കൊല്ലത്ത് ഉത്സവത്തോടനുബന്ധിച്ചുള്ള ഗാനമേളയിൽ ആർഎസ്എസിന്റെ ഗണഗീതം പാടിയെന്ന് പരാതി. കോട്ടുക്കൽ മഞ്ഞിപ്പുഴ ശ്രീ ഭഗവതി ഭദ്രകാളി ക്ഷേത്രത്തിലാണ് ഗണഗീതം പാടിയത്. കോട്ടുക്കൽ സ്വദേശി അഖിലാണ് പരാതി നൽകിയത്.

Also Read: ഹിന്ദുസ്ഥാന്‍ പവര്‍ ലിങ്ക്‌സിലെ തൊഴില്‍ പീഡനം: സമഗ്ര അന്വേഷണം ആവശ്യപ്പെട്ട് കൊച്ചി സിറ്റി പൊലീസ് കമ്മീഷണര്‍ക്ക് പരാതി

ശനിയാഴ്ച രാത്രി ക്ഷേത്രോത്സവത്തിന്റെ ഭാ​ഗമായി 'നാ​ഗർകോവിൽ നൈറ്റ് ബേഡ്സ്' എന്ന ​ഗായക സംഘത്തിന്റെ ​ഗാനമേളയിലാണ് ഗണഗീതം പാടിയത്. ടീം ഛത്രപതി എന്ന ഗ്രൂപ്പാണ് ​ഗാനമേളയുടെ സ്പോൺസർമാർ. ​ഗാനമേള ബുക്ക് ചെയ്ത സമയത്ത് തന്നെ ആർഎസ്എസിന്റെ രണ്ട് ​ഗാനങ്ങൾ പാടണമെന്ന് സ്പോൺസർമാർ ആവശ്യപ്പെട്ടുവെന്നാണ് ​ഗാനമേള സംഘം പറയുന്നത്. അതിൽ ഒരു ​ഗാനമേ തങ്ങൾക്ക് അറിയുള്ളുവെന്നും അത് പാടാമെന്ന് ഉറപ്പ് നൽകിയെന്നുമാണ് ഇവർ പറയുന്നത്. ഇതിന്റെ അടിസ്ഥാനത്തിലാണ് ക്ഷേത്രത്തിൽ ​ഗണ​ഗീതം പാടിയത്.  സംഭവത്തിൽ കോട്ടുക്കൽ സ്വദേശിയും ക്ഷേത്രോപദേശക സമിതി അം​ഗവുമായി അഖിലിന്റെ പരാതിയിൽ കടയ്ക്കൽ പൊലീസ് ഇയാളുടെ മൊഴി രേഖപ്പെടുത്തി.

Also Read: 'അവരുടെ ദൂഷിത വലയത്തിൽപ്പെടാതെ സൂക്ഷിക്കണം'; CPIM ജനറല്‍ സെക്രട്ടറി എം.എ. ബേബിക്ക് ആശംസകളോടൊപ്പം മുന്നറിയിപ്പും നല്‍കി വി.ഡി. സതീശന്‍

മുൻപ് കടയ്ക്കൽ ക്ഷേത്രത്തിലെ വിപ്ലവഗാന വിവാദത്തിൽ ക്ഷേത്ര ഉപദേശക സമിതിയെ ഹൈക്കോടതി രൂക്ഷമായി വിമർശിച്ചിരുന്നു.ക്ഷേത്രത്തില്‍ വിപ്ലവഗാനം പാടിയത് ലാഘവത്തോടെ കാണാനാകില്ലെന്നും അമ്പല പറമ്പിൽ നടന്നത് അനുവദിക്കാനാവാത്ത കാര്യങ്ങളാണെന്നുമായിരുന്നു കോടതിയുടെ വിമർശനം. ഗാനമേളയ്ക്ക് എത്ര തുക ചെലവഴിച്ചുവെന്നും, എങ്ങനെയാണ് പിരിച്ചത് എന്നറിയിക്കണമെന്നും കോടതി ആവശ്യപ്പെട്ടിരുന്നു. പൊലീസ് കേസെടുക്കേണ്ടതായിരുന്നു എന്നും അറിയിച്ചു. ഇതിനു പിന്നാലെ, ഗായകൻ അലോഷി ആദത്തിനെതിരെ പൊലീസ് കേസെടുത്തു. ക്ഷേത്ര ഉപദേശക സമിതിയിലെ രണ്ട് പേരെയും ഈ കേസിൽ പ്രതി ചേർത്തിട്ടുണ്ട്.