വാഷിങ്ടൺ: ഏഴ് മാസമായി തുടരുന്ന യുദ്ധം അവസാനിപ്പിക്കാനും സമാധാനക്കരാറിലെത്താനും ഇറാൻ തങ്ങളുടെ യുറേനിയം സമ്പുഷ്ടീകരണ ശേഷി ഗണ്യമായി വെട്ടിച്ചുരുക്കണമെന്ന് യുഎസ് വൈസ് പ്രസിഡന്റ് ജെ.ഡി.വാൻസ്. റോയിട്ടേഴ്സിന് നൽകിയ പ്രത്യേക അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. വെറും വാക്കുകൾക്ക് പകരം ഇറാൻ തങ്ങളുടെ ആണവ പദ്ധതികളിൽ വ്യക്തമായ കുറവുവരുത്തുന്ന പ്രായോഗിക നടപടികളാണ് സ്വീകരിക്കേണ്ടതെന്ന് അദ്ദേഹം ആവശ്യപ്പെട്ടു.
ആണവായുധം നിർമ്മിക്കാൻ ഉദ്ദേശമില്ലെങ്കിൽ എന്തിനാണ് 60 ശതമാനം വരെ സമ്പുഷ്ടീകരിച്ച ഇന്ധനം കൈവശം വെക്കുന്നതെന്ന് വാൻസ് ചോദിച്ചു. ആണവായുധങ്ങൾ നിർമ്മിക്കില്ലെന്ന പ്രതിബദ്ധത തെളിയിക്കാൻ ഇറാൻ സമ്പുഷ്ടീകരണ ശേഷിയിൽ പ്രകടമായ കുറവുവരുത്തണം. യുദ്ധം അവസാനിപ്പിക്കുന്നതിനും തന്ത്രപ്രധാനമായ ഹോർമുസ് കടലിടുക്കിലൂടെയുള്ള അന്താരാഷ്ട്ര എണ്ണക്കപ്പൽ ഗതാഗതം പുനഃസ്ഥാപിക്കുന്നതിനുമായി ഇരുരാജ്യങ്ങളും തമ്മിൽ ചർച്ചകൾ നടത്തിയിരുന്നു. എന്നാൽ ഇറാൻ മുന്നോട്ടുവെച്ച ഏറ്റവും പുതിയ ഒത്തുതീർപ്പ് നിർദ്ദേശം പ്രസിഡന്റ് ഡൊണാൾഡ് ട്രംപ് തള്ളിക്കളയുകയായിരുന്നു. നവംബറിലെ ഇടക്കാല തെരഞ്ഞെടുപ്പിന് ശേഷം സൈനിക നടപടികൾ കൂടുതൽ ശക്തമാക്കുമെന്നും ട്രംപ് മുന്നറിയിപ്പ് നൽകിയിട്ടുണ്ട്.
ഇറാൻ പ്രസിഡന്റ് മസൂദ് പെസെഷ്കിയൻ, വിദേശകാര്യ മന്ത്രി അബ്ബാസ് അരാഗ്ചി എന്നിവരുമായി ചർച്ചകൾ നടക്കുന്നുണ്ടെങ്കിലും തെഹ്‌റാനിൽ അന്തിമ തീരുമാനങ്ങൾ കൈക്കൊള്ളുന്നത് ആരാണെന്ന കാര്യത്തിൽ വാഷിങ്ടണ് ഇപ്പോഴും വ്യക്തതയില്ലെന്നും വാൻസ് കൂട്ടിച്ചേർത്തു. പശ്ചിമേഷ്യയിലെ സംഘർഷങ്ങൾ കാരണം ആഗോള ഇന്ധനവിപണിയിൽ അസംസ്കൃത എണ്ണവില ഉയർന്നുനിൽക്കുന്നതും എണ്ണ വിതരണ ശൃംഖല നേരിടുന്ന തടസ്സങ്ങളും യുഎസിൽ വലിയ രാഷ്ട്രീയ-സാമ്പത്തിക ചർച്ചയായി മാറുന്നതിനിടയിലാണ് വൈസ് പ്രസിഡന്റിന്റെ ഈ പ്രസ്താവന.