മുംബൈ: ആഗസ്റ്റ് ക്രാന്തി മൈതാനിയിൽ മുഖ്യ തെരഞ്ഞെടുപ്പ് കമ്മീഷണർക്കെതിരായ പ്രതിഷേധത്തിൽ ബോളിവുഡ് നടൻ ഇമ്രാൻ ഖാൻ പങ്കെടുത്തു എന്ന ആരോപണം നിഷേധിച്ച് നടൻ്റെ അഭിഭാഷകർ രംഗത്ത്. പ്രക്ഷോഭത്തിൽ താരം പങ്കെടുത്തിട്ടില്ലെന്നും ആ വഴിയിലൂടെ കടന്നുപോവുക മാത്രമാണ് ചെയ്തതെന്നുമാണ് അഭിഭാഷകരുടെ വിശദീകരണം.
നാനാ ചൗക്കിലൂടെ യാത്ര ചെയ്യുകയായിരുന്ന ഇമ്രാൻ ഖാനെ പൊലീസ് ബാരിക്കേഡുകൾ തടയുകയും മാധ്യമപ്രവർത്തകർ സമീപിക്കുകയുമാണ് ഉണ്ടായതെന്നും അഭിഭാഷകൻ വ്യക്തമാക്കി. അന്നത്തെ സിസിടിവി ദൃശ്യങ്ങൾ പരിശോധിച്ചാൽ ഇക്കാര്യം വ്യക്തമാകുമെന്നും അദ്ദേഹം പറഞ്ഞു.
ഒക്ടോബർ 10ന് നടന്ന പ്രതിഷേധത്തിനിടെ കസ്റ്റഡിയിൽ എടുത്ത ഇമ്രാൻ ഖാനെതിരെ പൊലീസ് കേസെടുത്തിരുന്നു. കൂടാതെ ഒക്ടോബർ 28-നകം രാജ്യം വിടണമെന്ന് കാട്ടി ഫോറിനേഴ്‌സ് റീജിയണൽ രജിസ്‌ട്രേഷൻ ഓഫീസിന്‍റെ നോട്ടീസും നടന് ലഭിച്ചിട്ടുണ്ട്. യുഎസ് പൗരനും ഒസിഐ കാർഡ് ഉടമയുമായ ഇമ്രാൻ ഖാൻ്റെ രാഷ്ട്രീയ ഇടപെടലുകൾ ചൂണ്ടിക്കാട്ടി ബിജെപി നേതാവ് കിരിത് സോമയ്യ പരാതി നൽകിയതിനെ തുടർന്നാണ് അധികൃതർ നടപടി സ്വീകരിച്ചത്.
അനുമതിയില്ലാതെ നടത്തിയ പ്രതിഷേധത്തിൽ പങ്കെടുത്തുവെന്ന് ആരോപിച്ചാണ് ഇമ്രാൻ ഖാനെ പൊലീസ് കസ്റ്റഡിയിൽ എടുത്തത്. വിദേശ പൗരന്മാർ ഇന്ത്യയിലെ രാഷ്ട്രീയ പ്രക്ഷോഭങ്ങളിൽ പങ്കെടുക്കുന്നത് ചട്ടങ്ങളുടെ ലംഘനമാണെന്ന് മഹാരാഷ്ട്ര ആഭ്യന്തര സഹമന്ത്രി യോഗേഷ് കദം വ്യക്തമാക്കി.