തലശേരി ബിഷപ്പ് മാർ ജോസഫ് പാംപ്ലാനിക്കെതിരെ ഡിവൈഎഫ്ഐ. പാംപ്ലാനി പിതാവിന് നിയോ മുള്ളറുടെ അവസ്ഥയുണ്ടാകുമെന്ന് സംസ്ഥാന സെക്രട്ടറി വി കെ സനോജ്. ജയിലിൽ അടക്കുന്നതുവരെ ഹിറ്റ്ലറെ വാഴ്ത്തിപാടിയ ആളാണ് നിയോ മുള്ളർ. ചില പിതാക്കന്മാർ ഇപ്പോൾ ആർ എസ് എസിന് കുഴലൂത്ത് നടത്തുകയാണെന്നും സനോജ് പറഞ്ഞു.
കേരള കോൺഗ്രസ് എമ്മിന് എതിരായ വിമർശനങ്ങളിൽ സിപിഐക്ക് മറുപടിയുമായി മന്ത്രി റോഷി അഗസ്റ്റിൻ. ഇടതുമുന്നണിയിൽ കേരള കോൺഗ്രസിന്റെ പങ്ക് ചെറുതല്ലെന്നായിരുന്നു റോഷി അഗസ്റ്റിൻ്റെ പ്രസ്താവന. കേരള കോൺഗ്രസിന്റെ മുന്നണി പ്രവേശനം ഇടതുമുന്നണിയെ ശക്തിപ്പെടുത്തിയിട്ടുണ്ടെന്നും റോഷി അഗസ്റ്റിൻ പറഞ്ഞു. അതേസമയം ജോസ് കെ. മാണി കടുത്തുരുത്തിയിൽ മത്സരിക്കാനുള്ള സാധ്യത തള്ളാതെയുമായിരുന്നു റോഷി അഗസ്റ്റിന്റെ പ്രതികരണം.
കേന്ദ്രമന്ത്രി സുരേഷ് ഗോപിയെ കാണാനില്ലെന്ന പരാതിയുമായി കെഎസ്‌യു നേതാവ്. കെഎസ്‌യു ജില്ലാ പ്രസിഡന്റ് ഗോകുൽ ഗുരുവായൂരാണ് സുരേഷ് ഗോപിയെ കാണാനില്ലെന്ന് തൃശൂർ ഈസ്റ്റ് പൊലീസിൽ പരാതി നൽകിയത്. കന്യാസ്ത്രീമാർക്കെതിരെ അതിക്രമം ഉണ്ടായത് മുതൽ കേന്ദ്രമന്ത്രി സുരേഷ് ഗോപിയെ കാണാനില്ലെന്നാണ് പരാതി.
ഷാർജയിലെ ഫ്ലാറ്റിൽ മരിച്ച നിലയിൽ കണ്ടെത്തിയ അതുല്യയുടെ ഭർത്താവ് സതീഷിന് മുൻകൂർ ജാമ്യം. അതുല്യയുടേത് കൊലപാതകമാണെന്നതിന് നിലവിൽ തെളിവുകൾ ഇല്ലെന്ന് കോടതി. ദുബായ് പൊലീസ് സതീഷ് കുറ്റക്കാരനാണെന്ന് കണ്ടെത്തിയിട്ടില്ലെന്നും ചൂണ്ടിക്കാട്ടിയാണ് കൊല്ലം ജില്ലാ കോടതി മുൻകൂർ ജാമ്യം അനുവദിച്ചത്. അന്വേഷണത്തിൽ പുരോഗതി ഉണ്ടാകുന്നത് വരെ ഇടക്കാല മുൻകൂർ ജാമ്യം തുടരുമെന്നും കോടതി അറിയിച്ചു.
ചെന്നൈ: തിരുവനന്തപുരം-ഡൽഹി വിമാനത്തിന് ചെന്നൈ വിമാനത്താവളത്തിൽ അടിയന്തര ലാൻഡിങ്. റഡാറുമായുള്ള ബന്ധത്തിൽ തകരാർ നേരിട്ടതിനെ തുടർന്നാണ് വിമാനത്തിന് അടിയന്തര ലാൻഡിങ് നടത്തിയത്. എയർ ഇന്ത്യ 2455 വിമാനത്തിനാണ് അടിയന്തര ലാൻഡിങ് നടത്തിയത്.
യാത്രക്കാരിൽ കേരളത്തിൽ നിന്നുള്ള അഞ്ച് എംപിമാരും ഉണ്ടായിരുന്നു. കെ.സി. വേണുഗോപാൽ, കൊടിക്കുന്നിൽ സുരേഷ്, അടൂർ പ്രകാശ്, കെ. രാധാകൃഷ്ണൻ, റോബർട്ട് ബ്രൂസ് എന്നിവരാണ് ഉണ്ടായിരുന്നത്.
ഒരു മണിക്കൂർ പറന്ന ശേഷമാണ് സിഗ്നൽ തകരാർ കണ്ടെത്തിയത്. റഡാർ ബന്ധത്തിൽ തകരാർ ഉണ്ടെന്ന് പൈലറ്റ് അനൗൺസ് ചെയ്കയായിരുന്നു. 7:45ന് ശേഷമാണ് തിരുവനന്തപുരത്ത് നിന്ന് വിമാനം പുറപ്പെട്ടത്.