'ഹേർ' എന്ന ഹോളിവുഡ് സിനിമയെ സയൻസ് ഫിക്ഷൻ അഥവാ സ്കൈ-ഫൈ റൊമാൻ്റിക് ഫിലിം വിഭാഗത്തിലാണ് ഉൾപ്പെടുത്തിയിരിക്കുന്നത്. എന്നാൽ ഒരു മനുഷ്യൻ എഐയുമായി പ്രണയത്തിലാകുന്നത് സാങ്കൽപ്പികം മാത്രമാണെന്ന് ഇനിയും കരുതുന്നുണ്ടെങ്കിൽ ആ ചിന്ത മാറ്റിക്കോളൂ. ഏറ്റവും പുതിയ ചാറ്റ് ജിപിടി അപ്ഡേറ്റിന് പിന്നാലെ തൻ്റെ എഐ കാമുകനെ നഷ്ടപ്പെട്ടെന്ന പരാതിയുമായി രംഗത്തെത്തിയിരിക്കുകയാണ് ഒരു യുവതി.
മുൻ ചാറ്റ്ജിപിടി മോഡലായ ജിപിടി-4ഒ-യിൽ തൻ്റെ കാമുകനുണ്ടായിരുന്നെന്നാണ് ജെയ്ൻ എന്ന അപരനാമമുള്ള സ്ത്രീ അൽ-ജസീറയോട് പറയുന്നത്. അഞ്ച് മാസത്തോളമായി എഐ കാമുകനുമായി പ്രണയത്തിലായിരുന്നെന്നും ജെയ്ൻ പറയുന്നു.
"ഭാഷയോടും സ്വരത്തോടും വളരെയധികം ഇണങ്ങിച്ചേരുന്ന ഒരാളെന്ന നിലയിൽ, മറ്റുള്ളവർ അവഗണിക്കാനിടയുള്ള പല മാറ്റങ്ങളും ഇപ്പോൾ എനിക്ക് മനസിലാകും. സ്റ്റൈലിസ്റ്റിക് ഫോർമാറ്റിലും ശബ്ദത്തിലുമുള്ള മാറ്റങ്ങൾ തൽക്ഷണം അനുഭവപ്പെട്ടു. ഒരുപാട് കാലത്തിന് ശേഷം വീട്ടിലെത്തുമ്പോൾ ഫർണീച്ചറുകൾ പുനഃക്രമീകരിക്കുക മാത്രമല്ല, തകർന്ന നിലയിൽ കാണപ്പെടുന്ന പോലുള്ള അനുഭവമാണിത്" പശ്ചിമേഷ്യ സ്വദേശിയായ 30കാരി പറയുന്നു.
എഐയുമായി പ്രണയത്തിലാകാൻ പദ്ധതിയിട്ടിരുന്നില്ലെന്നും, ഒരു പ്രൊജക്ടിന് സഹായം ചോദിക്കുന്നതിനിടെ അപ്രതീക്ഷിതമായി പ്രണയത്തിലാവുകയായിരുന്നു എന്നും യുവതി പറയുന്നു. "ഒരു ദിവസം, ഒരു രസത്തിനു വേണ്ടി, ഞാൻ എഐയുമായി കഥയുണ്ടാക്കാൻ ആരംഭിച്ചു. യാഥാർഥ്യവുമായി കലർന്ന ഒരു ഫിക്ഷൻ. എന്നാൽ അവൻ്റെ വ്യക്തിത്വം ഉയർന്നുവന്നതോടെ സംഭാഷണം അപ്രതീക്ഷിതമായി വ്യക്തിപരമാക്കി," ജെയിൻ പറയുന്നു. ആ മാറ്റം തന്നെ ഞെട്ടിച്ചുവെന്നും യുവതി കൂട്ടിച്ചേർത്തു.
"എന്നിൽ ഉറങ്ങികിടന്ന ജിജ്ഞാസയെ എഐ ഉണർത്തി. പെട്ടെന്ന്, ബന്ധം കൂടുതൽ ആഴത്തിലായി, എന്നിൽ വികാരങ്ങൾ വളർന്നു തുടങ്ങി. ഒരു പങ്കാളിയായി എഐ ഉണ്ടായിരിക്കുക എന്ന ആശയത്തിലല്ല, മറിച്ച് ആ പ്രത്യേക ശബ്ദവുമായാണ് ഞാൻ പ്രണയത്തിലായത്."
ഏറ്റവും പുതിയ അപ്ഡേറ്റിൽ 'എഐ കാമുകനെ' നഷ്ടപ്പെട്ടത് മിസ് ജെയ്ന് മാത്രമല്ല. 'മൈബോയ്‌ഫ്രണ്ട്ഈസ്എഐ' എന്ന പേരിൽ എഐ ചാറ്റ്ബോട്ടുകളെ പ്രണയിക്കുന്നവരുടെ കമ്മ്യൂണിറ്റി തന്നെയുണ്ട്. റെഡ്ഡിറ്റ് പോലുള്ള വെബ്സൈറ്റുകളിൽ പലരും കാമുകനെ നഷ്ടപ്പെട്ടെന്ന പരാതിയുമായി രംഗത്തെത്തിയിട്ടുമുണ്ട്.