ഗോവ: ഐഎസ്എല്ലിൽ ഇന്നത്തെ ആദ്യ മത്സരത്തിൽ കരുത്തരായ ചർച്ചിൽ ബ്രദേഴ്സിനെ ഗോൾമഴയിൽ മുക്കി നാണംകെടുത്തി പോയിൻ്റ് ടേബിളിൽ ഈസ്റ്റ് ബംഗാളിൻ്റെ കുതിപ്പ്. സീസണിലെ ആദ്യ മത്സരത്തിൽ ഐ ലീഗിൽ നിന്നും ആദ്യമായി ഐഎസ്എൽ കളിക്കാനെത്തിയ ചർച്ചിൽ ബ്രദേഴ്സിന് ഞെട്ടിക്കുന്ന തോൽവിയാണ് വഴങ്ങേണ്ടി വന്നത്. ഏകപക്ഷീയമായ നാലു ഗോളുകൾക്കാണ് ഈസ്റ്റ് ബംഗാൾ വിജയക്കുതിപ്പിന് തുടക്കമിട്ടത്.
ഡാനി റാമിറെസ് (2), എഡ്മണ്ട് ലാൽറിൻഡിക (45), ബിപിൻ സിങ് (85, 90) എന്നിവരുടെ ഗോളുകൾക്ക് ചർച്ചിൽ ബ്രദേഴ്സിന് മറുപടിയുണ്ടായിരുന്നില്ല. അവസാന മിനിറ്റുകളിൽ ഇരട്ട ഗോളുകളുമായി ബിപിൻ സിങ്ങ് സീസണിലെ ഗോൾഡൻ ബൂട്ടിനുള്ള പോരാട്ടത്തിൽ ഇക്കുറി ഞാനുമുണ്ടെന്ന ഓർമപ്പെടുത്തലാണ് നടത്തിയത്.
ഗോവയിലെ ഫറ്റോർഡ സ്റ്റേഡിയത്തിൽ നടന്ന മത്സരത്തിലെ ജയത്തോടെ ഈസ്റ്റ് ബംഗാൾ മൂന്ന് പോയിൻ്റുമായി രണ്ടാം സ്ഥാനത്തേക്കുയർന്നു. രണ്ട് മത്സരങ്ങളിൽ രണ്ട് ജയവുമായി ബെംഗളൂരു എഫ്.സിയാണ് സീസണിൽ മുന്നിൽ. നോർത്ത് ഈസ്റ്റ് യുണൈറ്റഡിനെതിരെ ഇന്ന് രണ്ട് ഗോൾ വ്യത്യാസത്തിൽ ജയിച്ചാൽ കേരള ബ്ലാസ്റ്റേഴ്സിന് ഇന്ന് മുന്നിലെത്താനാകും.