കൊൽക്കത്തിയിലെ ആർ ജി കർ മെഡിക്കൽ കോളേജിലെ ജൂനിയർ ഡോക്ടറുടെ കൊലപാതകത്തിനു പിന്നാലെ പ്രതിഷേധിക്കുന്ന ഡോക്ടർമാരെ വീണ്ടും ചർച്ചക്ക് ക്ഷണിച്ച് മുഖ്യമന്ത്രി മമതാ ബാനർജി. വൈകിട്ട് അഞ്ച് മണിക്ക് മുഖ്യമന്ത്രിയുടെ വസതിയിൽ വെച്ച് കൂടിക്കാഴ്ച നടത്താൻ സന്നദ്ധത അറിയിച്ച് ചീഫ് സെക്രട്ടറി മനോജ് പന്ത് ഡോക്ടർമാർക്ക് കത്തയച്ചു. ഇതോടെ അഞ്ചാം തവണയാണ് ചർച്ചക്കായി സര്‍ക്കാര്‍ ഡോക്ടര്‍മാരെ വിളിപ്പിക്കുന്നത്.  മുഖ്യമന്ത്രിയുമായുള്ള ചർച്ചകൾ തത്സമയം സംപ്രേഷണം ചെയ്യണമെന്ന ഡോക്ടർമാരുടെ ആവശ്യം സർക്കാർ നിഷേധിച്ചതോടെ നേരത്തെ ചർച്ചകൾ മുടങ്ങിയിരുന്നു.

ഇത് അഞ്ചാമത്തെയും അവസാനത്തെയും തവണയാണ് ചർച്ചക്ക് ക്ഷണിക്കുന്നത്. മുഖ്യമന്ത്രിയുടെ കാളിഘട്ടിലെ വസതിയിൽ വൈകിട്ട് നടക്കുന്ന ചർച്ചയിൽ മമത ബനർജിയും പ്രതിനിധികളും പങ്കെടുക്കും. വീഡിയോ ചിത്രീകരിക്കാനോ, തത്സമയം സംപ്രേഷണം ചെയ്യനോ പാടില്ലെന്നും കത്തിൽ പറയുന്നു. സമരം അവസാനിപ്പിക്കുന്നതുമായി ബന്ധപ്പെട്ട് ഡോക്ടർമാർക്കിടയിൽ ഭിന്ന അഭിപ്രായം നിലനിൽക്കുന്നുണ്ടെന്ന ടിഎംസിയുടെ ആരോപണത്തിനു പിന്നാലെയാണ് ഇപ്പോൾ ചർച്ചക്ക് വിളിപ്പിച്ചിരിക്കുന്നത്. 

READ MORE: 'കൊൽക്കത്തയിലെ കൊലപാതകത്തെ ആത്മഹത്യയായി താഴ്ത്തികെട്ടാൻ ശ്രമിച്ചു'; സന്ദീപ് ഘോഷിനെതിരെ ഗുരുതര ആരോപണങ്ങളുമായി സിബിഐ

ചൊവ്വാഴ്ച വൈകുന്നേരം അഞ്ച് മണിക്ക് മുന്‍പ് ആശുപത്രി ജോലിയില്‍ തിരികെ പ്രവേശിക്കണമെന്ന സുപ്രീം കോടതിയുടെ അന്ത്യശാസനത്തിന് പിന്നാലെ യുവ ഡോക്ടർമാർ പ്രതിഷേധം കടുപ്പിച്ചിരുന്നു. ജൂനിയർ ഡോക്ടർമാർ പണിമുടക്കിയതിനാൽ പശ്ചിമ ബംഗാളില്‍ 23 പേർ മരിച്ചുവെന്നായിരുന്നു സർക്കാർ കോടതിയെ അറിയിച്ചിരുന്നത്. എന്നാൽ കോടതി നിർദേശത്തില്‍ ജൂനിയർ ഡോക്ടർമാരുടെ തീരുമാനം എന്താണെങ്കിലും അതിനെ പിന്തുണയ്ക്കുമെന്ന് ഇന്ത്യന്‍ മെഡിക്കല്‍ അസോസിയേഷന്‍റെ (ഐഎംഎ) ബംഗാള്‍ ഘടകം വാർത്താ സമ്മേളനത്തിലൂടെ അറിയിച്ചിരുന്നു.

READ MORE: കൊല്‍ക്കത്തയിലെ ഡോക്ടറുടെ കൊലപാതകം: അറസ്റ്റിലായ മുൻ പ്രിൻസിപ്പലും എസ്എച്ച്ഒയും സിബിഐ കസ്റ്റഡിയിൽ