ടെഹ്റാൻ: ഹോർമുസ് കടലിടുക്കിൽ ഏർപ്പെടുത്തിയ ടോൾ ഇനത്തിൽ നിന്ന് ആദ്യമായി വരുമാനം ലഭിച്ചുവെന്ന് ഇറാൻ. ടോൾ ഇനത്തിൽ ലഭിച്ച ആദ്യ ഗഡു സെൻട്രൽ ബാങ്ക് അക്കൗണ്ടിൽ നിക്ഷേപിച്ചതായി ഇറാൻ പാർലമെൻ്റ് ഡെപ്യൂട്ടി സ്പീക്കർ ഹമീദ് റെസ് ഹാജിബാബേയ് പറഞ്ഞു. മറ്റ് ഇറാനിയൻ മാധ്യമങ്ങളും ഈ വാർത്ത റിപ്പോർട്ട് ചെയ്തിട്ടുണ്ട്.
പശ്ചിമേഷ്യൻ യുദ്ധം ആരംഭിച്ചതോടെ ഹോർമുസ് കടലിടുക്ക് പ്രധാന ചർച്ചാവിഷയമായിരുന്നു. ലോകത്തിൻ്റെ പലഭാഗങ്ങളിലേക്ക് എണ്ണ, പ്രകൃതിവാതകം കൊണ്ടുപോയിരുന്നത് ഇതിലൂടെയായിരുന്നു. എന്നാൽ ഇസ്രയേൽ-യുഎസ് ആക്രമണം ശക്തമായതോടെ ഇറാൻ ഹോർമുസ് അടയ്ക്കുകയായിരുന്നു. ഇറാനുമായി സഖ്യമുള്ള രാജ്യങ്ങളുടെ കപ്പലുകളെ മാത്രമേ ഇതിലൂടെ കടത്തിവിട്ടിരുന്നുള്ളൂ. ഇതോടെ ഈ പാതയിലൂടെയുള്ള കപ്പൽ ഗതാഗതം ചുരുങ്ങിയിരുന്നു.
ഇതിലൂടെയുള്ള ഗതാഗത്തിന് ടോൾ ഏർപ്പെടുത്താൻ ഇറാൻ പാർലമെൻ്റ് ബിൽ പാസാക്കിയിരുന്നു. ഇതിനിടെ ഇറാൻ്റെ വിലക്ക് ലംഘിച്ച് ഹോർമുസ് കടലിടുക്ക് കടക്കാൻ ശ്രമിച്ച കപ്പലുകൾ പിടിച്ചെടുക്കുന്ന ദൃശ്യം ഇറാൻ പുറത്തുവിട്ടിരുന്നു.