എമ്പുരാന് ശേഷം മോഹന്‍ലാലിന്റേതായി റിലീസ് ചെയ്യാനിരിക്കുന്ന ചിത്രമാണ് തുടരും. തരുണ്‍ മൂര്‍ത്തി സംവിധാനം ചെയ്ത ചിത്രത്തില്‍ ഒരു സാധാരണക്കാരനായ ടാക്‌സി ഡ്രൈവറായാണ് മോഹന്‍ലാല്‍ എത്തുന്നത്. എമ്പുരാന്റെ ട്രെയ്‌ലര്‍ റിലീസിന് ശേഷം തരുണ്‍ മൂര്‍ത്തി പൃഥ്വിരാജിന് അയച്ച മെസേജ് വൈറലായിരുന്നു. 'ഇനി ഞാന്‍ എന്തു ചെയ്യും' എന്ന ചോദ്യമാണ് തരുണ്‍ പൃഥ്വിരാജിനോട് ചോദിച്ചത്. അതിന് തുടരും എന്ന സിനിമയ്ക്കായി താന്‍ കാത്തിരിക്കുകയാണെന്നാണ് പൃഥ്വിരാജ് മറുപടി കൊടുത്തത്.

ഇപ്പോഴിതാ തരുണ്‍ ഫേസ്ബുക്കില്‍ പുതിയൊരു പോസ്റ്റ് പങ്കുവെച്ചിരിക്കുകയാണ്. ഹെലികോപ്റ്ററിന് മുന്നിലൂടെ നടന്ന് വരുന്ന ഖുറേഷി അബ്‌റാമിന്റെയും സ്‌പ്ലെന്‍ഡറില്‍ പോകുന്ന ഷണ്‍മുഖത്തിന്റെയും ചിത്രങ്ങള്‍ പങ്കുവെച്ചാണ് തരുണ്‍ രസകരമായ പോസ്റ്റര്‍ പങ്കുവെച്ചിരിക്കുന്നത്. 'ഈ പടക്കളത്തിലേക്കാണല്ലോ ദൈവമേ സ്‌പ്ലെന്‍ഡറും കൊണ്ട് ഇറങ്ങിയത്', എന്നാണ് തരുണ്‍ ചിത്രങ്ങള്‍ പങ്കുവെച്ച് കുറിച്ചത്. പോസ്റ്റിന് താഴെ ആരാധകര്‍ തരുണ്‍ മൂര്‍ത്തിയെ ആശ്വസിപ്പിച്ചുകൊണ്ട് കമന്റ് ചെയ്തിട്ടുമുണ്ട്.

അതേസമയം ചിത്രത്തിന് യു/എ സര്‍ട്ടിഫിക്കറ്റാണ് ലഭിച്ചിരിക്കുന്നത്. 2 മണിക്കൂര്‍ 46 മിനിറ്റാണ് സിനിമയുടെ ദൈര്‍ഘ്യം. മെയ് മാസത്തില്‍ ചിത്രം തിയേറ്ററിലെത്താന്‍ സാധ്യതയുണ്ടെന്നും സൂചനയുണ്ട്.

ALSO READ: ഖുറേഷി അബ്‌റാമിന് പിന്നാലെ ഷണ്‍മുഖവും എത്തും; 'തുടരും' സെന്‍സറിങ് പൂര്‍ത്തിയായി

കെ ആര്‍ സുനിലിന്റെ കഥയ്ക്ക് തിരക്കഥ എഴുതിയിരിക്കുന്നത് തരുണ്‍ മൂര്‍ത്തിയും കെ ആര്‍ സുനിലും ചേര്‍ന്നാണ്. 99 ദിവസമായിരുന്നു ചിത്രത്തിന്റെ ഷൂട്ടിംഗ് നടന്നത്. പല ഷെഡ്യൂളിലായാണ് സിനിമയുടെ ചിത്രീകരണം നടന്നത്. നവംബറില്‍ മോഹന്‍ലാല്‍ ചിത്രത്തിന്റെ ഡബ്ബിംഗ് പൂര്‍ത്തിയാക്കിയിരുന്നു.

രജപുത്ര വിഷ്വല്‍ മീഡിയയുടെ ബാനറില്‍ എം രഞ്ജിത്താണ് ചിത്രം നിര്‍മിച്ചിരിക്കുന്നത്. മോഹന്‍ലാല്‍, ശോഭന എന്നിവര്‍ക്കൊപ്പം ബിനു പപ്പു, മണിയന്‍ പിള്ള രാജു, ഫര്‍ഹാന്‍ ഫാസില്‍ എന്നിവരും ചിത്രത്തിലുണ്ട്. അതുകൂടാതെ നിരവധി പുതുമുഖങ്ങളും സിനിമയില്‍ അഭിനയിക്കുന്നുണ്ട്.

എഡിറ്റിംഗ് നിഷാദ് യൂസുഫ്, ഷെഫീഖ് വി ബി, സംഗീതം ജേക്‌സ് ബിജോയ്, എക്‌സിക്യൂട്ടീവ് പ്രൊഡ്യൂസര്‍ അവന്തിക രഞ്ജിത്ത്, ശബ്ദ സംവിധാനം വിഷ്ണു ഗോവിന്ദ്, കലാസംവിധാനം ഗോകുല്‍ ദാസ്, വസ്ത്രാലങ്കാരം സമീറ സനീഷ്, മേക്കപ്പ് പട്ടണം റഷീദ്, നിര്‍മ്മാണ നിയന്ത്രണം ഡിക്‌സണ്‍ പൊടുത്താസ്, കോ ഡയറക്ടര്‍ ബിനു പപ്പു.