കോഴിക്കോട്: ആവശ്യത്തിന് ഡോക്ടർമാരും പരിശോധന സംവിധാനങ്ങളും ഇല്ലാതെ കടുത്ത പ്രതിസന്ധിയിലൂടെ കടന്നു പോകുകയാണ് കോഴിക്കോട് മെഡിക്കൽ കോളേജ്. രാത്രിയിൽ ആശുപത്രിയിൽ വരുന്ന രോഗികൾക്ക് മണിക്കൂറുകൾ ആണ് ഡോക്ടറെ കാത്തിരിക്കേണ്ടിവരുന്നത്.
ആവശ്യത്തിന് ഡോക്ടർമാരില്ലാത്തതും, പരിശോധനാ സംവിധാനങ്ങൾ തകരാറിലായതും, കടുത്ത മരുന്ന് ക്ഷാമവും ആശുപത്രിയുടെ പ്രവർത്തനത്തെ സാരമായി ബാധിച്ചിട്ടുണ്ട്. സീനിയർ ഡോക്ടർമാരുടെ കാലാവധി അവസാനിച്ചതും പുതിയ ഒഴിവുകൾ കൃത്യസമയത്ത് നികത്താത്തതുമാണ് പ്രധാന കാരണം.
അനസ്‌തേഷ്യ വിഭാഗം ഉൾപ്പെടെയുള്ള പല അത്യാഹിത-ശസ്ത്രക്രിയാ വിഭാഗങ്ങളിലും ഡോക്ടർമാരുടെ വലിയ ക്ഷാമമുണ്ട്. ഡോക്ടർമാരില്ലാത്തതിനാൽ മുൻകൂട്ടി നിശ്ചയിച്ച ശസ്ത്രക്രിയകൾ പോലും മാറ്റിവെക്കേണ്ടി വരുന്ന സാഹചര്യമാണ് നിലവിലുള്ളത്. കൂടാതെ ആശുപത്രിയിലെ പ്രധാന എക്സ്-റേ ഉൾപ്പെടെയുള്ള രോഗനിർണയ സംവിധാനങ്ങൾ മാസങ്ങളായി തകരാറിലാണ്.
ഇതുമൂലം പാവപ്പെട്ട രോഗികൾക്ക് വലിയ തുക നൽകി പുറത്തുനിന്ന് പരിശോധനകൾ നടത്തേണ്ടി വരുന്നു. ഹൃദ്രോഗം, പ്രമേഹം, ഉയർന്ന രക്തസമ്മർദ്ദം തുടങ്ങിയ വിട്ടുമാറാത്ത രോഗങ്ങൾക്കുള്ള അത്യാവശ്യ മരുന്നുകൾ പോലും ആശുപത്രി ഫാർമസികളിൽ ലഭ്യമല്ല. കേരള മെഡിക്കൽ സർവീസ് കോർപ്പറേഷന് സർക്കാർ നൽകാനുള്ള വലിയ തുകയുടെ കുടിശ്ശിക കാരണം മരുന്ന് വിതരണക്കാർ സഹകരിക്കാത്തതാണ് ഈ പ്രതിസന്ധിക്ക് വഴിവെച്ചതെന്നും ആക്ഷേപമുണ്ട്.