കൊച്ചി: തുടർച്ചയായ ദുരന്തവാർത്തകളും സംഘർഷങ്ങളും നിഷേധാത്മകമായ ഉള്ളടക്കങ്ങളും കണ്ട് മനസ്സ് മടുത്ത സോഷ്യൽ മീഡിയ ഉപയോക്താക്കൾക്കിടയിൽ പുതിയ ആശ്വാസമായി 'ബ്ലൂംസ്ക്രോളിംഗ്' തരംഗമാകുന്നു. മണിക്കൂറുകളോളം ഫോണിൽ നെഗറ്റീവ് വാർത്തകളും വിഷാദം ജനിപ്പിക്കുന്ന പോസ്റ്റുകളും തിരഞ്ഞുനടന്ന് സ്വയം മാനസിക സമ്മർദ്ദത്തിലാകുന്ന 'ഡൂംസ്ക്രോളിംഗ്' എന്ന അപകടകരമായ പ്രവണതയ്ക്ക് പകരമായാണ് ആളുകൾ ഇപ്പോൾ ബ്ലൂംസ്ക്രോളിംഗിലേക്ക് ചുവടുമാറുന്നത്.
മനസ്സിൽ സന്തോഷവും ശാന്തതയും നിറയ്ക്കുന്ന പോസിറ്റീവ് വാർത്തകൾ, ശാന്തമായ പ്രകൃതിദൃശ്യങ്ങൾ, മൃഗങ്ങളുടെ രസകരമായ ദൃശ്യങ്ങൾ, പ്രചോദനാത്മകമായ കഥകൾ, ക്രിയാത്മകമായ കലാരൂപങ്ങൾ എന്നിവ ബോധപൂർവ്വം തെരഞ്ഞെടുത്ത് കാണുന്ന ഡിജിറ്റൽ ശീലത്തെയാണ് ബ്ലൂംസ്ക്രോളിംഗ് എന്ന് വിശേഷിപ്പിക്കുന്നത്. സോഷ്യൽ മീഡിയ ആപ്പുകൾ തുറക്കുമ്പോൾ ഭയത്തിനും ഉത്കണ്ഠയ്ക്കും പകരം മുഖത്ത് പുഞ്ചിരി കൊണ്ടുവരിക എന്നതാണ് ഈ പുതിയ സംസ്കാരം ലക്ഷ്യമിടുന്നത്.
പ്രകൃതിയുടെ ശാന്തമായ ദൃശ്യങ്ങളും നന്മനിറഞ്ഞ ജീവിതാനുഭവങ്ങളും കാണുന്നത് ആളുകളിൽ സമ്മർദ്ദം കുറയ്ക്കാനും മാനസികാവസ്ഥ മെച്ചപ്പെടുത്താനും ഉന്മേഷം പകരാനും സഹായിക്കുമെന്ന് ശാസ്ത്രീയ പഠനങ്ങളും ശരിവെക്കുന്നുണ്ട്. എന്നാൽ പോസിറ്റീവ് ഉള്ളടക്കങ്ങളാണെങ്കിൽ പോലും സ്ക്രീനിന് മുന്നിൽ അനിയന്ത്രിതമായി മണിക്കൂറുകൾ ചെലവഴിക്കുന്നത് പൂർണ്ണമായും നല്ലതല്ലെന്നും വിദഗ്ദ്ധർ ഓർമ്മിപ്പിക്കുന്നു. സ്വന്തം സോഷ്യൽ മീഡിയ അക്കൗണ്ടുകൾ കൂടുതൽ ആരോഗ്യകരമായ ഇടമാക്കി മാറ്റാൻ ചില ലളിതമായ മാറ്റങ്ങൾ വരുത്താമെന്നാണ് നിർദ്ദേശം.
നിരന്തരം അസ്വസ്ഥതയും നെഗറ്റിവിറ്റിയും സമ്മാനിക്കുന്ന അക്കൗണ്ടുകളെ അൺഫോളോ ചെയ്യുകയോ മ്യൂട്ട് ചെയ്യുകയോ ചെയ്യുക, മനസ്സിന് സന്തോഷവും വിജ്ഞാനവും പകരുന്ന പേജുകളെ മാത്രം പിന്തുടരുക, കൃത്യമായ സ്ക്രീൻ ടൈം പരിധി നിശ്ചയിക്കുക, ഓരോ തവണ ഫോൺ ഉപയോഗിച്ച ശേഷവും മനസ്സിന് എന്ത് മാറ്റമാണുണ്ടായത് എന്ന് സ്വയം നിരീക്ഷിക്കുക തുടങ്ങിയ ശീലങ്ങളിലൂടെ സോഷ്യൽ മീഡിയയെ മാനസികാരോഗ്യത്തിന് തുണയാകുന്ന മികച്ചൊരു മാധ്യമമാക്കി മാറ്റാൻ ഓരോരുത്തർക്കും സാധിക്കും.