കാഠ്മണ്ഡു: നേപ്പാളിലെ ഗൂർഖ ജില്ലയിലെ ബുധി ഗന്ധകി നദിയിലുണ്ടായ വെള്ളപ്പൊക്കത്തിൽ ഞായറാഴ്ച പുലർച്ചെ നിരവധി വീടുകൾ ഒലിച്ചുപോയി. ഇതുവരെ മരണങ്ങളോ പരിക്കുകളോ റിപ്പോർട്ട് ചെയ്തിട്ടില്ല. ഞെട്ടിക്കുന്ന മലവെള്ളപ്പാച്ചിലിൻ്റെ ദൃശ്യങ്ങളും സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
ജഗത്തിലെ നദീതടത്തിലെ അഞ്ച് മുതൽ ഏഴ് വരെ വീടുകൾ ഒലിച്ചുപോയതായും താഴ്‌വരയിലെ ഏതാനും വീടുകൾ കൂടി ഒലിച്ചുപോയിരിക്കാൻ ഇടയുണ്ടെന്നും ഗൂർഖ ചീഫ് ജില്ലാ ഓഫീസർ ധർമേന്ദ്ര കുമാർ മിശ്ര പറഞ്ഞു. ഇന്ന് പുലർച്ചെ 4.35ന് വലിയ വെള്ളപ്പൊക്കം ഉണ്ടായെന്ന സന്ദേശം ലഭിച്ചതായി ഗൂർഖ ചീഫ് ജില്ലാ ഓഫീസർ ധർമേന്ദ്ര കുമാർ മിശ്ര പറഞ്ഞു. തുടർന്ന് നദിക്കരയിൽ താമസിക്കുന്നവരോട് ഉയർന്ന സ്ഥലങ്ങളിലേക്ക് മാറാൻ ഉദ്യോഗസ്ഥർ ആവശ്യപ്പെട്ടു.
ചുംനുബ്രി റൂറൽ മുനിസിപ്പാലിറ്റി 6ൽ നിന്നാണ് വെള്ളപ്പൊക്കം ഉണ്ടായത്. സിയുരിബാസിന് മുകളിൽ മണ്ണിടിച്ചിലുണ്ടെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നതെന്ന് മിശ്ര പറഞ്ഞു. മണ്ണിടിച്ചിലിനെ തുടർന്ന് ചുംകെ ഖോല നദിയുടെ ഒഴുക്ക് തടസ്സപ്പെട്ടുവെന്നും തുടർന്ന് വെള്ളപ്പൊക്കമുണ്ടായെന്നും റൂറൽ മുനിസിപ്പാലിറ്റി ചെയർപേഴ്സൺ നിമ ലാമ പറഞ്ഞു.
നദിയുടെ താഴ്‌വരയിലുള്ള സല്ലേരി, ജഗത് ബസാർ എന്നിവ അപകടത്തിലാണെന്നും, പ്രളയജലം കണ്ട് ചിലർ വീടുകൾ വിട്ടു ഓടിരക്ഷപ്പെട്ടിട്ടുണ്ടെന്നും നാട്ടുകാർ പറഞ്ഞു. വെള്ളം ഉയർന്നതോടെ ചുംലിംഗ്, ലോക്പ എന്നിവ ഉൾപ്പെടെയുള്ള നദീതീര ജനവാസ കേന്ദ്രങ്ങളിലെ താമസക്കാരും മാറിത്താമസിച്ചു.