ചണ്ഡീഗഡ്: മെഡിക്കൽ സ്റ്റോറിലൂടെ ലഹരിമരുന്ന് വിൽക്കുന്നത് ചോദ്യം ചെയ്ത ലഹരിവിരുദ്ധ പ്രവർത്തകനെ കടയുടമ വെടിവച്ചു കൊന്നു. പഞ്ചാബിലെ മാൻസയിൽ ബുധനാഴ്ച രാവിലെയാണ് സംഭവം. ലഹരിവിരുദ്ധ പ്രവർത്തകനായ പർവീന്ദർ സിങ് ജോട്ടയാണ് കൊല്ലപ്പെട്ടത്. മെഡിക്കൽ സ്റ്റോർ ഉടമയുമായുള്ള തർക്കം ഫേസ്ബുക്കിൽ തത്സമയം സംപ്രേഷണം ചെയ്യുന്നതിനിടെയാണ് പർവീന്ദറിന് വെടിയേറ്റത്. വെടിവെപ്പിന് പിന്നാലെ കടയുടമ സ്ഥലത്തുനിന്ന് രക്ഷപ്പെട്ടതായാണ് റിപ്പോർട്ട്.
ഏകദേശം അഞ്ച് മിനിറ്റ് ദൈർഘ്യമുള്ള വീഡിയോയിൽ പ്രായമായ ഒരാൾക്കൊപ്പമാണ് പർവീന്ദർ മെഡിക്കൽ സ്റ്റോറിലെത്തുന്നത്. തുടർന്ന് കടയുടമയുമായി ലഹരിമരുന്ന് വിൽപ്പനയെച്ചൊല്ലി വാക്കുതർക്കമുണ്ടായി. കടയുടമയുടെ കൈവശം തോക്കുള്ളതും ദൃശ്യങ്ങളിൽ കാണാം. "നിങ്ങൾ എന്തിനാണ് തോക്ക് കൈവശം വെച്ചിരിക്കുന്നത്? എന്നെ കൊല്ലാനാണോ? എങ്കിൽ കൊന്നോളൂ," എന്ന് പർവീന്ദർ കടയുടമയോട് ചോദിക്കുന്നതും വീഡിയോയിലുണ്ട്. പൊലീസിനെ വിളിക്കാനും കൂടുതൽ ആളുകളെ സ്ഥലത്തെത്തിക്കാനും കൂടെയുള്ള ആളോട് പർവീന്ദർ ആവശ്യപ്പെടുന്നുണ്ട്. മെഡിക്കൽ സ്റ്റോറിലെ സിസിടിവി ദൃശ്യങ്ങൾ കാണിക്കണമെന്നും അദ്ദേഹം ആവശ്യപ്പെട്ടു.
തുടർന്ന് തന്നിൽ നിന്നാണോ ലഹരി മരുന്ന് വാങ്ങിയതെന്ന് കടയുടമ പ്രായമായ ആളോട് ചോദിച്ചു. ലഹരിമരുന്ന് വാങ്ങിയതിന്റെ റെക്കോർഡിങ് കൈവശമുണ്ടെന്ന് പർവീന്ദർ മറുപടി നൽകി. ഏതാണ്ട് നാല് മിനിറ്റോളം നീണ്ട തർക്കത്തിനൊടുവിൽ കടയുടമ വെടിയുതിർക്കുകയായിരുന്നു. വെടിയേറ്റതോടെ പർവീന്ദറിൻ്റെ ഫോൺ താഴെ വീഴുകയും ഫേസ്ബുക്ക് ലൈവ് അവസാനിക്കുകയും ചെയ്തു. സംഭവത്തിന് ശേഷം കടയുടമ ഓടി രക്ഷപ്പെട്ടതായാണ് റിപ്പോർട്ട്.
വർഷങ്ങളായി മാൻസയിലും സമീപ പ്രദേശങ്ങളിലും ലഹരിയുടെ ഉപയോഗത്തിനും വിൽപ്പനയ്ക്കുമെതിരെ പ്രവർത്തിച്ചുവരികയായിരുന്നു പർവീന്ദർ. ലഹരിവിരുദ്ധ ഇടപെടലുകളിലൂടെയാണ് അദ്ദേഹം സമൂഹമാധ്യമങ്ങളിൽ ശ്രദ്ധ നേടിയത്. ഫേസ്ബുക്കിൽ 24,000ത്തോളം പേർ അദ്ദേഹത്തെ പിന്തുടരുന്നുണ്ട്. ലഹരി വിൽപ്പന ചോദ്യം ചെയ്യുന്നതിനിടെ നടന്ന കൊലപാതകം പ്രദേശത്ത് വലിയ ചർച്ച ആയിരിക്കുകയാണ്. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.