ബ്രിട്ടീഷ് ടെലിവിഷൻ അവാർഡ്സിൽ (ബാഫ്റ്റ) ചരിത്രനേട്ടവുമായി നെറ്റ്ഫ്ലിക്സ് ലിമിറ്റഡ് ഡ്രാമ സീരീസ് 'അഡോളസെൻസ്'. നാല് പുരസ്കാരങ്ങൾ നേടിയ സീരീസ് ഒരു സീസണില് ഏറ്റവും കൂടുതല് പുരസ്കാരങ്ങള് നേടുന്ന പരമ്പരയെന്ന നേട്ടം സ്വന്തമാക്കി. 'അഡോളസെൻസി'ലെ പ്രകടനത്തിന് മികച്ച സഹനടനുള്ള അവാർഡ് നേടിയ 16 വയസുകാരനായ ഓവൻ കൂപ്പർ ഈ പുരസ്കാരം നേടുന്ന ഏറ്റവും പ്രായം കുറഞ്ഞ താരവുമായി.
ലണ്ടനിലെ റോയൽ ഫെസ്റ്റിവൽ ഹാളിൽ നടന്ന ചടങ്ങിലാണ് പുരസ്കാരങ്ങൾ വിതരണം ചെയ്തു. ഗ്രെഗ് ഡേവിസ് ആയിരുന്നു ചടങ്ങിന്റെ അവതാരകൻ.
പുരസ്കാരം ഏറ്റുവാങ്ങിയുള്ള പ്രസംഗത്തിൽ, ബീറ്റിൽസിനേയും ജോൺ ലെനനെയും ഓവൻ കൂപ്പർ അനുസ്മരിച്ചു. "ജോൺ ലെനന്റെ വാക്കുകളിൽ പറഞ്ഞാൽ, വിഷൻ ഇല്ലെങ്കിൽ നിങ്ങൾക്ക് ഒന്നും നേടാനാവില്ല...വിജയിക്കാൻ മൂന്ന് കാര്യങ്ങൾ മാത്രമേ ആവശ്യമുള്ളൂ എന്നാണ് എനിക്ക് തോന്നുന്നത്. ഒന്ന്, തീവ്രമായ അഭിനിവേശം, രണ്ട്, ഒരു സ്വപ്നം, മൂന്നാമത് ബീറ്റിൽസ്, എന്നായിരുന്നു കൂപ്പറിന്റെ വാക്കുകൾ.
മികച്ച ലിമിറ്റഡ് ഡ്രാമ, മികച്ച നടൻ (സ്റ്റീഫൻ ഗ്രഹാം), മികച്ച സഹനടി (ക്രിസ്റ്റിൻ ട്രെമാർക്കോ) എന്നിവയാണ് 'അഡോളസെൻസി'ന് ലഭിച്ച മറ്റ് പുരസ്കാരങ്ങൾ. ഏഴ് തവണ നാമനിർദേശം ചെയ്യപ്പെട്ടതിനു ശേഷമാണ് സ്റ്റീഫന് ഗ്രഹാമിന് തന്റെ ആദ്യ ബാഫ്റ്റ പുരസ്കാരം ലഭിക്കുന്നത്. ഈ സീരീസിന്റെ സഹ സ്രഷ്ടാവും കൂടിയാണ് ഇദ്ദേഹം. സീരീസിൽ ഓവന്റെ കഥാപാത്രത്തിന്റെ പിതാവിന്റെ വേഷത്തിലാണ് സ്റ്റീഫൻ എത്തിയത്. മാതാവിന്റെ വേഷമാണ് ക്രിസ്റ്റിൻ ട്രെമാർക്കോ അവതരിപ്പിച്ചത്.
2025 മാർച്ചിലാണ് 'അഡോളസെൻസ്' പുറത്തിറങ്ങിയത്. നാല് എപ്പിസോഡുകളുള്ള പരമ്പരയുടെ പ്രമേയവും ഓവന്റെ അസാധാരണ പ്രകടനവുമാണ് സീരീസിന് ആഗോള ശ്രദ്ധ നേടിക്കൊടുത്തത്. ജെയ്മി മില്ലർ എന്ന കഥാപാത്രത്തിലൂടെ എമ്മി, ഗോൾഡൻ ഗ്ലോബ്, ക്രിട്ടിക്സ് ചോയ്സ്, ഗോതം, ഇൻഡിപെൻഡന്റ് സ്പിരിറ്റ് എന്നീ പുരസ്കാരങ്ങളും കൂപ്പറിനെ തേടിയെത്തിയിരുന്നു.
മികച്ച ലിമിറ്റഡ് ഡ്രാമ: അഡോളസെൻസ്
മികച്ച നടൻ: സ്റ്റീഫൻ ഗ്രഹാം (അഡോളസെൻസ്)
മികച്ച നടി: നർഗസ് റാഷിദി (പ്രിസണർ 951)
മികച്ച സഹനടൻ: ഓവൻ കൂപ്പർ (അഡോളസെൻസ്)
മികച്ച സഹനടി: ക്രിസ്റ്റിൻ ട്രെമാർക്കോ (അഡോളസെൻസ്)
മികച്ച ഡ്രാമ സീരീസ്: കോഡ് ഓഫ് സൈലൻസ് (Code of Silence)
മികച്ച ഹാസ്യ നടൻ: സ്റ്റീവ് കൂഗൻ (How Are You? Its Alan)
മികച്ച ഹാസ്യ നടി: കാതറിൻ പാർക്കിൻസൺ (Here We Go)
മികച്ച സ്ക്രിപ്റ്റഡ് കോമഡി: അമൻഡലാൻഡ്
മികച്ച അന്താരാഷ്ട്ര പരമ്പര: ദ സ്റ്റുഡിയോ (The Studio)
മികച്ച റിയാലിറ്റി ഷോ: ദ സെലിബ്രിറ്റി ട്രെയ്റ്റേഴ്സ്
മികച്ച എന്റർടെയ്ൻമെന്റ് പെർഫോമൻസ്: ബോബ് മോർട്ടിമർ
മികച്ച വാർത്താ കവറേജ്: ചാനൽ 4 ന്യൂസ് (ഇസ്രയേൽ-ഇറാൻ യുദ്ധം)
മികച്ച സ്പോർട്സ് കവറേജ്: യുവേഫ വുമൺസ് യൂറോ 2025
മികച്ച സോപ്പ് ഓപ്പറ: ഈസ്റ്റ് എൻഡേഴ്സ്
പ്രത്യേക പുരസ്കാരങ്ങൾ:
ബാഫ്റ്റ ഫെലോഷിപ്പ്: ഡേം മേരി ബെറി (ടെലിവിഷൻ രംഗത്തെ സമഗ്ര സംഭാവന).
ബാഫ്റ്റ സ്പെഷ്യൽ അവാർഡ്: മാർട്ടിൻ ലൂയിസ് (ബ്രിട്ടീഷ് ഉപഭോക്താക്കൾക്കിടയിൽ ചെലുത്തിയ സ്വാധീനം).