ബ്രസീലിയ: ബ്രസീൽ പ്രസിഡന്റ് തെരഞ്ഞെടുപ്പിലെ കനത്ത തോൽവിക്ക് പിന്നാലെ സുപ്രീം കോടതിയുടെ അറസ്റ്റും യാത്രാവിലക്കും ഭയന്ന് മുൻ പ്രസിഡന്റ് ജെയർ ബോൾസൊനാരോയുടെ മകനും വലതുപക്ഷ സ്ഥാനാർത്ഥിയുമായ ഫ്ലാവിയോ ബോൾസൊനാരോ സിനിമകളെ വെല്ലുന്ന രീതിയിൽ രാജ്യം വിട്ടതിന്റെ അവിശ്വസനീയ വിവരങ്ങൾ പുറത്ത് . ഫെഡറൽ പോലീസിനെയും രഹസ്യാന്വേഷണ ഏജൻസികളെയും കബളിപ്പിക്കാൻ വ്യാജ നമ്പര്‍ പ്ലേറ്റ് ഘടിപ്പിച്ച വാഹനങ്ങളും ആളുകളെയും വഴിതിരിച്ചുവിട്ട ശേഷമാണ് അർജന്റീന വഴി ചാർട്ടേഡ് പ്രൈവറ്റ് ജെറ്റ് വിമാനത്തിൽ ഫ്ലാവിയോ കുടുംബസമേതം അമേരിക്കയിലെ ഫ്ലോറിഡയിലേക്ക് പറന്നത്.
വൈറ്റ് ഹൗസിലെ വിശ്വസ്ത സുഹൃത്തായ യുഎസ് പ്രസിഡന്റ് ഡൊണാൾഡ് ട്രംപിന്റെയും ഭരണകൂടത്തിന്റെയും ശക്തമായ ഒത്താശയോടെയാണ് ഈ രക്ഷപ്പെടൽ അരങ്ങേറിയതെന്ന് വാൾസ്ട്രീറ്റ് ജേണലിനെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്തു. നിലവിലെ പ്രസിഡന്റ് ലൂയിസ് ഇനാഷ്യോ ലുല ഡ സിൽവയോട് തെരഞ്ഞെടുപ്പിൽ പരാജയപ്പെട്ടതിന് തൊട്ടുപിന്നാലെ, കള്ളപ്പണം വെളുപ്പിക്കൽ കേസുകളിലും തെരഞ്ഞെടുപ്പ് അട്ടിമറി നീക്കങ്ങളിലും പങ്കുണ്ടെന്ന് കാട്ടി ഫ്ലാവിയോയുടെ പാസ്‌പോർട്ട് കണ്ടുകെട്ടാനും രാജ്യം വിടുന്നത് തടയാനും ബ്രസീൽ സുപ്രീം കോടതി ജസ്റ്റിസ് അലക്സാന്ദ്രെ ഡി മൊറേസ് ഉത്തരവിട്ടിരുന്നു.
എന്നാൽ ഉത്തരവ് കൈപ്പറ്റുന്നതിന് മുൻപ് തന്നെ അതീവ രഹസ്യമായി നീങ്ങിയ ഫ്ലാവിയോ, പോലീസിന്റെ നിരീക്ഷണം വെട്ടിച്ച് ബ്രസീലിയൻ ചെക്ക്‌പോസ്റ്റുകൾ ഒഴിവാക്കി കരമാർഗ്ഗം അയൽരാജ്യമായ അർജന്റീനയിലേക്ക് കടക്കുകയായിരുന്നു. ഇറ്റാലിയൻ പൗരത്വമുള്ളതിനാൽ ഇറ്റാലിയൻ പാസ്‌പോർട്ട് ഉപയോഗിച്ച് അർജന്റീനയിൽ പ്രവേശിച്ച ഇദ്ദേഹം, അവിടെ നിന്ന് സജ്ജീകരിച്ചിരുന്ന പ്രത്യേക പ്രൈവറ്റ് ജെറ്റിൽ കയറി നേരെ മയാമിയിലെ ഓപ-ലോക്ക എക്സിക്യൂട്ടീവ് എയർപോർട്ടിൽ ഇറങ്ങുകയായിരുന്നു.
യാത്രാവിലക്കുള്ള വിദേശ രാഷ്ട്രീയ നേതാവിന് യുഎസ് സ്റ്റേറ്റ് ഡിപ്പാർട്ട്‌മെന്റ് അടിയന്തര വിസയും അഭയവും നൽകിയത് ട്രംപിന്റെ വ്യക്തിപരമായ താല്പര്യപ്രകാരമാണെന്ന് ആരോപണമുണ്ട്. മയാമിയിൽ സുരക്ഷിതമായി എത്തിയതിന് പിന്നാലെ, ബ്രസീലിൽ നടന്നത് കൃത്രിമം നിറഞ്ഞ തെരഞ്ഞെടുപ്പാണെന്നും താനാണ് രാജ്യത്തിന്റെ യഥാർത്ഥ ഭരണാധികാരിയെന്നും സ്വയം പ്രഖ്യാപിച്ച് ഫ്ലാവിയോ രംഗത്തെത്തിയത് ബ്രസീലിൽ വലിയ രാഷ്ട്രീയ കൊടുങ്കാറ്റിനാണ് തിരികൊളുത്തിയിരിക്കുന്നത്.
നീതിപീഠത്തിൽ നിന്നും നിയമനടപടികളിൽ നിന്നും ഒളിച്ചോടിയ പിടികിട്ടാപ്പുള്ളിയാണ് ഫ്ലാവിയോ ബോൾസൊനാരോയെന്നും, ഇയാളെ വിട്ടുകിട്ടാൻ നടപടികൾ സ്വീകരിക്കുമെന്നും ലുല ഭരണകൂടം വ്യക്തമാക്കിയതോടെ അമേരിക്കയും ബ്രസീലും തമ്മിലുള്ള നയതന്ത്ര ബന്ധം കൂടുതൽ കലുഷിതമായിരിക്കുകയാണ്.