യെമൻ: ഹൂതി വിമതരുടെ അധീനതയിലുള്ള തലസ്ഥാനമായ സനായിൽ സൗദി സഖ്യസേന നടത്തിയ വ്യോമാക്രമണത്തിൽ 11 പേർ കൊല്ലപ്പെട്ടു. നിരവധി പേർക്ക് പരിക്കേൽക്കുകയും ചെയ്തു. സനാ ഗവർണറേറ്റിലെ ബാനി ഹുഷൈഷ് ജില്ലയിലുള്ള അൽ-ശരിയ പ്രദേശത്തെ ജനവാസ മേഖലയിലാണ് ആക്രമണമുണ്ടായത്.
ഇവിടെയുള്ള അഞ്ച് വീടുകൾ വ്യോമാക്രമണത്തിൽ പൂർണമായും തകർന്നു. മരിച്ചവരിൽ സ്ത്രീകളും കുട്ടികളും ഉൾപ്പെടുന്നു. തകർന്ന വീടുകളുടെ അവശിഷ്ടങ്ങൾക്കിടയിൽ നിന്നും രക്ഷാപ്രവർത്തകർ 11 മൃതദേഹങ്ങൾ കണ്ടെടുത്തതായി ഹൂതി മാധ്യമങ്ങൾ സ്ഥിരീകരിച്ചു.
ആദ്യത്തെ ആക്രമണത്തിന് പിന്നാലെ പരിക്കേറ്റവരെ രക്ഷിക്കാൻ എത്തിയ രക്ഷാപ്രവർത്തകരെ ലക്ഷ്യമിട്ടും സൗദി യുദ്ധവിമാനങ്ങൾ വീണ്ടും ആക്രമണം നടത്തിയതായി പ്രാദേശിക മാധ്യമങ്ങൾ റിപ്പോർട്ട് ചെയ്തു.