ഇന്ത്യൻ സൂപ്പർ ലീ​ഗിൽ ചരിത്രമെഴുതി മുൻ ഇന്ത്യൻ ഫുട്ബോൾ ടീം നായകനും ബെംഗളൂരു എഫ്‌സിയുടെ പ്രധാന സ്ട്രൈക്കറുമായ സുനിൽ ഛേത്രി. ഐഎസ്എൽ പങ്കെടുത്ത 15 ടീമുകൾക്കെതിരെയും ​ഗോളടിച്ച ​ആദ്യ താരമെന്ന അപൂർവ നേട്ടത്തിന് ഉടമയായിരിക്കുകയാണ് ഛേത്രി. മുഹമ്മദൻസിനെതിരായ മത്സരത്തിൽ പെനാൽറ്റിയിലൂടെ ​ഗോൾ നേടിയതോടെയാണ് ഛേത്രി ചരിത്രത്തിലിടം പിടിച്ചത്. മത്സരത്തിൽ ഒന്നിനെതിരെ രണ്ട് ​ഗോളുകൾക്ക് ബെം​ഗളൂരു എഫ്‌സി വിജയിച്ചു.

ബുധനാഴ്ചത്തെ മത്സരത്തിൽ എട്ടാം മിനിറ്റിൽ ലോബി മൻസോക്കിയുടെ ​ഗോളിൽ മുഹമ്മദൻസാണ് ആദ്യം മുന്നിലെത്തിയത്. സമനില ​ഗോൾ കണ്ടെത്താൻ 82-ാം മിനിറ്റ് വരെ ബെം​ഗളൂരുവിന് കാത്തിരിക്കേണ്ടി വന്നു. പെനാൽറ്റിയിലൂടെ സുനിൽ ഛേത്രി സമനില ​ഗോൾ കണ്ടെത്തുകയായിരുന്നു. രണ്ടാം പകുതിയുടെ ഇഞ്ചുറി ടൈമിൽ 99ാം മിനിറ്റിൽ ഫ്ലോറന്റ് ഒ​ഗിയറിൻ്റെ സെൽഫ് ​ഗോളിലൂടെ ബെം​ഗളൂരു ജയവും നിർണായകമായ മൂന്ന് പോയിൻ്റും സ്വന്തമാക്കി.

2015ൽ മുംബൈ സിറ്റി താരമായാണ് ഇന്ത്യൻ സൂപ്പർ ലീ​ഗിൽ ഛേത്രി അരങ്ങേറ്റം കുറിച്ചത്. മുംബൈ സിറ്റിക്കൊപ്പം 17 മത്സരങ്ങളിൽ നിന്നായി ഏഴ് ​ഗോളുകൾ അടിച്ചുകൂട്ടി. 2017ൽ ബെം​ഗളൂരു എഫ്‌സി ഐഎസ്എല്ലിന്റെ ഭാ​ഗമായതോടെ സുനിൽ ഛേത്രി അവിടേക്ക് കൂടുമാറി. ആ വർഷം ബെം​ഗളൂരുവിനെ ഐഎസ്എൽ ചാംപ്യന്മാരാക്കാനും ഛേത്രിക്ക് കഴിഞ്ഞു. ഐഎസ്എല്ലിൽ 164 മത്സരങ്ങൾ കളിച്ച ഛേത്രി ഇതുവരെ 65 ഗോളുകൾ നേടിയിട്ടുണ്ട്.