മുംബൈ: ഭുലേശ്വർരാജാ ഉത്സവത്തിൻ്റെ എഴുന്നള്ളിപ്പ് ചടങ്ങിനിടെ 22 അടി ഉയരമുള്ള ഗണപതി വിഗ്രഹം തകർന്നുവീണ് രണ്ട് പേർ മരിച്ചു. അപകടത്തിൽ കുട്ടികൾ ഉൾപ്പെടെ അഞ്ച് പേർക്ക് പരിക്കേറ്റു.
ഭുലേശ്വറിലെ ബലറാം മെർച്ചൻ്റ് റോഡിൽ രാത്രി പത്തു മണിയോടെയാണ് അപകടമുണ്ടായത്. ബൈക്കുള്ളയിൽ നിന്ന് ഘോഷയാത്രയായി കൊണ്ടുപോകുകയായിരുന്ന വിഗ്രഹം, പന്തലിലേക്ക് എത്തുന്നതിന് മുൻപാണ് റോഡിലേക്ക് വീണത്.
വിഗ്രഹം ഉറപ്പിച്ചിരുന്ന നട്ടുകളും ബോൾട്ടുകളും ഊരിപ്പോയതാണ് അപകടത്തിന് കാരണമായതെന്നാണ് വിവരം. അപകടത്തെ തുടർന്ന് മുംബൈ അഗ്നിരക്ഷാസേന, പൊലീസ്, ട്രാഫിക് പൊലീസ്, 108 ആംബുലൻസ് വിഭാഗം എന്നിവർ സ്ഥലത്തെത്തി അടിയന്തര രക്ഷാപ്രവർത്തനം നടത്തി. പരിക്കേറ്റവരെ സമീപത്തെ ആശുപത്രികളിൽ എത്തിച്ചെങ്കിലും രണ്ട് പേരുടെ ജീവൻ രക്ഷിക്കാനായില്ല.