തിങ്കളാഴ്ച വടക്കുകിഴക്കൻ യുണൈറ്റഡ് സ്റ്റേറ്റ്സിലെ മേരിലാൻഡ് മുതൽ മെയ്ൻ വരെയുണ്ടായ ശക്തമായ മഞ്ഞുവീഴ്ചയെയും ഹിമപാതത്തേയും തുടർന്ന് ഗതാഗതം തടസ്സപ്പെടുകയും സ്കൂളുകളും കടകളും അടയ്ക്കുകയും ചെയ്തു. ഒരു ദശാബ്ദത്തിനിടയിലെ ഏറ്റവും ശക്തമായ കൊടുങ്കാറ്റാണിതെന്ന് കാലാവസ്ഥാ നിരീക്ഷകർ പറഞ്ഞു. മെട്രോപൊളിറ്റൻ സിറ്റിയുടെ വടക്കുകിഴക്കൻ ഭാഗങ്ങളിൽ 2 അടിയിൽ കൂടുതൽ കനത്തിൽ മഞ്ഞ് വീഴ്ചയുണ്ടായി. പ്രതികൂല കാലാവസ്ഥയെ തുടർന്ന് ഐക്യരാഷ്ട്രസഭ സുരക്ഷാ കൗൺസിൽ യോഗവും മാറ്റിവച്ചു. തുടർന്ന് ഉദ്യോഗസ്ഥർ പലയിടങ്ങളിലും അടിയന്തരാവസ്ഥ പ്രഖ്യാപിച്ചു.പലയിടങ്ങളിലും വൈദ്യുതി തടസവും നേരിട്ടു.
ന്യൂയോർക്ക് നഗരത്തിലെ സെൻട്രൽ പാർക്കിൽ 19 ഇഞ്ച് (48 സെന്റീമീറ്റർ) മഞ്ഞുവീഴ്ച രേഖപ്പെടുത്തി. റോഡ് ഐലൻഡിലെ വാർവിക്കിൽ ഇത് 3 അടി (91 സെന്റീമീറ്റർ) കവിഞ്ഞു. ന്യൂയോർക്ക്, ഫിലാഡൽഫിയ, മറ്റ് നഗരങ്ങൾ, നിരവധി സംസ്ഥാനങ്ങൾ എന്നിവിടങ്ങളിൽ അടിയന്തരാവസ്ഥ പ്രഖ്യാപിച്ചിട്ടുണ്ട്.
ഫ്ലൈറ്റ് ട്രാക്കിംഗ് വെബ്സൈറ്റായ ഫ്ലൈറ്റ്അവെയറിൻ്റെ റിപ്പോർട്ട് പ്രകാരം, തിങ്കളാഴ്ച അമേരിക്കയിലേക്കും പുറത്തേക്കുമുള്ള 5,600-ലധികം വിമാനങ്ങൾ റദ്ദാക്കി. ചൊവ്വാഴ്ച ഷെഡ്യൂൾ ചെയ്തിരുന്ന 2,000 വിമാനങ്ങൾ കൂടി റദ്ദാക്കി. ന്യൂയോർക്ക്, ന്യൂജേഴ്സി, ബോസ്റ്റൺ എന്നിവിടങ്ങളിലെ വിമാനത്താവളങ്ങളിൽ നിന്നുള്ള സർവീസുകളാണ് കൂടുതലും റദ്ദാക്കിയത്. ഏകദേശം 2,500 വിമാനങ്ങൾ വൈകുകയും ചെയ്തു.
റോഡ് ഐലൻഡിലെ ടിഎഫ് ഗ്രീൻ അന്താരാഷ്ട്ര വിമാനത്താവളം തിങ്കളാഴ്ച എല്ലാ പ്രവർത്തനങ്ങളും താൽക്കാലികമായി നിർത്തിവയ്ക്കുന്നതായി പ്രഖ്യാപിച്ചു. 1978 ലെ റെക്കോർഡ് തകർത്തുകൊണ്ട് 32.8 ഇഞ്ച് (83.3 സെന്റീമീറ്റർ) മഞ്ഞ് ഇവിടെ വീണതായി കാലാവസ്ഥാ സേവനം റിപ്പോർട്ട് ചെയ്തു.ചില പ്രദേശങ്ങളിൽ പൊതുഗതാഗതം സ്തംഭിച്ചു.
ശക്തമായ കാറ്റും കനത്തതും നനഞ്ഞതുമായ മഞ്ഞുവീഴ്ചയും മരങ്ങൾ ഒടിഞ്ഞുവീഴുന്നതിനും നീണ്ടുനിൽക്കുന്ന വൈദ്യുതി തടസങ്ങൾക്കും കാരണമാകുമെന്നും കാലാവസ്ഥാ നിരീക്ഷകർ മുന്നറിയിപ്പ് നൽകിയിട്ടുണ്ട്. സ്റ്റാറ്റൻ ഐലൻഡിലെ റെയിൽ സർവീസുകൾ നിർത്തിവച്ചത് ഒഴികെ, നേരത്തെയുണ്ടായ കാലതാമസങ്ങൾക്ക് ശേഷം സബ്വേ ലൈനുകൾ കൂടുതലും പ്രവർത്തനക്ഷമമാണെന്ന് മെട്രോപൊളിറ്റൻ ട്രാൻസ്പോർട്ടേഷൻ അതോറിറ്റി തിങ്കളാഴ്ച വൈകുന്നേരം അറിയിച്ചു.
ചൊവ്വാഴ്ച രാവിലെയുള്ള യാത്രയ്ക്ക് മുമ്പ് നഗരത്തിന്റെ വടക്കും കിഴക്കും ഉള്ള പ്രാന്തപ്രദേശങ്ങളിലേക്കുള്ള കമ്മ്യൂട്ടർ റെയിൽ സർവീസ് പരിമിതമായ സർവീസുകൾ പുനരാരംഭിക്കുമെന്നും എംടിഎ അറിയിച്ചു.