ലോകകപ്പ് ഫുട്ബോളിന് കാഹളം ഉയരാൻ ഇനി ഏറെ നാളുകളില്ല... ലോകം ഒരു കാൽപന്തിന് ചുറ്റും ഉരുളാൻ തുടങ്ങാൻ കാത്തിരിക്കേണ്ടത് ഇനി ഏഴ് മാസം കൂടി മാത്രം. 2023 സെപ്തംബർ ഏഴ് മുതൽ കോൺമെബോൾ സോണിലെ മൂന്ന് മത്സരങ്ങളോടെ ആരംഭിച്ച, 2026 ലോകകപ്പ് ഫുട്ബോൾ യോഗ്യതാ റൗണ്ടിൽ... ഇതേവരെ 42 ടീമുകൾ സീറ്റ് ഉറപ്പിച്ചിട്ടുണ്ട്. യൂറോപ്പ് (UEFA), സെൻട്രൽ അമേരിക്ക, കരീബിയൻ (CONCACAF) എന്നിവിടങ്ങളിൽ നിന്നുള്ള എട്ട് ടീമുകളാണ് അവസാനമായി യോഗ്യത ഉറപ്പാക്കിയത്. അവസാനത്തെ ആറ് സ്ഥാനങ്ങൾക്കായി യുവേഫ, ഇൻ്റർകോണ്ടിനെൻ്റൽ പ്ലേ ഓഫ് പോരാട്ടങ്ങൾ കൂടി മാത്രമെ ഇനി ബാക്കിയുള്ളൂ.
ഇക്കൂട്ടത്തിൽ ആദ്യമായി ലോകകപ്പ് കളിക്കാനെത്തുന്ന നാല് രാജ്യങ്ങളാണുള്ളത്. കേപ് വെർഡെ, ക്യുറസാവോ, ജോർദാൻ, ഉസ്ബെക്കിസ്ഥാൻ എന്നിവരാണ് അഭിമാനകരമായ ഈ നേട്ടം സ്വന്തമാക്കിയത്. ഒന്നര ലക്ഷത്തിന് മുകളിൽ മാത്രം ജനസംഖ്യയുള്ള ഡച്ച് ദ്വീപായ ക്യുറസാവോ, ഇതുവരെ ലോകകപ്പ് യോഗ്യത നേടിയ രാജ്യങ്ങളിൽ ഏറ്റവും ചെറിയ രാജ്യമാണ്.
അതേസമയം, കഴിഞ്ഞ ലോകകപ്പിന് ആതിഥേയത്വം വഹിച്ച ഖത്തർ ഇക്കുറി ആദ്യമായി യോഗ്യത നേടി ലോകകപ്പ് കളിക്കുന്നുവെന്ന പ്രത്യേകത കൂടിയുണ്ട്. ഏഷ്യൻ ഫുട്ബോൾ കോൺഫെഡറേഷൻ്റെ ലോകകപ്പ് യോഗ്യതാ മത്സരങ്ങളിൽ, രണ്ടാം റൗണ്ടിൽ ഇന്ത്യ ഉൾപ്പെട്ടിരുന്ന എ ഗ്രൂപ്പിൽ ചാംപ്യന്മാരായാണ് ഖത്തർ 2026ലെ വിശ്വമാമാങ്കത്തിന് ടിക്കറ്റെടുത്തത്. നീണ്ട 52 വർഷത്തെ കാത്തിരിപ്പിന് ശേഷം ഹെയ്തി ലോകകപ്പ് ടൂർണമെൻ്റിലേക്ക് തിരിച്ചുവരുന്നതും ഇക്കുറി കാണാം. കരീബിയൻ മേഖലയിൽ നിന്ന് പനാമ കൂടി ലോകകപ്പ് കളിക്കാനെത്തുന്നുണ്ട്.
1994ൽ യുഎസിൽ നടന്ന ഫുട്ബോൾ ലോകകപ്പിൽ 24 ടീമുകൾ മത്സരിച്ചെങ്കിൽ... ഇക്കുറി ടൂർണമെൻ്റ് അവിടേക്ക് തിരിച്ചെത്തുമ്പോൾ ഇരട്ടി ടീമുകൾ മത്സരിക്കാനുണ്ട്. ഇത്തവണ ലോകകപ്പിൽ ടീമുകളുടെ എണ്ണം 48 ആയി വർധിപ്പിച്ചതോടെ, ആദ്യ റൗണ്ടിൽ നാല് ടീമുകൾ വീതമുള്ള 12 ഗ്രൂപ്പുകൾ ഉണ്ടാകും. ഈ റൗണ്ടിന് ശേഷം പോയിൻ്റ് നിലയിൽ മുന്നിലുള്ള 32 ടീമുകൾ അടുത്ത നോക്കൗട്ട് റൗണ്ടിലേക്ക് മുന്നേറും. അതായത് ലോകകപ്പിൻ്റെ മുൻ പതിപ്പുകളെ അപേക്ഷിച്ച് ഒരു അധിക നോക്കൗട്ട് റൗണ്ട് ഇക്കുറി കാണാം. പിന്നീട് പതിവ് പോലെ അത്യന്തം വാശിയേറിയ പ്രീ ക്വാർട്ടർ, ക്വാർട്ടർ, സെമി ഫൈനൽ, ഫൈനൽ മത്സരങ്ങളും നടക്കും.
അതിനായി 2026 മാർച്ച് 31 വരെ കാത്തിരിക്കേണ്ടി വരും. യൂറോപ്യൻ യോഗ്യതാ റൗണ്ടുകൾ മാർച്ച് വരെ നീണ്ടുനിൽക്കുകയും, ഇൻ്റർ കോണ്ടിനെൻ്റൽ പ്ലേഓഫ് ഫൈനലും അതേമാസം തന്നെ നടക്കുകയും ചെയ്യുന്നതിനാൽ, ലോകകപ്പിനുള്ള 48 ടീമുകളെ ടൂർണമെൻ്റിന് മൂന്ന് മാസം മുൻപേ അറിയാനാകൂ. അതത് കോൺഫെഡറേഷനുകൾ അവരുടെ യോഗ്യതാ പ്രക്രിയ പൂർത്തിയാക്കിയാൽ, ആറ് വൻകരകളിൽ നിന്നുള്ള... ഇതുവരെ യോഗ്യത നേടാത്ത മികച്ച രണ്ട് മികച്ച ടീമുകൾക്ക് ഫിഫ ലോകകപ്പ് യോഗ്യത നൽകും. അതിന് വേണ്ടിയാണ് ഈ ഇൻ്റർ കോണ്ടിനെൻ്റൽ മത്സരം നടത്തുന്നത്. 2026 മാർച്ച് 31നാണ് ഇൻ്റർ കോണ്ടിനെൻ്റൽ ഫൈനൽ പോരാട്ടം.
2026 ലോകകപ്പ് യോഗ്യതാ റൗണ്ടിലെ ശേഷിക്കുന്ന പ്ലേഓഫുകളെ യൂറോപ്യൻ, ഇൻ്റർകോണ്ടിനെൻ്റൽ എന്നിങ്ങനെ രണ്ടായി തിരിക്കാം. യൂറോപ്പിലെ ലോകകപ്പ് യോഗ്യതാ റൗണ്ടിൽ രണ്ടാമതെത്തിയ 16 ടീമുകൾ യൂറോപ്യൻ പ്ലേഓഫിൽ പരസ്പരം പോരടിക്കും. യുവേഫ യോഗ്യതാ റൗണ്ടിലെ 12 ഗ്രൂപ്പ് റണ്ണേഴ്‌സ് അപ്പുകളും, യുവേഫ നേഷൻസ് ലീഗിലെ മികച്ച നാല് ഗ്രൂപ്പ് വിജയികളുമാണ് പ്ലേഓഫ് കളിക്കുക. അതേസമയം, മറ്റെല്ലാ കോണ്ടിനെൻ്റൽ ഗ്രൂപ്പുകളിൽ നിന്നുമുള്ള ആറ് ടീമുകൾ... ശേഷിക്കുന്ന രണ്ട് ലോകകപ്പ് ടിക്കറ്റിനായി ഏറ്റുമുട്ടും. സീഡായ ഇറാഖിനും ഡെമോക്രാറ്റിക് റിപ്പബ്ലിക് ഓഫ് കോംഗോയ്ക്കും രണ്ട് പ്ലേഓഫ് ഫൈനലുകളിൽ കളിക്കാൻ ബൈ ചാൻസ് ലഭിക്കും. സെമി ഫൈനലിലെ വിജയികളുമായി ഇവർ മത്സരിക്കും.
അൽബേനിയ, ബോസ്നിയ ആൻഡ് ഹെർസഗോവിന, ചെക്കിയ, ഡെൻമാർക്ക്, ഇറ്റലി, കൊസോവോ, പോളണ്ട്, റിപ്പബ്ലിക് ഓഫ് അയർലൻഡ്, സ്ലൊവാക്യ, തുർക്കി, ഉക്രെയ്ൻ, വെയിൽസ്, റൊമാനിയ, സ്വീഡൻ, വടക്കൻ അയർലൻഡ്, നോർത്ത് മാസിഡോണിയ.
Path A
സെമി ഫൈനൽ 1: ഇറ്റലി vs വടക്കൻ അയർലൻഡ് (26 മാർച്ച് 2026)
സെമി ഫൈനൽ 2: വെയിൽസ് vs ബോസ്നിയ ആൻഡ് ഹെർസഗോവിന (26 മാർച്ച് 2026)
ഫൈനൽ 1: സെമിയിലെ ജേതാക്കൾ തമ്മിൽ (31 മാർച്ച് 2026)
Path B
സെമി ഫൈനൽ 3: ഉക്രെയ്ൻ vs സ്വീഡൻ (26 മാർച്ച് 2026)
സെമി ഫൈനൽ 4: പോളണ്ട് vs അൽബേനിയ (26 മാർച്ച് 2026)
ഫൈനൽ 2: സെമിയിലെ ജേതാക്കൾ തമ്മിൽ (31 മാർച്ച് 2026)
Path C
സെമി ഫൈനൽ 5: തുർക്കി vs റൊമാനിയ (26 മാർച്ച് 2026)
സെമി ഫൈനൽ 6: സ്ലൊവാക്യ vs കൊസോവോ (26 മാർച്ച് 2026)
ഫൈനൽ 3: സെമിയിലെ ജേതാക്കൾ തമ്മിൽ (31 മാർച്ച് 2026)
Path D
സെമി ഫൈനൽ 7: ഡെൻമാർക്ക് vs നോർത്ത് മാസിഡോണിയ (26 മാർച്ച് 2026)
സെമി ഫൈനൽ 8: ചെക്ക് റിപ്പബ്ലിക് vs റിപ്പബ്ലിക് ഓഫ് അയർലൻഡ് (26 മാർച്ച് 2026)
ഫൈനൽ 4: സെമിയിലെ ജേതാക്കൾ തമ്മിൽ (31 മാർച്ച് 2026)
ബൊളീവിയ, ഡെമോക്രാറ്റിക് റിപ്പബ്ലിക് ഓഫ് കോംഗോ, ഇറാഖ്, ജമൈക്ക, ന്യൂ കാലിഡോണിയ, സുരിനാം
സെമി ഫൈനൽ 1 - ന്യൂ കാലിഡോണിയ vs ജമൈക്ക
സെമി ഫൈനൽ 2 - ബൊളീവിയ vs സുരിനാം
ഫൈനൽ 1 - കോംഗോ vs ന്യൂ കാലിഡോണിയ/ ജമൈക്ക
ഫൈനൽ 2 - ഇറാഖ് vs ബൊളീവിയ/ സുരിനാം
യോഗ്യതാ റൗണ്ടിലെ പ്രധാന മത്സരങ്ങൾ പൂർത്തിയായതോടെ ചില പ്രമുഖരുടെ അസാന്നിധ്യം ശ്രദ്ധേയമാണ്. കാമറൂൺ, മാലി, കോസ്റ്റാറിക്ക, സെർബിയ, തുടങ്ങി.... മുൻ യൂറോപ്യൻ ചാംപ്യന്മാരായ ഗ്രീസും ആഫ്രിക്കൻ പവർഹൗസുകളായ നൈജീരിയയും ഇതിനോടകം യോഗ്യതാ റൗണ്ടിൽ നിന്ന് പുറത്തായിക്കഴിഞ്ഞു. അതേസമയം, നാല് തവണ ലോക ജേതാക്കളായ ഇറ്റലി യൂറോപ്യൻ പ്ലേ ഓഫുകൾക്ക് ഒരുങ്ങുകയാണ്. അറബ് മേഖലയിലെ വൻശക്തിയായ ഇറാഖും ഇൻ്റർ കോണ്ടിനെൻ്റൽ പ്ലേ ഓഫ് കളിക്കേണ്ട അവസ്ഥയിലാണ്.
2026 ഫിഫ ലോകകപ്പ് അമേരിക്ക, കാനഡ, മെക്സിക്കോ എന്നിവിടങ്ങളിലായാണ് നടക്കാനിരിക്കുന്നത്. ഉദ്ഘാടന മത്സരം ജൂൺ 11ന് മെക്സിക്കോ സിറ്റിയിലും, കലാശപ്പോരാട്ടം ജൂലൈ 19ന് ന്യൂജേഴ്‌സിയിലും വച്ച് നടക്കും. ഖത്തർ ലോകകപ്പിൽ 32 ടീമുകൾ പങ്കെടുത്തെങ്കിൽ ഇക്കുറി 48 ടീമുകളാണ് മാറ്റുരയ്ക്കുക. അതിനാൽ തന്നെ ഇക്കുറി ഫുട്ബോൾ ലോകകപ്പ് ചരിത്രത്തിലെ ഏറ്റവും ദൈർഘ്യമേറിയ ടൂർണമെൻ്റാണ് നടക്കാൻ പോകുന്നത്. ലോകകപ്പ് ആവേശം 39 ദിവസം നീളുമെന്ന് ചുരുക്കം! ഇക്കൊല്ലം ഡിസംബർ അഞ്ചിനാണ് അടുത്ത വർഷത്തെ ഫിഫ ലോകകപ്പിനുള്ള മത്സരങ്ങളുടെ നറുക്കെടുപ്പ് നടക്കുന്നത്.
<> ആതിഥേയ രാജ്യങ്ങൾ
കാനഡ, മെക്സിക്കോ, യുഎസ്എ
<> ആഫ്രിക്ക
അൾജീരിയ, കേപ്പ് വെർഡെ, ഈജിപ്ത്, ഘാന, ഐവറി കോസ്റ്റ്, മൊറോക്കോ, സെനഗൽ, ദക്ഷിണാഫ്രിക്ക, ടുണീഷ്യ
<> ഏഷ്യ
ഓസ്‌ട്രേലിയ, ഇറാൻ, ജപ്പാൻ, ജോർദാൻ, ഖത്തർ, സൗദി അറേബ്യ, ദക്ഷിണ കൊറിയ, ഉസ്ബെക്കിസ്ഥാൻ
<> യൂറോപ്പ്
ഓസ്ട്രിയ, ബെൽജിയം, ക്രൊയേഷ്യ, ഇംഗ്ലണ്ട്, ഫ്രാൻസ്, ജർമനി, നെതർലൻഡ്‌സ്, നോർവെ, പോർച്ചുഗൽ, സ്കോട്ട്‌ലൻഡ്, സ്‌പെയിൻ, സ്വിറ്റ്‌സർലൻഡ്
<> ഓഷ്യാനിയ
ന്യൂസിലൻഡ്
<> അമേരിക്ക
അർജൻ്റീന, ബ്രസീൽ, കൊളംബിയ, ഇക്വഡോർ, പരാഗ്വേ, ഉറുഗ്വേ, ക്യുറസാവോ, പനാമ, ഹെയ്തി.