ജമാൽ മുസിയാല മത്സരത്തിനിടയിൽ കുഴഞ്ഞുവീഴുന്ന ദൃശ്യം courtesy' INTERNET
FOOTBALL

മുസിയാലയുടെ ഭാവിയിൽ ആശങ്ക; സാമ്പത്തിക വശങ്ങൾ കൂടി പരിഗണിക്കാനൊരുങ്ങി ബയേൺ

പേശീപരിക്കിൽ നിന്ന് മുക്തനായെങ്കിലും, മുസിയാലക്ക് അപസ്മാരത്തിന്റെ മറ്റൊരു അവസ്ഥാന്തരമായ നാഡീസംബന്ധമായ രോഗാവസ്ഥയുണ്ട്, ഇതാണ് ക്ലബ്ബിനെ കൂടുതൽ ആശങ്കപ്പെടുത്തുന്നത്

Author : ന്യൂസ് ഡെസ്ക്

മ്യൂണിക്ക്: രണ്ട് മാസത്തെ ഇടവേളയ്ക്ക് ശേഷം കളിക്കളത്തിൽ തിരിച്ചെത്തിയ ജമാൽ മുസിയാലയുടെ ആരോഗ്യസ്ഥിതിയിൽ ആശങ്ക പ്രകടിപ്പിച്ച് ബയേൺ മ്യൂണിക്ക്. താരത്തിന് പഴയനിലയിൽ കളിക്കാനാവില്ലെങ്കിൽ ഭാവി സംബന്ധിച്ച് തീരുമാനങ്ങളെടുക്കേണ്ടിവരും എന്നാണ് ക്ലബ്ബിന്റെ ഭാഷ്യം. വെള്ളിയാഴ്ച ബുണ്ടസ് ലീഗയിൽ എഫ്‌സി കൊളോണിനെതിരായ മത്സരത്തിൽ അവസാന 20 മിനിറ്റിലാണ് താരം കളത്തിലിറങ്ങിയത്.

പേശീപരിക്കിൽ നിന്ന് മുക്തനായെങ്കിലും, മുസിയാലക്ക് അപസ്മാരത്തിന്റെ മറ്റൊരു അവസ്ഥാന്തരമായ നാഡീസംബന്ധമായ രോഗാവസ്ഥയുണ്ട്, ഇതാണ് ക്ലബ്ബിനെ കൂടുതൽ ആശങ്കപ്പെടുത്തുന്നത്. കഴിഞ്ഞ ഓഗസ്റ്റിൽ നാല് ദിവസത്തിനിടെ രണ്ടുതവണ കുഴഞ്ഞുവീണ മുസിയാലയ്ക്ക് പിന്നീട് പഴയ മികവിലേക്ക് തിരിച്ചെത്താനായിട്ടില്ല.

"അദ്ദേഹത്തിന് ആരോഗ്യപ്രശ്നങ്ങളുണ്ട്. പഴയ നിലവാരത്തിലേക്ക് തിരിച്ചെത്തുക പ്രയാസകരമായിരിക്കുമെന്നാണ് നിലവിലെ സാഹചര്യങ്ങൾ സൂചിപ്പിക്കുന്നത്," ബയേൺ ഇതിഹാസവും സൂപ്പർവൈസറി ബോർഡ് അംഗവുമായ കാൾ റുമെനിഗെ പറഞ്ഞു.

2030 വരെ കരാറുള്ള മുസിയാലയ്ക്ക് പ്രതിവർഷം ഏകദേശം 25 മില്യൺ യൂറോ പ്രതിഫലം ലഭിക്കുന്നുണ്ടെന്നാണ് റിപ്പോർട്ടുകൾ. താരത്തിന്റെ ആരോഗ്യത്തിനൊപ്പം സാമ്പത്തിക വശങ്ങളും ക്ലബ്ബിന് പരിഗണിക്കേണ്ടതുണ്ടെന്നും റുമെനിഗെ വ്യക്തമാക്കി.

മുസിയാല ക്ലബ് വിടുമെന്ന് കരുതുന്നില്ലെന്നും ഈ സാഹചര്യത്തിൽ മറ്റൊരു ക്ലബ്ബ് അദ്ദേഹത്തെ സ്വന്തമാക്കാനും സാധ്യതയില്ലെന്നും അദ്ദേഹം കൂട്ടിച്ചേർത്തു. താരം പൂർണ ആരോഗ്യത്തോടെ തിരിച്ചെത്തണമെന്നാണ് ക്ലബ്ബിന്റെ ആഗ്രഹം. അതിന് സാധിച്ചില്ലെങ്കിൽ സാമ്പത്തികം കൂടി പരിഗണിച്ച് അന്തിമ തീരുമാനമെടുക്കേണ്ടത് ബയേണിന്റെ ഉന്നത നേതൃത്വമായിരിക്കുമെന്നും റുമെനിഗെ വ്യക്തമാക്കി. പ്രതിഫലം കുറക്കുന്നതടക്കമുള്ള കാര്യങ്ങൾ പരിഗണിക്കുമെന്നാണ് സൂചന.

SCROLL FOR NEXT