിമർശിച്ചു.
"തെരഞ്ഞെടുപ്പ് പരിഷ്കരണം വളരെ ലളിതമാണ്, പക്ഷേ ബിജെപി സർക്കാർ അത് ചെയ്യാൻ ആഗ്രഹിക്കുന്നില്ല. തെരഞ്ഞെടുപ്പ് പരിഷ്കരണത്തിന് എന്താണ് വേണ്ടത്? തെരഞ്ഞെടുപ്പിന് ഒരു മാസം മുമ്പ് എല്ലാ രാഷ്ട്രീയ പാർട്ടികൾക്കും മെഷീൻ റീഡബിൾ വോട്ടർ പട്ടിക നൽകുക. തെരഞ്ഞെടുപ്പ് കമ്മീഷണറെ എന്ത് വേണമെങ്കിലും ചെയ്യാൻ അനുവദിക്കുന്ന നിയമം പിൻവലിക്കണം. ഈ നിയമം അവരെ രക്ഷപ്പെടാൻ അനുവദിക്കുമെന്ന് തെരഞ്ഞെടുപ്പ് കമ്മീഷണർക്ക് തോന്നിയേക്കാം. എന്നാൽ, ഞാൻ ഒരുകാര്യം അവരെ ഓർമിപ്പിക്കട്ടെ, ഞങ്ങൾ ഭരണത്തിൽ വന്നാൽ ഈ നിയമം മാറ്റും, അതും മുൻകാല പ്രാബല്യത്തോടെ. ഞങ്ങൾ ഉറപ്പായും നിങ്ങളെ തേടിവരും," രാഹുൽ പറഞ്ഞു.
"രാജ്യത്തിൻ്റെ സ്ഥാപന ചട്ടക്കൂട് പിടിച്ചെടുക്കുക എന്നതായിരുന്നു ആർഎസ്എസിൻ്റെ പദ്ധതി. അതിന് മൂന്ന് മാർഗ്ഗങ്ങളാണ് അവർ തെരഞ്ഞെടുത്തത്. ആദ്യം അവർ വിദ്യാഭ്യാസ സമ്പ്രദായം കൈപ്പിടിയിലാക്കി. പുതിയ വൈസ് ചാൻസലർമാരെ നിയമിക്കുന്നത് മെറിറ്റ്, കഴിവ്, ശാസ്ത്രീയ മനോഭാവം എന്നിവയുടെ അടിസ്ഥാനത്തിലല്ല. മറിച്ച് അദ്ദേഹം ഒരു പ്രത്യേക സംഘടനയിൽപ്പെട്ട ആളാണെന്ന വസ്തുതയുടെ അടിസ്ഥാനത്തിലാണ്. രണ്ടാമത്തെ വഴിയിലൂടെയും അവർ ജനാധിപത്യത്തെ നശിപ്പിക്കുകയാണ്. രാജ്യത്തെ രഹസ്യാന്വേഷണ ഏജൻസികളായ സിബിഐ, ഇഡി, ആദായനികുതി വകുപ്പ് എന്നിവയെ കൈപ്പിടിയിൽ ആക്കുന്നതിലൂടെയാണ്. ആർഎസ്എസിൻ്റെ പ്രത്യയശാസ്ത്രത്തെ അനുകൂലിക്കുകയും, പ്രതിപക്ഷത്തെയും ആർഎസ്എസിനെ എതിർക്കാൻ തീരുമാനിക്കുന്ന ആരെയും ആക്രമിക്കുകയും ചെയ്യുന്ന ഒരുകൂട്ടം ഉദ്യോഗസ്ഥരെ വ്യവസ്ഥാപിതമായി സ്ഥാപിക്കാനാണ് അവർ ലക്ഷ്യമിടുന്നത്," രാഹുൽ വിമർശിച്ചു.
"മൂന്നാമത്തെ മാർഗമെന്നത്, നമ്മുടെ രാജ്യത്തെ തെരഞ്ഞെടുപ്പ് സംവിധാനത്തെ നേരിട്ട് നിയന്ത്രിക്കുന്ന സ്ഥാപനമായ തിരഞ്ഞെടുപ്പ് കമ്മീഷനെ പിടിച്ചെടുക്കലാണ്. തെളിവില്ലാതെയല്ല ഞാൻ ഇത് പറയുന്നത്. തെരഞ്ഞെടുപ്പ് രൂപപ്പെടുത്താൻ അധികാരത്തിലുള്ളവരുമായി തെരഞ്ഞെടുപ്പ് കമ്മീഷൻ എങ്ങനെ ഒത്തുകളിക്കുന്നു എന്നതിന് മതിയായ തെളിവുകൾ ഞാൻ മുന്നോട്ട് വച്ചിട്ടുണ്ട്," രാഹുൽ ഗാന്ധി ചൂണ്ടിക്കാട്ടി.