സോണിയ ഗാന്ധിയുടെ ആത്മകഥ വീണ്ടും വാർത്തകളിൽ നിറയുകയാണ്. ‘ബിലോങ്ങിങ്: എ ജേർണി ഓഫ് ലവ്’ എന്ന പുസ്തകത്തിന്റെ ആദ്യ പതിപ്പ് പരിചയപ്പെടുത്തി സോണിയ ഗാന്ധി രംഗത്തെത്തി. ഇന്ന് ഇൻസ്റ്റഗ്രാമിൽ പുതിയ അക്കൗണ്ട് ആരംഭിച്ച സോണിയ, ആദ്യ പോസ്റ്റായി പുസ്തകം കൈപ്പറ്റുന്ന വീഡിയോയാണ് പങ്കുവെച്ചത്. പ്രസാധനത്തിൽ നിന്ന് പെൻഗ്വിൻ റാൻഡം ഹൗസ് പിന്മാറിയതും പിന്നാലെ ഹാർപ്പർ കോളിൻസ് പ്രസാധനം ഏറ്റെടുത്തതുമടക്കമുള്ള രാഷ്ട്രീയ വിവാദങ്ങൾക്കിടെ ആത്മകഥയെക്കുറിച്ചുള്ള ആകാംക്ഷയും വർധിക്കുകയാണ്.
ഇൻസ്റ്റഗ്രാമിൽ സ്വന്തം പേരിൽ അക്കൗണ്ട് തുറന്ന സോണിയ ഗാന്ധി, പുസ്തകം കൈപ്പറ്റുന്ന വീഡിയോയാണ് ആദ്യ പോസ്റ്റായി പങ്കുവെച്ചത്. സ്നേഹത്തിന്റെയും കടമകളുടെയും നഷ്ടങ്ങളുടെയും ജീവിതത്തിൽ തന്റേതായ ഒരിടം കണ്ടെത്തിയതിന്‍റെ കഥയാണ് പുസ്തകമെന്ന് സോണിയ കുറിച്ചു. അരനൂറ്റാണ്ടിലേറെയായി ഇന്ത്യൻ രാഷ്ട്രീയത്തിന്റെ ഗതിവിഗതികൾ നിർണയിക്കുന്നതിൽ പങ്കുവഹിച്ച സോണിയ ഗാന്ധിയുടെ കുടുംബജീവിതവും രാഷ്ട്രീയ പ്രവേശനവും കോൺഗ്രസ് അധ്യക്ഷ പദവിയിലെ അനുഭവങ്ങളും തുറന്നുപറയുന്ന പുസ്തകമാണിത്.
ഹാർപ്പർ കോളിൻസ് ഇന്ത്യയാണ് ‘ബിലോങ്ങിങ്: എ ജേർണി ഓഫ് ലവ്’ പ്രസിദ്ധീകരിക്കുന്നത്. നവംബർ 10-ന് പുസ്തകം വിപണിയിലെത്തും. ആമസോൺ ഉൾപ്പെടെയുള്ള ഓൺലൈൻ പ്ലാറ്റ്‌ഫോമുകളിൽ പുസ്തകത്തിന്റെ പ്രീ-ഓർഡർ ഇതിനകം ആരംഭിച്ചുകഴിഞ്ഞു.പുസ്തകം പ്രകാശനത്തിന് എത്തും മുൻപ് തന്നെ രാഷ്ട്രീയ വിവാദങ്ങള്‍ക്ക് ഇടയാക്കിയിരുന്നു. തുടക്കത്തിൽ പുസ്തകം പ്രസിദ്ധീകരിക്കാൻ കരാർ ഒപ്പിട്ട പ്രമുഖ പ്രസാധകരായ 'പെൻഗ്വിൻ റാൻഡം ഹൗസ് ഇന്ത്യ' എഡിറ്റോറിയൽ മാറ്റങ്ങളെച്ചൊല്ലി അവസാന നിമിഷം പിന്മാറിയിരുന്നു.
പ്രധാനമന്ത്രി നരേന്ദ്ര മോദി, ആർഎസ്എസ്, ഇന്ത്യ-ചൈന അതിർത്തി തർക്കം തുടങ്ങിയ നിർണായക വിഷയങ്ങൾ പരാമർശിക്കുന്ന ഭാഗങ്ങൾ ഒഴിവാക്കാനുള്ള രാഷ്ട്രീയ സമ്മർദങ്ങളുടെ ഭാഗമായാണ് പെൻഗ്വിൻ പിന്‍മാറിയതെന്നായിരുന്നു കോൺഗ്രസിന്‍റെ ആരോപണം. ബാഹ്യസമ്മർദങ്ങളില്ലെന്നും കരാറിലെ സ്വാഭാവിക എഡിറ്റോറിയൽ തർക്കങ്ങൾ മാത്രമാണെന്നും വിശദീകരിച്ചായിരുന്നു പെൻഗ്വിൻ തടിയൂരിയത്. തുടർന്ന് ഹാർപ്പർ കോളിൻസ് ദൗത്യം ഏറ്റെടുക്കുകയായിരുന്നു.
പുസ്തകത്തിന്റെ ആദ്യ പതിപ്പ് സോണിയ ഗാന്ധി തന്നെ നേരിട്ട് പൊതുജനങ്ങൾക്ക് മുന്നിൽ പരിചയപ്പെടുത്തിയതോടെ ചർച്ചകൾ വീണ്ടും പുസ്തകത്തിന്റെ ഉള്ളടക്കത്തിലേക്ക് കേന്ദ്രീകരിക്കുകയാണ്. ഇറ്റലിയിലെ ഗ്രാമത്തിൽ നിന്നുള്ള ബാല്യകാലം മുതൽ രാജീവ് ഗാന്ധിയുടെ വേർപാടും അതിനുശേഷമുള്ള സുപ്രധാന രാഷ്ട്രീയ തീരുമാനങ്ങളും സോണിയ എങ്ങനെ പുസ്തകത്തിൽ കുറിച്ചിട്ടിരിക്കുന്നു എന്നറിയാനുള്ള ആകാംക്ഷയിലാണ് രാഷ്ട്രീയ കേന്ദ്രങ്ങളും സാഹിത്യലോകവും.