പത്തനംതിട്ട: ആറന്മുളയിലെ പ്രളയ ദുരിതാശ്വാസ പ്രവർത്തനത്തിന് എത്തിയ വാഹനത്തിന് പിഴയിട്ട ഉദ്യോഗസ്ഥരെ സസ്പെൻഡ് ചെയ്തതിൽ മോട്ടോർ വാഹന വകുപ്പിൽ കടുത്ത അതൃപ്തി. നിയമലംഘനം നടത്തിയതിനാണ് പിഴയിട്ടതെന്ന് ഉദ്യോഗസ്ഥർ പറഞ്ഞു.
മോട്ടോർ വാഹനവകുപ്പ് ഉദ്യോഗസ്ഥരായ ലൈജുവിനെയും ഷമീറിനെയുമാണ് സസ്പെൻഡ് ചെയ്തത്. ഇവരിൽ നിന്ന് വിശദീകരണം ചോദിക്കാതെയാണ് നടപടിയെടുത്തതെന്നാണ് വിമർശനം. വാഹനത്തിനെതിരെ മുൻപും സമാന പരാതി മോട്ടോർ വാഹന വകുപ്പിന് ലഭിച്ചിരുന്നു.
അടൂരിൽ വെച്ച് വാഹനത്തിന് പിഴ ഇട്ടത് പൊല്യൂഷൻ സർട്ടിഫിക്കറ്റ് ഇല്ലാത്തതിനും നിയമവിരുദ്ധമായി ലൈറ്റുകൾ ഘടിപ്പിച്ചതിനുമാണെന്നും ഉദ്യോഗസ്ഥർ പറഞ്ഞു. വാഹനത്തിന് പിഴയിട്ട ശേഷമാണ് ആറന്മുളയിലെ പ്രളയ ദുരിതാശ്വാസ പ്രവർത്തനത്തിന് എത്തിയ വാഹനമെന്ന അവകാശവാദവുമായി ഉടമകൾ രംഗത്തെത്തിയത്.
ഇതോടെ ആറന്മുള എംഎൽഎ അബിൻ വർക്കി വിഷയത്തിൽ ഇടപെടുകയായിരുന്നു. സംഭവത്തിൽ നടപടി എടുക്കണമെന്ന് മന്ത്രി സി.പി. ജോണിനോട് എംഎൽഎ ആവശ്യപ്പെടുകയായിരുന്നു. തുടർന്നായിരുന്നു ഉദ്യോഗസ്ഥരെ സസ്പെൻഡ് ചെയ്തത്.