നിർദിഷ്ട ശബരിമല വിമാനത്താവളത്തിനായുള്ള സ്ഥലമേറ്റെടുപ്പ് വിജ്ഞാപനത്തിനൊപ്പം വിശദമായ പദ്ധതിരേഖയും പുറത്തിറക്കും. കോടതി നിർദേശപ്രകാരമാണ് നടപടി. ഒരു മാസത്തിനുള്ളിൽ വിജ്ഞാപനവും പദ്ധതിരേഖയും പുറത്തിറക്കാനാണ് സർക്കാർ നീക്കം.
ശബരിമല ഗ്രീൻഫീൽഡ് വിമാനത്താവളത്തിനായി സർക്കാർ കണ്ടെത്തിയ ചെറുവള്ളി എസ്റ്റേറ്റിലെയും സ്വകാര്യഭൂമിയിലെയും 2750 ഏക്കർ വസ്തു ഏറ്റെടുക്കുന്നതിനുള്ള വിജ്ഞാപനം കോടതി റദ്ദാക്കിയതിനെ തുടർന്നാണ് പുതിയ വിജ്ഞാപനം ഇറക്കുന്നത്. 2023 ജനുവരി 23നായിരുന്നു സ്ഥലമേറ്റെടുപ്പ് സംബന്ധിച്ച പ്രാഥമിക വിജ്ഞാപനം പുറത്തിറക്കിയത്.
തുടർന്ന്, നടപടി ക്രമങ്ങളിൽ വീഴ്ചയുണ്ടെന്നും വിജ്ഞാപനത്തിനൊപ്പം പദ്ധതിരേഖ സമർപ്പിച്ചിട്ടില്ലെന്നും കോടതി ചൂണ്ടിക്കാട്ടുകയായിരുന്നു. ഇതിന്‍റെ അടിസ്ഥാനത്തിലാണ് പുതിയ വിജ്ഞാപനത്തിനൊപ്പം വിശദമായ പദ്ധതി രേഖകൂടി പുറത്തിറക്കാൻ സർക്കാർ തീരുമാനിച്ചത്. പദ്ധതിയുടെ ലക്ഷ്യങ്ങള്‍, സമയക്രമം, ഉറവിടം ബജറ്റ് എന്നവയുടെ വിശദ വിവരങ്ങള്‍ പദ്ധതി രേഖയിലുണ്ടാകും.