അണ്ടര്‍ 23 സ്റ്റേറ്റ് എ ട്രോഫി പോരാട്ടത്തില്‍ അതിവേഗ ഇരട്ട സെഞ്ചുറി അടിച്ചെടുത്ത് മുൻ ചെന്നൈ സൂപ്പർ കിങ്സ് വെടിക്കെട്ട് ബാറ്റർ. ഇക്കഴിഞ്ഞ ഐപിഎല്‍ ലേലത്തില്‍ ഡല്‍ഹി ക്യാപിറ്റല്‍സ് ടീമിലെത്തിച്ച 21കാരനായ സമീര്‍ റിസ്‌വിയാണ് തകർപ്പൻ ബാറ്റിങ് പ്രകടനം പുറത്തെടുത്തത്.

ഉത്തര്‍പ്രദേശ് ടീമിന്റെ നായകന്‍ കൂടിയായ റിസ്‌വി ത്രിപുരയ്‌ക്കെതിരായ പോരാട്ടത്തിലാണ് വെറും 97 പന്തില്‍ 201 റണ്‍സടിച്ച് പുതിയ റെക്കോര്‍ഡ് സ്ഥാപിച്ചു. ആഭ്യന്തര ക്രിക്കറ്റിലെ ഏറ്റവും വേഗതയാര്‍ന്ന ഇരട്ട സെഞ്ചുറിയാണ് ഉത്തർപ്രദേശ് നായകന്‍ സ്വന്തം പേരിലാക്കിയത്.

അണ്ടർ 23 വിഭാ​ഗത്തിലാണ് റെക്കോർഡ്. വെടിക്കെട്ട് ഇന്നിങ്‌സിൽ 20 സിക്‌സുകളും 13 ഫോറുകളും ഉൾപ്പെടും. ടീം സ്കോർ 405 റണ്‍സില്‍ എത്തിക്കാന്‍ റിസ്‌വിക്കായി.

നിലവില്‍ ലിസ്റ്റ് എ ക്രിക്കറ്റിലെ ഏറ്റവും വേഗതയാര്‍ന്ന ഇരട്ട സെഞ്ചുറിയെന്ന റെക്കോര്‍ഡ് ന്യൂസിലന്‍ഡിൻ്റെ ചാഡ് ബൗസിന്റെ പേരിലാണ്. 103 പന്തിലാണ് താരത്തിന്റെ നേട്ടം. 97 പന്തില്‍ റിസ്‌വി നേടിയ ഡബിള്‍ സെഞ്ചുറി യഥാര്‍ഥത്തില്‍ റെക്കോര്‍ഡില്‍ ഒന്നാമതെത്തേണ്ടതാണ്.

എന്നാല്‍ അണ്ടര്‍ 23 പോരാട്ടമായതിനാല്‍ ഇത് ഔദ്യോഗിക പട്ടികയില്‍ വരില്ലെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ഇതോടെ റെക്കോര്‍ഡ് ബൗസിൻ്റെ പേരിൽ തന്നെ തുടരും.

ALSO READ: 35 പന്തിൽ 100; ഫാസ്റ്റസ്റ്റ് സെഞ്ചുറിയുമായി റെക്കോർഡിട്ട് ഐപിഎല്ലിലെ 'അൺസോൾഡ്' താരം