വിവാഹങ്ങൾ ഇന്ന് പലപ്പോഴും ആഢംബരം നിറഞ്ഞ ആഘോഷങ്ങളാണ്. വിവാഹചടങ്ങുകളുടെ മാറ്റ് കൂട്ടാൻ ഇവൻ്റ് മാനേജുമെൻ്റുകാർ വിവിധതരം പരീക്ഷണങ്ങൾക്ക് മുതിരാറുണ്ട്. ഭക്ഷണം, വസ്ത്രം, അലങ്കാരങ്ങൾ, തുടങ്ങി എല്ലാ മേഖലകളിലും പുതിയ മാറ്റങ്ങൾ പരീക്ഷിക്കാറുണ്ട്. അത്തരത്തിലൊരു മാറ്റത്തിൻ്റെ വീഡിയോ ഇപ്പോൾ സാമൂഹിക മാധ്യമങ്ങളിൽ വൈറലായിരിക്കുകയാണ്. വിവാഹ സത്കാര വേദിയിൽ അതിഥികൾക്ക് ഹവർ ബോർഡുകളിൽ സഞ്ചരിച്ച് ഭക്ഷണം വിളമ്പുന്ന സ്ത്രീകളുടെ വീഡിയോയാണ് വൈറലായത്.
പരമ്പരാഗത കാറ്ററിങ് രീതികളിൽ നിന്നും വ്യത്യസ്തമായി തിളക്കമാർന്ന ചെറിയ വസ്ത്രങ്ങളും അതിന് ചേരുന്ന സ്നീക്കേഴ്സും ധരിച്ച് ഹവർബോർഡുകളിൽ വന്ന് അതിഥികളെ സത്കരിക്കുന്ന സ്ത്രീകളുടെ വീഡിയോ ഇന്ത്യൻ വിവാഹങ്ങളിൽ വരുത്തുന്ന മാറ്റങ്ങളെക്കുറിച്ചുള്ള ചർച്ചയ്ക്ക് സോഷ്യൽ മീഡിയയിൽ തുടക്കമിട്ടിരിക്കുകയാണ്.
"സമ്പന്നരുടെ വിവാഹത്തിൽ എന്തും സംഭവിക്കും (അമീരോംക്കി ഷാദി മേ കുച്ച് ഭി ചൽത്താ രഹ്ത്താ ഹേ)" എന്ന ക്യാപ്ഷനോടെ byomkesbakshy എന്ന യൂസറാണ് 2026 ഏപ്രിൽ 23ന് എക്സിൽ ഈ വീഡിയോ പങ്കുവച്ചിരിക്കുന്നത്. ഇതിനോടകം 1,35000ത്തിലധികം പേരാണ് ഈ വീഡിയോ കണ്ടിട്ടുള്ളത്.
"നിങ്ങൾക്ക് ഒരു പരിപാടി നടത്താൻ ആഗ്രഹമില്ലാതിരിക്കുകയോ അറിയാതിരിക്കുകയോ, ചെയ്യുമ്പോൾ മണ്ടന്മാർ നടത്തുന്ന ഇവന്റ് മാനേജ്മെൻ്റ് കമ്പനികളെ ആശ്രയിക്കുമ്പോഴാണ് ഇങ്ങനെ സംഭവിക്കുന്നത്" എന്ന ഒരാൾ കമൻ്റ് ചെയ്തപ്പോൾ " ഇത് വളരെ മോശമായ പ്രവർത്തിയാണ്, ഇതിൻ്റെ ആവശ്യമില്ല" എന്നാണ് മറ്റൊരാൾ പറയുന്നത്. "തീർച്ചയായും ഇത് Ai ആയിരിക്കണം" എന്നാണ് മറ്റൊരു രസകരമായ കമൻ്റ്
രണ്ട് ചക്രങ്ങളിൽ ബാലൻസ് ചെയ്ത് സഞ്ചരിക്കാവുന്ന ഇലക്ട്രിക് മോട്ടോർ ഘടിപ്പിച്ച വ്യക്തിഗത യാത്രാ വാഹനമാണ് ഹവർ ബോർഡുകൾ. ഇലക്ട്രിക് സ്കേറ്റ്ബോർഡ് എന്നും ഇതറിയപ്പെടുന്നു.