എൻഡ്-ടു-എൻഡ് എൻക്രിപ്റ്റഡ് (E2EE) മെസേജിംഗ് ഫീച്ചർ നിർത്താനൊരുങ്ങി ഇൻസ്റ്റഗ്രാം. 2026 മെയ് 8 ന് ശേഷം ഈ ഫീച്ചർ നിർത്തുവാനാണ് ആപ്പ് ലക്ഷ്യമിടുന്നത്. ഒരു ബ്ലോഗ് പോസ്റ്റ് വഴിയാണ് പുതിയ മാറ്റം വരുന്ന കാര്യം മെറ്റ സ്ഥിരീകരിച്ചത്. ഉപയോക്താക്കളുടെ സ്വകാര്യത സംരക്ഷിക്കുന്നതിനായി 2023 ഡിസംബറിലാണ് ഇൻസ്റ്റഗ്രാം എൻഡ് ടു എൻഡ് എൻക്രിപ്റ്റഡ് ഫീച്ചർ കൊണ്ടുവന്നത്. ഫീച്ചർ നിർത്തലാക്കുന്നതോടെ ഇൻസ്റ്റാഗ്രാമിൽ അയയ്ക്കുന്ന സന്ദേശങ്ങൾ ഇനി എൻഡ്-ടു-എൻഡ് എൻക്രിപ്ഷൻ വഴി സംരക്ഷിക്കപ്പെടില്ല, അതായത് മെറ്റയ്ക്ക് ചാറ്റുകളുടെ ഉള്ളടക്കം ആക്സസ് ചെയ്യാൻ കഴിയും.
ഉപയോക്താക്കൾക്ക് നിലവിലുള്ള ഡാറ്റ എങ്ങനെ ഡൗൺലോഡ് ചെയ്യാം എന്നതിനെക്കുറിച്ചുള്ള നിർദേശങ്ങൾ നൽകുമെന്നും മെറ്റ ബ്ലോഗ് പോസ്റ്റിൽ വ്യക്തമാക്കിയിട്ടുണ്ട്. ആപ്പിൻ്റെ പഴയ പതിപ്പ് ഉപയോഗിക്കുന്ന ഉപയോക്താക്കൾക്ക് അവരുടെ ചാറ്റുകൾ ഡൗൺലോഡ് ചെയ്യുന്നതിന് മുമ്പ് അത് അപ്ഡേറ്റ് ചെയ്യേണ്ടി വന്നേക്കാം എന്നും പോസ്റ്റിൽ പറയുന്നു.
നിലവിൽ ഇൻസ്റ്റഗ്രാം മാത്രമാണ് ഈ ഫീച്ചർ നീക്കം ചെയ്യുന്നതായി അറിയിച്ചിട്ടുള്ളത് . അതേസമയം, മറ്റ് പ്രധാന മെസേജിംഗ് പ്ലാറ്റ്ഫോമുകളിൽ നിന്ന്, പ്രത്യേകിച്ച് ഫേസ്ബുക്ക് മെസഞ്ചറിൽ നിന്നോ വാട്സാപ്പിൽ നിന്നോ ഈ ഫീച്ചർ നീക്കം ചെയ്യുമോയെന്ന കാര്യത്തിൽ വ്യക്തതയില്ല.
ഇൻ്റർനെറ്റിൽ കുട്ടികളെ ലൈംഗികമായി ദുരുപയോഗം ചെയ്യുന്ന രീതി സംബന്ധിച്ച ആശങ്കകൾ വർധിച്ചുവരുന്ന സാഹചര്യത്തിലാണ് മെറ്റയുടെ പുതിയ തീരുമാനം. ഇൻസ്റ്റാഗ്രാമിലെ നേരിട്ടുള്ള സന്ദേശങ്ങളും കോളുകളും സ്കാൻ ചെയ്യുന്നതു വഴി CSAM, ഗ്രൂമിംഗ് അല്ലെങ്കിൽ മറ്റ് തരത്തിലുള്ള ചൂഷണം എന്നിവ കണ്ടെത്തുവാനും എൻഡ്-ടു-എൻഡ് എൻക്രിപ്ഷൻ നീക്കം ചെയ്യുന്നത് സഹായകമാകും.
യുഎസ്, യുകെ എന്നിവയുൾപ്പെടെ രാജ്യങ്ങളിലെ സർക്കാരുകളും യൂറോപ്യൻ യൂണിയനിലെ നയരൂപീകരണ വിഭാഗവും സ്വകാര്യ മെസേജിംഗ് സർവീസുകളിൽ ഇത്തരം ദോഷകരമായ ഉള്ളടക്കം തിരിച്ചറിഞ്ഞ് നീക്കം ചെയ്യാൻ സമ്മർദം ചെലുത്തുന്നുണ്ട്. യുകെയിലെ EU ചാറ്റ് കൺട്രോൾ റെഗുലേഷൻ പ്രൊപ്പോസൽ, ഓൺലൈൻ സുരക്ഷാ നിയമം 2023 തുടങ്ങിയ നിർദിഷ്ട നിയന്ത്രണങ്ങൾ അനുസരിച്ച് സ്വകാര്യ ആശയവിനിമയങ്ങളിൽ പോലും CSAM കണ്ടെത്തുന്നതിന് പ്ലാറ്റ്ഫോമുകൾ പരിശോധിക്കാൻ അധികാരികൾക്ക് കൂടുതൽ അധികാരങ്ങൾ നൽകും. എന്നിരുന്നാലും, ഇൻസ്റ്റാഗ്രാമിലെ മാറ്റത്തിന് പിന്നിലെ കാരണം മെറ്റ ഔദ്യോഗികമായി വെളിപ്പെടുത്തിയിട്ടില്ല.