തിരുവനന്തപുരം: പ്രഥമ പി.കെ. റോസി ചലച്ചിത്ര പുരസ്കാരം പ്രശാന്ത് ഈഴവന്. പി. കെ. റോസി ഫൗണ്ടേഷനാണ് പുരസ്കാരം ഏർപ്പെടുത്തിയത്. 25000 രൂപയും പ്രശസ്തി പത്രവുമടങ്ങുന്നതാണ് പുരസ്കാരം. മുന്നോക്ക സംവരണത്തെ (ഇഡബ്ലിയു എസ്) കേരളത്തിൻ്റെ സാമൂഹ്യ പശ്ചാത്തലത്തിൽ പ്രമേയമാക്കി തയ്യാറാക്കപ്പെട്ട 'ഒരുജാതി പിള്ളേരിഷ്ടാ' എന്ന സിനിമയുടെ സംവിധായനാണ് പ്രശാന്ത് ഈഴവൻ.
മുന്നോക്ക സംവരണം നടപ്പാക്കിയതിൻ്റെ പശ്ചാത്തലത്തിൽ ദളിത് –ബഹുജൻ വിദ്യാർഥികളുടെ ജീവിതത്തിൽ ഉണ്ടാകുന്ന പ്രത്യാഘാതങ്ങളാണ് ഈ സിനിമയുടെ പ്രമേയം. സിനിമയെ സാമൂഹിക പരിവർത്തനത്തിനുള്ള സന്ദേശമായി അവതരിപ്പിക്കുകയാണ് ഈ സിനിമയിലൂടെ പ്രശാന്ത് ചെയ്യുന്നത്.
ധാരാളം സിനിമകളുടെ സഹസംവിധായകനായി പ്രവർത്തിച്ചിട്ടുള്ള പ്രശാന്ത് ഈഴവൻ്റെ സ്വതന്ത്ര സംവിധാനത്തിലെ ആദ്യ സിനിമയാണ്' ഒരു ജാതി പിള്ളേരിഷ്ട'. കൊടുങ്ങല്ലൂർ മാടത്തിങ്കൾ പുഷ്പാകരൻ–ബേബി ദമ്പതികളുടെ മകനായ പ്രശാന്ത് ഈഴവൻ, എഐഎസ്എഫ് മുൻ തൃശൂർ ജില്ലാ പ്രസിഡൻ്റായും, കാലിക്കറ്റ് സർവകലാശാല യൂണിയൻ ജോയിൻ്റ് സെക്രട്ടറിയായും പ്രവർത്തിച്ചിട്ടുണ്ട്. വിദ്യാർഥി–യുവജന രാഷ്ട്രീയത്തിൽ ശ്രദ്ധേയമായ ഇടപെടലുകൾ നടത്തിയ വ്യക്തികൂടിയാണ്.