പ്രണയം നിറച്ച, കവിത തുളുമ്പുന്ന വരികളും ഈണവുമായി ആസ്വാദക ഹൃദയങ്ങള്‍ കവര്‍ന്ന് 'റേച്ചലി'ലെ ആദ്യ ഗാനം ശ്രദ്ധേയമാകുന്നു. ആദ്യ കേള്‍വിയില്‍ തന്നെ ഏവരുടേയും ഹൃദയം കവരുന്ന വരികളും വേറിട്ട ഈണവുമായി എത്തിയിരിക്കുകയാണ് 'കണ്ണില്‍ മാരിവില്ലിന്‍ ചെണ്ട്...' എന്ന് തുടങ്ങുന്ന ഗാനം. 'റേച്ചലി'ലെ നായികയായ ഹണി റോസും നായകന്‍ റോഷന്‍ ബഷീറും ബാബുരാജുമൊക്കെയാണ് ഗാനരംഗത്തിലുള്ളത്. ചിത്രം ഡിസംബര്‍ ആറിന് അഞ്ച് ഭാഷകളില്‍ തിയേറ്ററുകളിലെത്താനായി ഒരുങ്ങുകയാണ്.
ആഴമുള്ള വരികളും മനം കവരുന്ന ഈണവുമാണ് ഈ ഗാനത്തെ വേറിട്ടതാക്കുന്നത്. 'ഉടലിലാകെ ഒഴുകണ നദിയായ് നീ... ഉയിരിലാകെ നിറയണ തുഴയായ് നീ...' എന്ന വരികളില്‍ നദിപോലെ ഒഴുകി പരക്കുന്ന പ്രണയിനിയുടെ ഉയിരില്‍ തുഴപോലെ തഴുകുന്ന കാമുകനെ വര്‍ണ്ണിച്ചിരിക്കുന്ന ഭാഗം ഏറെ മനോഹരമാണ്. രാഹുല്‍ മണപ്പാട്ടിന്റെ പ്രണയച്ചൂരുള്ള വരികള്‍ക്ക് വ്യത്യസ്തമായതും ആകര്‍ഷകവുമായ ഈണം നല്‍കിയിരിക്കുന്നത് ഇഷാന്‍ ഛബ്രയാണ്. അഹി അജയനും ജീവന്‍ പത്മകുമാറും ചേര്‍ന്നാണ് വരികളുടെ ആത്മാവറിഞ്ഞുകൊണ്ട് ഈ ഗാനം ആലപിച്ചിരിക്കുന്നത്.
സമാനതകളില്ലാത്ത ധൈര്യവും എന്തിനും പോന്ന ചങ്കൂറ്റവുമുള്ളൊരു പെണ്ണാണ് ചിത്രത്തിലെ നായിക റേച്ചല്‍. അവളുടെ മനം കവര്‍ന്ന കാമുകനാണ് തന്റെ അപ്പന്‍ പോത്തുപാറ ജോയിച്ചനോടൊപ്പം പണിക്ക് നില്‍ക്കുന്ന നിക്കോളാസ്... റേച്ചലിന്റെ ഹൃദയത്തിലിടം നേടിയ സുന്ദരന്‍. ഗാനത്തിലെ 'പ്രാണനാകെ നീ....പാതിയായ് നീ...' എന്ന വരികളില്‍ ഇവരുടെ പ്രണയത്തിന്റെ ആഴം വായിച്ചെടുക്കാനാകും. ചിത്രത്തില്‍ റേച്ചലായി എത്തിയിരിക്കുന്നത് ഹണി റോസും നിക്കോളാസായി എത്തിയിരിക്കുന്നത് 'ദൃശ്യം' സിനിമയിലൂടെ ശ്രദ്ധേയനായ റോഷന്‍ ബഷീറുമാണ്. അപ്പന്റെ കണ്ണുവെട്ടിച്ച് പരസ്പരം പ്രണയം പങ്കുവയ്ക്കാനുള്ള ഇവരുടെ അടങ്ങാത്ത ആഗ്രഹമാണ് പാട്ടില്‍ ദൃശ്യവത്കരിച്ചിരിക്കുന്നത്.
പ്രണയവും നൊമ്പരവും പകയും സംഘര്‍ഷവും രക്തചൊരിച്ചിലും എല്ലാം ചേര്‍ന്നൊരു ചിത്രമാകും 'റേച്ചല്‍' എന്ന് ട്രെയിലര്‍ ഇതിനകം സൂചന നല്‍കിയിട്ടുണ്ട്. പാലായില്‍ നിന്നെത്തിയ വേട്ടക്കാരന്‍ പോത്തുപാറ ജോയിച്ചന്റെ മകള്‍ റേച്ചലായി കരിയറില്‍ ഇതുവരെ കാണാത്ത വേഷപ്പകര്‍ച്ചയില്‍ ഹണി റോസ് ഞെട്ടിക്കുമെന്ന് ട്രെയിലറിലെ ചില രംഗങ്ങള്‍ അടിവരയിടുന്നുണ്ട്. മലയാളത്തിലെ ശ്രദ്ധേയ സംവിധായകനായ എബ്രിഡ് ഷൈന്‍ സഹനിര്‍മ്മാതാവും സഹ രചയിതാവുമാകുന്ന ചിത്രം സംവിധാനം ചെയ്തിരിക്കുന്നത് പുതുമുഖ സംവിധായികയായ ആനന്ദിനി ബാലയാണ്.
രണ്ട് പതിറ്റാണ്ടായി സിനിമാലോകത്തുള്ള ഹണി റോസ് ഇറച്ചി വെട്ടുകാരിയായി ഏറെ വ്യത്യസ്തമായ വേഷപ്പകര്‍ച്ചയില്‍ എത്തുന്ന ചിത്രമെന്നതാണ് സിനിമയുടെ ഹൈലൈറ്റ്. ജോയിച്ചനായി ബാബുരാജും ശ്രദ്ധേയ വേഷത്തിലുണ്ട്. പോത്ത് ചന്തയില്‍ നില്‍ക്കുന്ന ഹണി റോസിനെ അവതരിപ്പിച്ചുകൊണ്ടുള്ള സിനിമയുടെ ആദ്യ പോസ്റ്ററുകള്‍ വലിയ സ്വീകാര്യത നേടിയിരുന്നു. സിനിമയുടെ ടീസറും ഏവരും ഏറ്റെടുത്തിരുന്നു. ഏറെ വയലന്‍സും രക്തച്ചൊരിച്ചിലും അഭിനയ മുഹൂര്‍ത്തങ്ങളും നിറഞ്ഞ വ്യത്യസ്തമായൊരു അനുഭവമായിരിക്കും ചിത്രമെന്നാണ് ട്രെയിലറും നല്‍കുന്ന സൂചന. മലയാളം കൂടാതെ കന്നഡ, തെലുങ്ക്, തമിഴ്, ഹിന്ദി ഭാഷകളിലും ചിത്രം പുറത്തിറങ്ങുന്നുണ്ട്.
ഹണി റോസിനേയും ബാബുരാജിനേയും കൂടാതെ റോഷന്‍ ബഷീര്‍, ചന്തു സലിംകുമാര്‍, രാധിക രാധാകൃഷ്ണന്‍, ജാഫര്‍ ഇടുക്കി, വിനീത് തട്ടില്‍, ജോജി, ദിനേശ് പ്രഭാകര്‍, പോളി വത്സന്‍, വന്ദിത മനോഹരന്‍ തുടങ്ങി വലിയൊരു താരനിരയും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്. ഒരു റിവഞ്ച് ത്രില്ലറായാണ് ചിത്രം ഒരുങ്ങുന്നതെന്നാണ് അറിയാനാകുന്നത്.
ബാദുഷാസ് സില്‍വര്‍ സ്‌ക്രീന്‍ എന്റര്‍ടെയ്ന്‍മെന്റിന്റെ ബാനറില്‍ മഞ്ജു ബാദുഷ, ഷാഹുല്‍ ഹമീദ്, രാജന്‍ ചിറയില്‍ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. രാഹുല്‍ മണപ്പാട്ടിന്റെ കഥയ്ക്ക് രാഹുല്‍ മണപ്പാട്ടും എബ്രിഡ് ഷൈനും ചേര്‍ന്ന് തിരക്കഥയൊരുക്കുന്നു. ദേശീയ സംസ്ഥാന ചലച്ചിത്ര അവാര്‍ഡ് ജേതാക്കളായ പ്രഗത്ഭര്‍ റേച്ചലിന്റെ സാങ്കേതികമേഖലയില്‍ അണിനിരക്കുന്നുണ്ട്. ശ്രീ പ്രിയ കമ്പയിന്‍സിലൂടെ ബാദുഷാസ് സില്‍വര്‍ സ്‌ക്രീന്‍ എന്റര്‍ടെയ്ന്‍മെന്റ് ആണ് ചിത്രത്തിന്റെ വിതരണം നിര്‍വ്വഹിക്കുന്നത്.
സംഗീതം, പശ്ചാത്തലസംഗീതം: ഇഷാന്‍ ഛബ്ര, എഡിറ്റര്‍: മനോജ്, ഛായാഗ്രഹണം: സ്വരൂപ് ഫിലിപ്പ്, പ്രൊഡക്ഷന്‍ ഡിസൈനര്‍: സുജിത്ത് രാഘവ്, സൗണ്ട് ഡിസൈന്‍: ശ്രീ ശങ്കര്‍, സൗണ്ട് മിക്‌സ്: രാജകൃഷ്ണന്‍ എം ആര്‍, എക്‌സിക്യൂട്ടീവ് പ്രൊഡ്യൂസേഴ്‌സ്: ഷെമി ബഷീര്‍, ഷൈമാ മുഹമ്മദ് ബഷീര്‍, ചീഫ് അസോസിയേറ്റ് ഡയറക്ടര്‍: രതീഷ് പാലോട്, സംഘട്ടനം: രാജശേഖര്‍, മാഫിയ ശശി, പി സി സ്റ്റണ്ട്‌സ്, അഷ്‌റഫ് ഗുരുക്കള്‍, മേക്കപ്പ്: രതീഷ് വിജയന്‍, രാജേഷ് നെന്മാറ, കോസ്റ്റ്യൂംസ്: ജാക്കി, കോ പ്രൊഡ്യൂസര്‍: ഹനാന്‍ മരമുട്ടം, അര്‍ജുന്‍ ജീവ, ലൈന്‍ പ്രൊഡ്യൂസേഴ്‌സ്: പ്രിജിന്‍ ജെ പി, മാത്യു കോന്നി, ഫിനാന്‍സ് കണ്‍ട്രോളര്‍: റോബിന്‍ അഗസ്റ്റിന്‍, പ്രോജക്ട് കോര്‍ഡിനേറ്റര്‍: പ്രിയദര്‍ശിനി പി.എം, പ്രൊഡക്ഷന്‍ കണ്‍ട്രോളര്‍: പ്രവീണ്‍ ബി മേനോന്‍, പ്രൊഡക്ഷന്‍ എക്‌സിക്യൂട്ടീവ്: സക്കീര്‍ ഹുസൈന്‍, ഗാനരചന: ബി.കെ ഹരിനാരായണന്‍, വിനായക് ശശികുമാര്‍, രാഹുല്‍ മണപ്പാട്ട്, പബ്ലിസിറ്റി ഡിസൈന്‍: ടെന്‍ പോയിന്റ്, സ്റ്റില്‍സ്: നിദാദ് കെ എന്‍, വിഎഫ്എക്‌സ്: ലൈവ് ആക്ഷന്‍ സ്റ്റുഡിയോസ്, ഡിഐ: ഇന്‍ഡ്യന്‍ സിനിമ കമ്പനി, ടീസര്‍ കട്ട്: ബെന്‍ ഷെരിന്‍ ബി, ട്രെയിലര്‍ കട്ട്: ഡോണ്‍ മാക്‌സ്, ടീസര്‍ സബ്‌ടൈറ്റില്‍: വിവേക് രഞ്ജിത്ത്, ലീഗല്‍ അഡൈ്വസര്‍ മുഹമ്മദ് സിയാദ്, ഡിജിറ്റല്‍ മാര്‍ക്കറ്റിങ് ഒബ്‌സ്‌ക്യൂറ എന്റര്‍ടെയ്ന്‍മെന്റ്, പി ആര്‍ ഒ: എ എസ് ദിനേശ്, ആതിര ദില്‍ജിത്ത്, അനൂപ് സുന്ദരന്‍.