വിലങ്ങാട് ദുരന്തം സംബന്ധിച്ച് സർക്കാരിന് റിപ്പോർട്ട് സമർപ്പിച്ചെന്ന് കോഴിക്കോട് ജില്ലാ കളക്ടർ സ്നേഹിൽ കുമാർ സിംഗ്. പ്രദേശത്ത് രണ്ടാഴ്ചയ്ക്കുള്ളിൽ പുനരധിവാസ പ്രക്രിയ തുടങ്ങും. ദുരന്തബാധിതർക്കുള്ള അടിയന്തര സഹായധനം ഒരു മാസത്തിനകം നൽകും. ഉരുൾപൊട്ടലിൻ്റെ സാധ്യത എവിടെയാണെന്ന കാര്യം പഠിക്കാനായി എൻഐടി സംഘം അടുത്തയാഴ്ച സ്ഥലത്തെത്തി പരിശോധന നടത്തും. താത്കാലികമായി പുനരധിവസിപ്പിച്ചവരുടെ വാടക അടക്കമുള്ള കാര്യങ്ങളിൽ സർക്കാർ തീരുമാനമെടുക്കുമെന്നും കോഴിക്കോട് ജില്ലാ കളക്ടർ പറഞ്ഞു.

വിവിധ വകുപ്പുകൾ ചേർന്ന് അവതരിപ്പിച്ച നാശനഷ്ടകണക്കുകൾ ഉൾപ്പെടുത്തിയ റിപ്പോർട്ടാണ് കളക്ടർ സർക്കാരിന് സമർപ്പിച്ചത്. ഉരുൾപൊട്ടലിൽ പ്രദേശത്തെ 14 വീടുകൾ പൂർണമായും ഒഴുകിപ്പോയതായി വടകര ആർഡിഒയും വിലങ്ങാട് ദുരന്തനിവാരണത്തിൻ്റെ നോഡൽ ഓഫീസറുമായ പി അൻവർ സാദത്ത് അറിയിച്ചു. ഇതുൾപ്പെടെ 112 വീടുകൾ വാസയോഗ്യമല്ലാതായെന്നും റിപ്പോർട്ടിൽ പറയുന്നു. താമസ യോഗ്യമല്ലാത്ത വീടുകളുടെ മുഴുവൻ കണക്കുകൾ പൂർത്തിയായിട്ടില്ല. നാലോളം കടകളും നശിച്ചിട്ടുണ്ട്. എകദേശം 5.8 കോടി രൂപയുടെ നഷ്ടമാണ് കേരള റോഡ് ഫണ്ട്‌ ബോർഡ് കണക്കാക്കുന്നത്.

ALSO READ: ഉരുൾപൊട്ടലിൻ്റെ ഞെട്ടൽ മാറാത്ത വിലങ്ങാടിൽ വീണ്ടും മണ്ണിടിച്ചിൽ; കുടുംബങ്ങളെ മാറ്റി പാർപ്പിച്ചു

ഉരുട്ടി പാലത്തിൻ്റെ അപ്രോച്ച് റോഡ്, വാളൂക്ക്, ഉരുട്ടി, വിലങ്ങാട് പാലങ്ങൾ തകർന്നത് ഉൾപ്പെടെ 156 ലക്ഷം രൂപയുടെ നഷ്ടമാണ് പിഡബ്ലിയുഡി റോഡ് വിഭാഗം കണക്കാക്കിയത്. ജലസേചന വകുപ്പിൻ്റെ നഷ്ടം 35 കോടിയാണ്. 162 ഹെക്ടറിൽ കൃഷി നാശമുണ്ടായി. 225 കർഷകരെ ദുരന്തം സാരമായി തന്നെ ബാധിച്ചു. 11.85 കോടിയുടെ നഷ്ടം കാർഷിക മേഖലയിൽ സംഭവിച്ചതായാണ് കണക്ക്. 2.7 ലക്ഷത്തിൻ്റെ നഷ്ടമുണ്ടായതായി പിഡബ്ല്യുഡി കെട്ടിട വിഭാഗവും, 35.3 ലക്ഷത്തിൻ്റെ നഷ്ടം സംഭവിച്ചതായി ജല അതോറിറ്റിയും അറിയിച്ചു. വിലങ്ങാട് ആദിവാസികളുടെ ട്രൈബൽ സൊസൈറ്റി സംഭരിച്ച 1800 കിലോ തേനും 60 കിലോ ചെറുതേനും കെട്ടിടവും ഉൾപ്പെടെ 30 ലക്ഷം രൂപയുടെ നഷ്ടമുണ്ടായതായി ട്രൈബൽ എക്സ്റ്റൻഷൻ ഓഫീസർ അറിയിച്ചു. പന്നിയേരി, കൂറ്റല്ലൂർ, മാടാഞ്ചേരി, വായാട് ഉന്നതികളിലേക്കുള്ള പാലവും റോഡും തകർന്നിട്ടുണ്ട്. വായാട് ഉന്നതിയിലേക്കുള്ള കുടിവെള്ള പദ്ധതി പൂർണമായും തകർന്ന നിലയിലാണ്.

6.06 കോടിയുടെ നഷ്ടമാണ് കെഎസ്ഇബി വിലയിരുത്തിയത്. റോഡുകൾ, കുടിവെള്ള പദ്ധതികൾ, കലുങ്കുകൾ, കെട്ടിടങ്ങൾ ഉൾപ്പെടെ മൊത്തം 14.62 കോടി രൂപയുടെ നഷ്ടമുണ്ടായതായി വാണിമേൽ ഗ്രാമപഞ്ചായത്ത് പ്രസിഡൻ്റ് പി സുരയ്യ അറിയിച്ചു. ഒന്ന്, രണ്ട്, മൂന്ന് വാർഡുകളിൽ നാശം സംഭവിച്ചതായി നരിപ്പറ്റ ഗ്രാമപഞ്ചായത്ത് പ്രതിനിധിയും അറിയിച്ചു.

ALSO READ: കോഴിക്കോട് വിലങ്ങാട് അതിശക്ത മഴ, പാലം വെള്ളത്തിനടിയിലായി; 20 ഓളം കുടുംബങ്ങളെ മാറ്റി പാർപ്പിച്ചു

വകുപ്പുതല നാശനഷ്ടങ്ങളുടെ കണക്കിന് പുറമേ വ്യക്തികളോട് നേരിൽ സംസാരിച്ചു തയ്യാറാക്കിയ കണക്കുകളും ചേർത്തുള്ള റിപ്പോർട്ടാണ് കളക്ടർ സർക്കാരിന് സമർപ്പിച്ചത്. കണക്കുകൾ വിശദമായി പരിശോധിച്ച് ശാസ്ത്രീയ പഠനവും കൂടി നടത്തിയ ശേഷമായിരിക്കും സർക്കാർ തുടർ നടപടികളിലേക്ക് കടക്കുകയെന്നാണ് ലഭ്യമാകുന്ന വിവരം.